بۇگىندە قالادا كومىر ءونىمىن ساتاتىن 7 نەگىزگى ورىن بار. قاتتى وتىننىڭ جالپى قورى 15 مىڭنان استام توننانى قۇرايدى، دەپ حابارلايدى ەلوردا اكىمدىگىنىڭ رەسمي سايتى.

ءدال قازىرگى تاڭدا استانادا كومىر ماسەلەسى بايقالمايدى. حالىققا قاجەتتى قاتتى وتىننىڭ جالپى قورى 25 تامىزداعى جاعداي بويىنشا 15 111 توننانى قۇرايدى.

17ء-سى مەن 25ء-شى تامىز ارالىعىندا استاناعا 90 ۆاگون نەمەسە 6223 توننا كومىر كەلىپ ءتۇستى.

سونىمەن، شۇباركول كومىرىنىڭ ءبىر توننا باعاسى 12500-14500 تەڭگەنى قۇرايدى، قاراجىرا – ءبىر تونناسى 14000 تەڭگە، مايكوبە – ءبىر تونناسى 12500 تەڭگە.  

ايتا كەتەيىك، «استانا قالاسىنىڭ وتىن-ەنەرگەتيكالىق كەشەنى جانە كوممۋنالدىق شارۋاشىلىق باسقارماسى» كومىر ساتۋشىلارمەن باعانى وسىرمەۋ تۋرالى مەموراندۋمعا قول قويعان بولاتىن.

استانا قالاسىنىڭ اكىمدىگى كومىر نارىعىنداعى جاعدايعا كۇن سايىن مونيتورينگ جۇرگىزىپ ءارى باقىلاۋىندا ۇستاپ وتىر. «iكومەك 109» بازاسىندا حالىقپەن تىكەلەي بايلانىس جەلىسى قۇرىلدى.