الماتى الەمدىك ءدۇبىرلى دودانى قابىلداۋعا دايىندىق ۇستىندە. ساناۋلى كۇندەردەن كەيىن قالادا ستۋدەنتتەر اراسىندا فۋتزالدان الەم چەمپيوناتى وتەدى. جارىسقا شارتاراپتان كەلگەن ەڭ مىقتى 17 ەرلەر جانە ايەلدەر كومانداسى قاتىسادى. ولاردىڭ اراسىندا كانادا، گەرمانيا، فرانسيا، ارگەنتينا جانە تاعى باسقا ەلدىڭ سپورتشىلارى بار.

ستۋدەنتتەر اراسىندا فۋتزالدان الەم چەمپيوناتىنىڭ اشىلۋ سالتاناتى ءدال وسى Almaty Arena كوپسالالى مۇز سارايىندا وتەدى. العاشقى جارىستى دا وسى كەشەندە تاماشالاۋعا بولادى. ەڭ ءبىرىنشى قازاقستان جانە چەحيا ەلىنىڭ ەرلەر قۇراماسى سايىسقا تۇسەدى. مۇز سارايى سوڭعى دايىندىقتارىن پىسىقتاۋدا. ماماندار جارىقتى تەكسەرىپ، پاركەتتى قويىپ جاتىر. سونىمەن قاتار، Halyk Arena سپورت كەشەنىندە دە جارىس بولادى.  

«وسى فۋتزالدان الەمدىك چەمپيونات ءبىزدىڭ تاريحىمىزدا، تمد ەلدەرى تاريحىندا العاشقى رەت بولادى. بۇل وتە دارەجەلى، وتە كۇردەلى چەمپيونات دەپ ايتۋعا بولادى. سەبەبى، فيفا الەمدىك فۋتبول قاۋىمداستىعى بۇل چەمپيوناتتى رەيتينگ بويىنشا سانايدى. سوندىقتان، بارلىق قۇرامالار ەڭ ۇزدىك ويىندار كورسەتۋگە تىرىسادى»، – دەدى ۇلتتىق ستۋدەنتتەر ليگاسىنىڭ پرەزيدەنتى دامير شىنىبەكوۆ.

بۇل ءدۇبىرلى دودا ءبىزدىڭ ەلدە عانا ەمەس، جالپى تمد اۋماعىندا تۇڭعىش رەت وتكەلى وتىر. بايراقتى باسەكەگە 17 ەلدىڭ ستۋدەنتتەر قۇراماسى قاتىسادى. ونىڭ ىشىندە، ارگەنتينا، چەحيا، پورتۋگاليا جانە گەرمانيا سىندى مىقتى كوماندالار بار. ەرلەر سايىسىندا قازاقستان «ۆ» توبىندا ونەر كورسەتەدى. قىزدار دا وسى توپتا سايىسادى. بوزبالالاردىڭ توپتىق تۋرنيردەگى قارسىلاستارى – چەحيا، بەلارۋس جانە جاڭا زەلانديا قۇرامالارى. ال ءبىزدىڭ بۇرىمدىلار – پورتۋگاليا، فرانسيا جانە جاڭا زەلانديانىڭ سپورتشىلارىمەن وينايدى.

«قازىرگى كوماندالاردىڭ ءبارى وتە ۇلكەن دارەجەلى ويىنشىلار. ءار مەملەكەتتە چەمپيوناتتار وتەدى. سول جاقتان ىرىكتەۋلەر جۇرەدى. وزىمىزدەگى سياقتى. قازىرگى ءبىزدىڭ ءبىرىنشى گرۋپپامىزداعى كوماندالار چەحيا، بەلورۋسسيا، جاڭا زەلانديا مەملەكەتتەرىنەن كەلدى. ءبىزدىڭ ويىنشىلارىمىزدىڭ بارلىعى 23 پەن 19 جاس اراسىنداعى ەندى شىعىپ جاتقان، ەندى كورىنىپ جاتقان جاس بالالار»، – دەدى فۋتزالدان قازاقستان ەرلەر قۇراماسىنىڭ باپكەرى قايرات قۇلباراقوۆ.

ءدۇبىرلى دودا ۇيىمداستىرۋشىلارى گەرمانيا، كانادا، جۇڭگو سپورتشىلارىن اۋەجايدان كۇتىپ الدى. الەمنىڭ تۇكپىر-تۇكپىرىنەن جينالعان اياقدوپشىلار الماتىدا ءبىر اپتا بويى كىل مىقتىدان كىم مىقتىنى انىقتايدى. فينال 26 تامىز كۇنى الماتى ارەنا كەشەنىندە وتەدى دەپ جوسپارلانعان.