الماتىدا العاش مەكتەپ تابالدىرىعىن اتتاعالى وتىرعان بۇلدىرشىندەرگە قايىرىمدى جاندار قول ۇشىن سوزدى. الەۋمەتتىك از قامتىلعان وتباسىلار مەن تولىق ەمەس وتباسىلاردىڭ بالالارىنا داپتەردەن باستاپ مەكتەپ سومكەلەرىنە دەيىن قاجەتتى قۇرال-جابىقتار بەرىلدى.

يگى شارا وسى جولى بوستاندىق اۋدانىندا ۇيىمداستىرلىپ، دەمەۋشىلەر ازىرگە  100-دەن استام جاسوسپىرىمگە بازارلىق ۇسىندى. وقۋ جىلى باستالعانشا، قولداۋ ارتا بەرمەك.

«قىركۇيەككە دەيىن جالعاسىن تابادى. ءقازىر 100 بالاعا كومەكتەسەيىن دەپ وتىرمىز. ونىڭ ىشىندە ءبىزدىڭ كاسىپكەرلەر، مەملەكەتتىك مەكەمەلەر كومەكتەسىپ جاتىر. 856 جانۇيا وزدەرىنىڭ از قامتىلعان وتباسى ەكەنىن كورسەتە الماعان، انىقتاما تاپسىرىپ ۇلگەرە الماعان وتباسىلار دا بار. سول 856 ادامدى ءبىز قامتيمىز. ءقازىر سول باعىتتا جۇمىس جاساپ جاتىرمىز»، – دەدى الماتى قالاسى بوستاندىق اۋدانى اكىمىنىڭ ورىنباسارى مارجان بالبايەۆا.