الماتىدا ءوتىپ جاتقان فۋتزالدان ستۋدەنتتەر اراسىنداعى الەم چەمپيوناتىنىڭ قاتىسۋشىلارى بۇگىن شەبەرلىك ساباعىن وتكىزدى. قازاقستان، كانادا، ارگەنتينا، ۋكراينا جانە گەرمانيا ەلىنىڭ سپورتشىلارى قالانىڭ بىرنەشە جەرىندە ءوز شەبەرلىكتەرىمەن ءبولىستى.

ويىنشىلار دريبلينگ جاساۋ، دۇرىس پاس بەرۋ، جالپى فۋتزالدىڭ ەرەكشەلىكتەرىن بۇلدىرشىندەرگە كورسەتتى.

№1 بالالار ءۇيىنىڭ بۇلدىرشىندەرى كانادا مەن ۋكراينا اياقدوپشىلارىن قۋانا قارسى الدى. سپورتشىلار الاڭعا كىرە سالىپ، بىردەن جاتتىعۋدى باستاپ كەتتى. فۋتزال شەبەرلەرى بالالارعا پاس بەرۋ، دريبلينگ جاساۋ، قاقپاعا ءدال سوققى جاساۋ سەكىلدى ادىستەردى ۇيرەتتى.    

«الماتىداعى فۋتبول الاڭدارى وتە ساپالى ەكەن. كەڭ ءارى جاڭا. قوناقجايلىلىقتارىڭىزعا ءتانتى بولدىم. بۇلدىرشىندەردىڭ فۋتبولعا دەگەن قىزىعۋشىلىعى جوعارى. ءبىزدىڭ كوماندانىڭ سپورتشىلارى بار بىلگەنىن ۇيرەتىپ قالۋعا تىرىسىپ جاتىر. ءبىر كۇندىك دەمالىستا شەبەرلىك ساباقتارىن وتكىزگەن ۇيىمداستىرۋشىلارعا راحمەت»، – دەدى فۋتزالدان ايەلدەر كومانداسىنىڭ جاتتىقتىرۋشىسى (كانادا) الەكساندر دروشا.

«سپورت مەنىڭ اۋلامدا» باعدارلاماسى اياسىندا ۇيىمداستىرىلعان شارا جەتكىنشەكتەردىڭ فۋتزالعا قىزىعۋشىلىقتارىن ارتتىرادى دەيدى ستۋدەنتتەر ليگاسىنىڭ پرەزيدەنتى دامير شىنىبەكوۆ.  

«مۇنداي شەبەرلىك ساباقتارى بالالاردىڭ موتيۆاسيا الۋىنا سەپتىگىن تيگىزەدى. سونىمەن قاتار، وسى سپورت تۇرىنە دەگەن قىزىعۋشىلىقتارىن ارتتىرادى. الماتى قالاسىنىڭ تۇرعىندارى مەن قوناقتارىن جارىستى تاماشالاۋعا شاقىرامىن»، – دەدى ۇلتتىق ستۋدەنتتەر ليگاسىنىڭ پرەزيدەنتى دامير شىنىبەكوۆ.

ارگەنتينا قۇراماسىنىڭ فۋتبولشىلارى «جۇلدىز» شاعىن اۋدانىنداعى الاڭدا شەبەرلىكتەرىمەن ءبولىستى. مۇنداعى جەتكىنشەكتەر مەسسيدىڭ جەرلەستەرىن تاعاتسىزدانا كۇتكەنىن ايتادى. بالالار اياقدوپشىلاردان قولتاڭبا الىپ، بىرگە سۋرەتكە ءتۇستى. ارالارىندا سىيلىققا دوپ العاندار دا بولدى.

شەبەرلىك ساباعىن كورۋگە كەلگەن قوناقتاردى سوزگە تارتقانىمىزدا، ولاردىڭ ءبىرى: «وسى «سپورت مەنىڭ اۋلامدا» باعدارلاماسىنىڭ اياسىندا بالالاردى جيناپ، سول كوماندالاردان شەبەرلىك ساعاتتاتىن كۇتۋدەمىز»، – دەسە، ەندى ءبىرى: «جاتتىعۋلار جاساپ، ءوزىمىزدى جاتتىقتىرىپ، بولاشاقتا سپورتشى بولۋعا دايىندىق جۇرگىزىپ جاتىرمىز»، – دەپ جاۋاپ بەردى.

ەسكە سالا كەتسەك، الماتىدا ستۋدەنتتەر اراسىندا فۋتزالدان الەم چەمپيوناتى وتۋدە. بايراقتى باسەكەگە 16 ەرلەر مەن 9 ايەلدەر جاندىلار كومانداسى قاتىسۋدا. قازاقستان قۇراماسى پلەي-وفف كەزەڭىنە توپتان 1ء-شى ورىنمەن شىقتى. ءدۇبىرلى دودا «الماتى ارەنا» جانە «حالىق ارەنا» سپورت كەشەندەرىندە وتۋدە.