الماتىلىق ىسمەرلەر تىگىپ جاتقان الەمدەگى ەڭ ۇلكەن قۇراق كورپەنىڭ 80 پايىزى دايىن. ونى دايىنداۋعا تۇرعىندار، قالاداعى جوعارى وقۋ ورىندارى مەن كوللەدجدەردىڭ ستۋدەنتتەرى ۇلەس قوسۋدا.

بۇگىن قازاقستان قۇراق قۇراۋ شەبەرلەرى قاۋىمداستىعى جاپوندىق تىگىن ماشيناسىن سىيعا تارتتى. وسىلايشا قالالىق ورتالىقتاندىرىلعان كىتاپحانالار جۇيەسى ۇسىنعان باستاماعا قولداۋ كورسەتتى. شەبەرلەر قۇراق كورپەنىڭ العاشقى بولشەكتەرىن تىگۋدى ناۋرىز مەرەكەسىنەن باستاعان ەدى.  

«قاۋىمداستىق پرەزيدەنتى تامارا بەكمۇرات قىزى حانىمعا ۇلكەن العىسىمىزدى ايتامىز. ءالى دە اكسيا جالعاسۋدا. قالا تۇرعىندارى مەن وسى يگى ىسكە ۇلەس قوسقىسى كەلەتىن ازاماتتاردى شاقىرامىز. بەلگىلەنگەن دەڭگەيىنە جەتىپ، ءوز شارشى مەترىن اياقتاپ تىككەننەن كەيىن، ونىڭ قورىتىندى ءبولىمى بولادى. اكسياعا بەلسەنە اتسالىسقان ءار تۇرعىننىڭ، ءار مەملەكەتتىك مەكەمەنىڭ اتى اتالعان ارنايى ءتىزىم شىعادى. سونداي-اق، ماراپاتتاۋ سالتاناتى دا بولادى»، – دەدى الماتى قالاسى ورتالىقتاندىرىلعان كىتاپحانالار جۇيەسى ديرەكتورىنىڭ ورىنباسارى ءلاززات سپاتايەۆا.

الىپ قۇراق كورپەنى تىگۋگە قالاداعى 25 كىتاپحانادا تىگىن بولمەلەرى دايىندالعان. ونىڭ جالپى كولەمى، 25 مىڭ 500 شارشى مەتردى قۇراماق. اكسيا قالا كۇنىندە، ياعني 16 قىركۇيەكتە ءوز مارەسىنە جەتەدى. بۇعان دەيىن الەمدە مۇنداي كورپە پورتۋگاليانىڭ پورتو قالاسىندا تىگىلگەن. ونىڭ كولەمى 25 مىڭ 100 مەترگە جەتىپتى.