الماتىنىڭ تۋعان كۇنىن مەرەكەلەۋ 25 تامىزدا باستالادى. قالا كۇنى قارساڭىندا العاشقى شارا – اشىق اسپان استىندا وتەتىن ءداستۇرلى «الماتى كوكتوبە Opera–2018» مۋزىكا فەستيۆالى.

الماتى قالاسى مادەنيەت جانە ارحيۆتەر باسقارماسىنىڭ حابارلاۋىنشا، بۇل قازاقستاننىڭ وڭتۇستىك استاناسى ءۇشىن اسا ماڭىزدى ءارى حالىق ساعىنا كۇتەتىن شارانىڭ ءبىرى. اتالمىش فەستيۆالدە تۇرعىندار مەن قالا قوناقتارى قازاقستاندىق جانە شەتەلدىك وپەرا جۇلدىزدارىنىڭ تاماشا داۋىسىن تىڭداپ، الەمدىك بالەت نومىرلەرىن تاماشالاي الادى.

بيىلعى «كوكتوبە Opera–2018» فەستيۆالىندە يتاليالىق تەنور، «وپەرنىي وسكار» جۇلدەسىنىڭ يەگەرى ۆينچەنسو كونستانسا ونەر كورسەتىپ، كلاسسيكالىق مۋزىكا تىڭدارماندارىن قۋانتپاق. سونىمەن قاتار، اباي اتىنداعى قازاق مەملەكەتتىك اكادەميالىق وپەرا جانە بالەت تەاترىنىڭ سيمفونيالىق وركەسترى الەمدىك كلاسسيكالىق شەديەۆرلەردى ورىندايدى.  

«باعدارلاماعا سيمفونيالىق وركەستر، حور جانە بالەت قاتىسادى. باعدارلاما ەكى كۇن بويى، 25-26-تامىز كۇندەرى كوكتوبە ساياباعىندا كەشكى ساعات 20.00-دە باستالادى. اشىق اسپان استىندا بولعاندىقتان، مۋزىكا ونەرىنەن ءلاززات الام دەۋشىلەر كەلىپ تاماشالاي الادى»، – دەدى الماتى قالاسى مادەنيەت جانە ارحيۆتەر باسقارماسىنىڭ ءبولىم باسشىسى اينۇر باجەنوۆا.

قالا كۇنىن مەرەكەلەۋ كەزىندە الماتىدا جۇزدەن اسا ءىس-شارا وتەدى. باعدارلاما اياسىندا «ARتBAT fest» زاماناۋي ونەردىڭ حالىقارالىق فەستيۆالى، «وركەسترلەر شەرۋى» ياعني، اشىق اسپان استىنداعى وركەستر مۋزىكاسىنىڭ فەستيۆالى قالىڭ جۇرتتىڭ كوڭىلىن كوتەرمەك. بۇدان وزگە، وتباسى فەستيۆالى جانە «Almaty garden show» باۋ-باقشا حالىقارالىق فەستيۆالى ۇيىمداستىرىلادى.

جىل سايىن قالا كۇنى قارساڭىندا پايدالى جارمەڭكەلەردى ارالاپ، قىزىقتى كونسەرتتەردى قالت جىبەرمەيتىن تۇرعىندار بيىل دا بۇل مەرەكەنىڭ جوعارى دەڭگەيدە تويلاناتىنىنان ءۇمىتتى.  

وڭتۇستىك استانامىزدىڭ تۋعان كۇنى اياسىندا كىلەم بۇيىمدارىنىڭ جارمەڭكە-كورمەسىن وتكىزۋ جوسپارلانىپ وتىر. سونداي-اق، قالا كۇنى قارساڭىندا الاتاۋ اۋدانىنىڭ 10-جىلدىعى اتالىپ وتەدى. ۇيىمداستىرۋشىلار مەگاپوليستە وتەتىن بيىلعى مەرەكە بۇرىنعىدان وزگەرەك بولادى دەيدى.