الماتى قالالىق ءىىد قىزمەتكەرلەرى ەر ادامدى قاعىپ كەتىپ، وقيعا ورنىنان قاشىپ كەتكەن كولىك جۇرگىزۋشىسىن تاپتى، دەپ حابارلايدى Qamshy.kz اقپارات اگەنتتىگى الماتى قالالىق ءىىد-نىڭ باسپا ءسوز قىزمەتىنە سىلتەمە جاساپ.

«1994 جىلعى گ. ەسىمدى ازامات 1963 جىلعى ەر ادامدى قاعىپ كەتكەن. ول العان جاراقاتىنان وقيعا ورنىندا كوز جۇمدى. لەكسۋس 330 جۇرگىزۋشىسى ەر ادامعا كومەكتەسپەي، قاشىپ كەتكەن. بەينە باقىلاۋ كامەرالارى تەكسەرىلگەننەن كەيىن قاققان كولىك انىقتالدى. ودان كەيىن جۇرگىزۋشىنىڭ كىم ەكەنى بەلگىلى بولدى. ول الماتى وبلىسىنىڭ تۇرعىنى. جۇرگىزۋشى ۇستالدى. ونىڭ كولىگى قىلمىستىق ىسكە كىرىستىرىلدى»، - دەيدى الماتى قالالىق ءىىد-نىڭ ىزدەستىرۋ ءبولىمىنىڭ باسشىسى ەرىك ناسىربەكوۆ.

پوليسيانىڭ مالىمەتىنە سايكەس، جۇرگىزۋشى بىلتىر كولىكتى ماس كۇيىندە ايداعانى ءۇشىن ۇستالعان.

«ءقازىر سوتقا دەيىنگى تەكسەرۋ جۇمىستارى ەكى قىلمىس بويىنشا قارالىپ جاتىر. ەر ادامدى وقيعا ورنىندا قالدىرىپ كەتۋ دە قىلمىستىق جاۋاپكەرشىلىكتى تالاپ ەتەدى. ءقازىر ۇستالعان جۇرگىزۋشى تۇسىنىكتەمە بەرىپ جاتىر» دەيدى پودپولكوۆنيك ناسىربەكوۆ.