الماتى قالاسى ناۋرىزباي اۋدانىن دامىتۋعا قالا بيۋدجەتىنەن 61 ميلليارد تەڭگە قارجى بولىنگەن. ونىڭ باسىم بولىگى اۋداندا اكىمشىلىك عيماراتتتار كەشەنىن تۇرعىزۋعا جۇمسالعان. ال قالعانى اباتتاندىرۋ، جارىقتاندىرۋ جانە كوگالداندىرۋعا باعىتتالعان. اۋداندا وسى ۋاقىتقا دەيىن اتقارىلعان جۇمىستار پەن الداعى جوسپارلار الماتى قالاسى «نۇر وتان» پارتياسى فيليالىنىڭ ساياسي كەڭەس بيۋروسى كەڭەسىندە تالقىلاندى.

قازىرگى تاڭدا اۋدان حالقىنىڭ سانى 122 مىڭنان اسادى. تۇرعىنداردى ساپالى اۋىز سۋمەن قامتاماسىز ەتۋ ءۇشىن اۋقىمدى جۇمىستار اتقارىلۋدا. بۇگىندە جوبالاۋ مەكەمەلەرى اقساي جانە قارعالى وزەندەرىندە سۋ توعاندارىنىڭ تۇرعىزۋ بويىنشا جوباسىن ازىرلەۋدە.

«اۋدان قۇرىلعان بويدا كەزەك كۇتتىرمەي شەشىمىن تابۋى ءتيىس ماسەلە – كولىك جولدارىن قالىپقا كەلتىرۋ بولاتىن. وسى ۋاقىتقا دەيىن 252 كوشەگە اسفالت توسەلدى. وتكەن جىلى 1،2 شاقىرىمدىق اباي داڭعىلى قۇرىلىسىنىڭ ءبىرىنشى كەزەڭى جۇرگىزىلدى. ەكىنشى كەزەڭىنىڭ قۇرىلىسىنا جەر ۋچاسكەلەرىن نەمەسە باسقا دا جىلجىمايتىن مۇلىكتى مەملەكەت پايداسىنا الۋ جۇمىسى اتقارىلۋدا. ءقازىر وسىعان بايلانىستى 87 قاۋلى شىقتى»، – دەدى الماتى قالاسى ناۋرىزباي اۋدانىنىڭ اكىمى سانجار توعاي.

بۇگىندە اۋداندا گازداندىرۋ كورسەتكىشى 95 پايىزعا جەتكەن. ءقازىر تەك 363 ءۇي كوگىلدىر وتىنمەن قامتىلماعان. 1 قىركۇيەكتە اۋدانداعى اقجار ىقشاماۋدانىندا 1200 ورىندىق جاڭا مەكتەپ قولدانىسقا بەرىلمەك. وعان قوسا، 320 ورىنعا شاقتالعان بالاباقشانىڭ قۇرىلىسى اياقتالۋعا جاقىن.