الماتىدا كوپتەن كۇتكەن بايراقتى باسەكە – ستۋدەنتتەر اراسىندا فۋتزالدان الەم چەمپيوناتى باستالدى. بۇل سايىستا الەمنىڭ 17 ەلىنەن كەلگەن كوماندا ب ا ق سىناماق. ءتۋرنيردىڭ سالتاناتتى اشىلۋ راسىمىنە ەلىمىزدىڭ ءبىلىم جانە عىلىم ءمينيسترى، FISU حالىقارالىق ۇيىمىنىڭ ۆيسە-پرەزيدەنتى جانە الماتى قالاسىنىڭ اكىمى قاتىستى.

قازاقستاندا سپورتتىڭ بۇل تۇرىنەن العاش رەت ءوتىپ جاتقان الەم چەمپيوناتىنىڭ العاشقى ويىنى قازاقستان مەن چەحيا كوماندالارى اراسىندا ءوتىپ، ءبىزدىڭ سپورتشىلار جەڭىسكە جەتتى.

بيىلعى الەم بىرىنشىلىگىنە 17 ەلدەن 25 كوماندا، 454 ستۋدەنت قاتىسىپ وتىر. 16 جىلدان بەرى ءوتىپ كەلە جاتقان باسەكە تاريحىندا بيىلعى قاتىسۋشىلاردىڭ سانى رەكوردتىق مەجەگە جەتتى دەيدى ۇلتتىق ستۋدەنتتەر ليگاسىنىڭ پرەزيدەنتى.

«بيىل، مىنە، رەكورد جاساپ وتىرمىز. 450-دەن استام سپورتشى كەلىپ، قاتىسىپ جاتىر. ءبىزدىڭ ستۋدەنتتەر قۇراما كومانداسى وسال ەمەس. ابدەن ىرىكتەلىپ، تىڭعىلىقتى دايىندالدى. ەندى جۇلدەلى ورىنداردان ءۇمىتتىمىز»، – دەدى ۇلتتىق ستۋدەنتتەر ليگاسىنىڭ پرەزيدەنتى دامير شىنىبەكوۆ.

بايراقتى باسەكەنىڭ رەسمي اشىلۋ سالتاناتى «الماتى-ارەنا» كەشەنىندە ءوتتى. ءار ءنومىرى قايتالانباس قويىلىمىمەن ەرەكشەلەنگەن شوۋعا قازاق ەستراداسىنىڭ جۇلدىزدارى قاتىستى. شارانىڭ باسىندا مانەرلەپ سىرعاناۋشى دەنيس تەننىڭ قۇرمەتىنە ارنالعان اسەرلى بي قويىلىمى كورسەتىلدى.

چەمپيوناتتى سالتاناتتى تۇردە اشىق دەپ جاريالاعان الماتى اكىمى باۋىرجان بايبەك سپورتشىلارعا ساتتىلىك تىلەدى. ال FISU ۇيىمىنىڭ ۆيسە-پرەزيدەنتى ماريان دىمالسكي الماتى سپورت جارىستارىن ۇنەمى جوعارى دەيگەيدە ۇيىمداستىراتىنىن ايتىپ، وسى ءتۋرنيردىڭ دە تاماشا وتەتىنىنە سەنىم ءبىلدىردى.

«ستۋدەنتتەر اراسىندا فۋتزالدان الەم چەمپيوناتىنىڭ اشىلۋىمەن بارشاڭىزدى شىن جۇرەكتەن قۇتتىقتايمىن! الەمنىڭ 17 ەلىنەن كەلىپ سپورتشىلار سايىساتىن بۇل چەمپيوناتتى وتكىزۋ ەلىمىزدەگى ءاربىر 3ء-شى ستۋدەنت ءبىلىم الىپ جاتقان الماتى شاھارى ءۇشىن زاڭدىلىق دەپ بىلەمىز. قالا حالقىنىڭ 40 پايىزىنان استامىن جاستار قۇرايدى. سوندىقتان دا الماتى – جاستار قالاسى! FISU-دىڭ بەلسەندى مۇشەسى رەتىندە ءبىز سپورتتى دامىتۋ، جاستاردى سپورتقا باۋلۋ باعىتىنداعى جۇمىستاردى جالعاستىرا بەرمەكپىز»، – دەدى الماتى قالاسىنىڭ اكىمى باۋىرجان بايبەك.

«مەن وسى فۋتزالدان ستۋدەنتتەر اراسىندا وتكەن كوپتەگەن الەم چەمپيوناتىنا باردىم. ءبىراق ءدال بۇگىنگىدەي كەرەمەت اسەر العان ەمەسپىن. بۇگىنگى جارىستىڭ اشىلۋى بۇرىن-سوڭدى بولماعان دەسەم ارتىق ايتقاندىق ەمەس. الداعى ءتۋرنيردىڭ دە جوعارى دەڭگەيدە وتەتىنىنە سەنەمىن»، – دەدى FISU ۆيسە-پرەزيدەنتى ماريان دىمالسكيي.

چەمپيوناتتىڭ اشىلۋ ءراسىمى اياقتالا سالىسىمەن، قازاقستان مەن چەحيا  قۇرامالارىنىڭ ويىنى ءوتتى. ويىن العاشقى مينۋتتان-اق تارتىستى باستالدى. ونىڭ ءبىر دالەلى رەتىندە ەكى كوماندانىڭ دا قاقپاسىنا بىر-بىردەن پەنالتي بەلگىلەنىن ايتۋعا بولادى. 12ء-شى مينۋتتا اعەدىل مادياروۆ العاشقى گولدى سوقتى. ارتىنشا داۋرەن تۇرساعۇلوۆ تاعى دا قارسىلاس كوماندانىڭ قاقپاسىن ءدال كوزدەپ ەسەپتى ەسەلەي ءتۇستى. ال چەحيالىقتاردان پاۆەل دروزد 1 گول سالىپ، ءبىرىنشى تايم 2:1 ەسەبىمەن اياقتالدى. دەگەنمەن، قازاقستاندىق سپورتشىلارعا بەلسەندى قولداۋ كورسەتكەن جانكۇيەرلەر ءبىزدىڭ ساڭلاقتاردىڭ جەڭىسكە جەتەتىنىنە سەنىمدى بولدى.

قازاقستاندىق كوماندا ويىنىن تاماشالاۋ ءۇشىن تەك الماتى تۇرعىندارى عانا ەمەس، ەلىمىزدىڭ تۇكپىر-تۇكپىرىنەن دە جانكۇيەرلەر ارنايى ات سابىلتىپ كەلگەنىن ايتىپ وتكەن ءجونا كەتۋ كەرەك. «وسى جارىستى تاماشالاۋ ءۇشىن اقتوبە وبلىسىنان وتباسىممەن كەلىپ تۇرمىن. قازاقستان سپورتشىلارى جاقسى دايىندالعان»، – دەيدى قانات ەسىمدى ازامات.  

ەكىنشى تايمدا دا قوس كوماندانىڭ ويىنشىلارى جان بەرىسىپ وينادى. قوناقتار دا، قازاقستاندىقتار دا ەكى گولدان سالدى. وسىلايشا، ماچ 4:3 ەسەبىمەن ءبىزدىڭ قۇرامامىزدىڭ پايداسىنا اياقتالدى.

ايتا كەتەيىك، الەم چەمپيوناتى 26-تامىزعا دەيىن جالعاسادى. وندا بارلىعى 17 ەلدەن جينالعان 16 ەرلەر جانە 9 ايەلدەر كومانداسى سايىسادى.