بيىل الماتىدا بىرنەشە مەكتەپتىڭ وقۋشىلارى باسقا ءبىلىم وردالارىندا وقۋ جىلىن باستاۋعا ءماجبۇر. ويتكەنى، وزدەرى وقيتىن عيماراتتا قۇرىلىس جۇمىستارى جەلتوقسان ايىنا دەيىن سوزىلماق.
وتكەن عاسىردىڭ اياعىندا قولدانىسقا بەرىلگەن مەكتەپتەردە سەيسميكالىق تۇراقتىلىق اۋىستىرىلىپ، شاتىرلارىنان باستاپ، ەدەندەرىنە دەيىن جاڭارتىلىپ جاتىر.
م. اۋەزوۆ اۋدانىنداعى مىنا مەكتەپ وتكەن عاسىردىڭ 90-شى جىلى قولدانۋعا بەرىلگەن. سودان بەرى مۇندا كۇردەلى جوندەۋ جۇمىستارى جۇرگىزىلمەگەن. تەك جىل سايىن ەسكىرگەن تۇستارى جوندەلىپ وتىرعان. ال بيىل ءبىلىم ورداسى تولىقتاي باسقا كەيىپكە ەنەدى. شاتىرىنان باستاپ، ەدەنىنە دەيىن جاڭارتىلىپ جاتىر. سونىمەن قاتار، جەر سىلكىنىسى كەزىندە 9 باللعا دەيىن شىداس بەرەتىن قۇرىلعىلارى دا اۋىستىرىلعان.
«مەكتەپ تولىعىمەن قورشاۋىنان باستالىپ، سپورت الاڭىنا دەيىن بارلىعى تولىعىمەن كۇردەلى جوندەۋ جۇمىستارىنان وتكىزىلەدى. ءار كابينەت زامان تالابىنا ساي جابدىقتالادى. وقۋشىلار تولىعىمەن جاڭا تالاپتاعى مەكتەپكە كىرەدى»، – دەدى الماتى قالاسى ا.بايتۇرسىن ۇلى اتىنداعى №139 مەكتەپ-گيمنازيا ديرەكتورى ەرىك قۋاتبەكوۆ.
قۇرىلىس جۇمىستارى قۇجات بويىنشا جەلتوقسان ايىنا دەيىن ءبىتۋ كەرەك. مەردىگەر كومپانيا جۇمىستى قاراشادا تولىعىمەن اياقتايمىز دەپ وتىر. ال وسى مەكتەپتىڭ وقۋشىلارى ول ۋاقىتقا دەيىن جاقىن ماڭداعى مەكتەپتەرگە بارىپ ءبىلىم الا تۇرادى. سونىمەن قاتار، كۇردەلى جوندەۋدەن ءوتىپ جاتقان تاعى 3 مەكتەپتىڭ تالىمگەرلەرى دە ءدال سولاي ىستەۋگە ءماجبۇر.
«قازىرگى كەزدە ءبىلىم باسقارماسى تاراپىنان بۇل ءۇش مەكتەپتە دە بالالاردى جاقىن ماڭداعى مەكتەپتەرگە ورنالاستىرۋ جونىندە بۇيرىعى شىققان. بالالار ءبىرىنشى توقساندا، بالكىم، ەكىنشى توقساننىڭ العاشقى ءبىر ايىندا بىلىمدەرىن سول مەكتەپتىڭ قاسىندا ورنالاسقان مەكتەپتەردە جالعاستىراتىن بولادى»، – دەدى الماتى قالاسى ءبىلىم باسقارماسى باسشىسىنىڭ ورىنباسارى ءلاززات جىلقىبايەۆا.
ال №123ء-شى مەكتەپتىڭ قۇرىلىسىنا جاۋاپتى كومپانيا جۇمىستارىن ۋاقىتىنان بۇرىن بىتىرگەندىكتەن، وقۋشىلار 1ء-شى قىركۇيەكتە جاڭارتىلعان عيماراتتا وقۋ جىلىن باستايدى. ءقازىر مۇندا پارتالار كىرگىزىلىپ، تازالىق جۇمىستارى جۇرگىزىلىپ جاتىر. بۇل مەكتەپتە دە سەيسموتۇراقتىلىق جاڭارتىلعان. قولدانىلعان ماتەريالداردىڭ بارلىعى وتاندىق ونىمدەر. مۇندا جوندەۋ جۇمىستارى ءساۋىر ايىندا باستالعان ەكەن.
«نەگىزىنەن، كۇردەلى جوندەۋ جانە سەيسميكالىق نىعايتۋ جۇمىستارى جۇرگىزىلدى. جوندەۋ جۇمىستارى 2018ء-شى جىلدىڭ جەلتوقسان ايىنا دەيىن سوزىلاتىن شىعار دەپ ەسەپتەگەن ەدىك. دەگەنمەن، مەردىگەر كومپانيا وزدەرىنىڭ مىندەتىن مەرزىمىنەن بۇرىن اياقتاپ، مەكتەپتى تاپسىرىپ وتىر»، – دەدى الماتى قالاسى قوجا احمەت ياساۋي اتىنداعى №123 مەكتەپ-گيمنازيا ديرەكتورى باعيلا اشىمبايەۆا.
بۇگىنگى تاڭدا الماتى قالاسىندا 250-دەن استام ءبىلىم وشاعى بار. ولاردىڭ 203ء-ى – مەملەكەتتىك مەكتەپ. جىل سايىن مەگاپوليستەگى مەكتەپتەردىڭ سەيسموتۇراقتىلىعى جاڭارىپ وتىرادى. 2025ء-شى جىلعا دەيىن قالاداعى بارلىق ءبىلىم وردالارىندا كۇردەلى جوندەۋ جۇمىستارىن جۇرگىزىپ بىتەمىز دەيدى ءبىلىم باسقارماسىنىڭ ماماندارى.
