الماتىدا ينكليۋزيۆتى ءبىلىم بەرەتىن مەكتەپ جاڭا وقۋ جىلىنان باستاپ وقۋشىلاردى قابىلدايدى. بۇل تۋرالى الماتى قالاسىنىڭ اكىمى باۋىرجان بايبەك تامىز كەڭەسىندە مالىمدەدى.

ينكليۋزيۆتى ءبىلىم ورداسى زاماناۋي قۇرىلعىلارمەن جابدىقتالعان.  ال مۇعالىمدەر ەندى تەك 5 قۇجاتتى تولتىراتىن بولادى. بۇرىنعىداي اۋلالاردى ارالاپ، وزدەرىنە تيەسىلى ەمەس جۇمىستاردى اتقارمايدى. الماتى قالاسى ءبىلىم بەرۋ قىزمەتكەرلەرىنىڭ تامىز كەڭەسىندە تاعى نە ايتىلدى؟

الماتىداعى ەرەكشە بالالارعا ارنالعان مەكتەپ 1 مىڭ 200 ادامعا ارنالعان. ناۋرىزباي اۋدانىنداعى ينكليۋزيۆتى ءبىلىم ورداسى ازىرگە ەلىمىزدە بىرەۋ عانا. عيمارات تولىقتاي سەيسموتۇراقتى ەتىپ تۇرعىزىلعان. سونىمەن قاتار، ىشىندەگى جيھازدارى قابىرعاعا بەكىتىلگەن. مۇنداي تاجىريبە شەتەلدەن الىنعان ەكەن. جالپى الماتىدا ءبىلىم سالاسىنا 70 ميللياردتان استام قاراجات جۇمسالماق. ايتا كەتەيىك، اتالعان سالانى قارجىلاندىرۋ سوڭعى 5 جىلدا 40 پايىزعا وسكەن.  

«بيىل مەكتەپتەردىڭ قۇرىلىسى مەن جوندەۋ جۇمىستارىنا 17 ميلليارد تەڭگە ءبولىندى. وسى كۇنى №26-شى مەكتەپتى جاڭارتۋ جۇمىستارى اياقتالدى. سونىمەن قاتار 90 ادامعا ارنالعان تۇزەتۋ بالاباقشاسى اشىلدى. ناۋرىزباي اۋدانىنداعى جاڭا مەكتەپ سەيسموقاۋىپسىزدىك تالاپتارىنا ساي. مەكتەپ قۇرىلىسى تاكتيلدى جولدار، ليفت، شاقىرۋ باتىرماسى قويىلعان ارنايى سانيتارلىق بولمەلەردەن تۇرادى. ءبىز تاۋلى ايماقتا ءومىر سۇرگەندىكتەن سەيسموتۇراقتىلىق ساۋالى مازالايدى. مۇنداعى جيھازدار قابىرعاعا بەكىتىلگەن. بۇل ءتارتىپتى بارلىق ءبىلىم ورنىنا تاراتۋعا ءتيىسپىز. ءبىز حالىقارالىق جەتەكشى ەلدەردىڭ، ونىڭ ىشىندە، جاپونيانىڭ تاجىريبەسىنە سۇيەنەمىز. توتەنشە جاعدايلار بولا قالسا جيھازدار قۇلاپ، بالالاردىڭ سىرتقا شىعۋىنا كەدەرگى جاسايدى»، – دەدى الماتى قالاسىنىڭ اكىمى باۋىرجان بايبەك.

بيىل مەگاپوليستىڭ 4 مەكتەبىندە سەيسموكۇشەيتۋ جۇمىستارى ءجۇرىپ جاتىر. الماتىدا 1 مىڭ 134 ءبىلىم بەرۋ مەكەمەسى بولسا، ونىڭ 442ء-سى مەملەكەتتىك، ال 692ء-سى جەكەمەنشىك. قالادا 30 مىڭنان استام ءمۇعالىم قىزمەت ەتەدى ەكەن. شاھارداعى ءبىلىم بەرۋ مەكەمەلەرىنىڭ 57 پايىزىندا ەرەكشە بالالاردىڭ وقۋىنا جاعداي جاسالعان. الماتىدا بيىل 75 مىڭنان استام تالىمگەر جاڭارتىلعان ءبىلىم بەرۋ مازمۇنىمەن وقيتىن بولادى دەيدى ءبىلىم باسقارماسىنىڭ باسشىسى.

«وزدەرىڭىزگە ءمالىم بولعانداي، جاڭارتىلعان ءبىلىم بەرۋ مازمۇنىنا 2016-شى جىلدان بەرى 1، 2، 5، 7 سىنىپ وقۋشىلارى كوشكەن بولاتىن. ال جاڭا وقۋ جىلىندا 3، 6، 8 سىنىپتاعى 75 مىڭنان اسا بالا زاماناۋي وقۋ باعدارلامالارىمەن وقيتىن بولادى»، – دەدى الماتى قالاسى ءبىلىم باسقارماسىنىڭ باسشىسى گۇلنار حودجابەرگەنوۆا.

بيىل الماتىدا 71 جەكەمەنشىك بالاباقشا بۇلدىرشىندەردى قابىلداعان. تاعى 2 مىڭ ورىنعا ارنالعان 9 مەكتەپكە دەيىنگى مەكەمە سالىنىپ جاتىر. 4 مەملەكەتتىك بالاباقشانىڭ قۇرىلىسى اياقتالۋعا جاقىن.

تامىز كەڭەسىندە سونداي-اق، ستۋدەنتتەردىڭ ءبىلىم بەرۋ جۇيەسىندەگى وزگەرىستەر ايتىلدى. ەندى كوللەدجدەردە مودۋلدىك باعدارلاما بويىنشا ءبىلىم بەرىلەدى. ياعني، 1 ديپلوم بىرنەشە ماماندىققا جارامدى بولادى. سايكەسىنشە، جۇمىسقا تۇرۋ مۇمكىندىگى ارتپاق.

«جوعارعى وقۋ ورنىندا ءبىلىم الۋ جەڭىلدەتىلدى. ەندى ستۋدەنت باكالاۆر بويىنشا ءبىلىمدى بۇرىنعىداي 4 جىلدا ەمەس، 3 نەمەسە 2 جارىم جىلدا الىپ شىعادى. بارلىعى ءوزىنىڭ قابىلەتىنە بايلانىستى. مۇنداي شەشىم ساپالى كادرلار دايىنداۋعا سەپتىگىن تيگىزەدى»، – دەدى ق ر پارلامەنت ءماجىلىسى ءتوراعاسىنىڭ ورىنباسارى گۇلميرا يسيمبايەۆا.

جيىندا ءداستۇر بويىنشا ۇزدىك ۇستازدار مەن مەكتەپ باسشىلارى باعالى سىيلىقتارمەن ماراپاتتالدى. سونىمەن قاتار جاڭا وقۋ جىلىنان باستاپ بىلىكتىلىكتى ارتتىرۋ ماقساتىندا تەستىلەۋدەن وتكەن 900 ءمۇعالىمنىڭ جالاقىلارى 50 پايىزعا دەيىن كوتەرىلەدى.