ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورى عالىمقايىر مۇتانوۆ قالالىق وڭىرلىك كوممۋنيكاسيالار قىزمەتى الاڭىندا تالاپكەرلەر سانى مەن «التىن بەلگى» يەگەرلەرى، سونداي-اق قايىرىمدىلىق كومەك تۋرالى بايانداپ بەردى.

ونىڭ سوزىنشە، جىل سايىن قازۇۋ-دە 10 مىڭنان اسا قازاقستاندىق جانە شەتەلدىك ستۋدەنتتەر ءبىلىم الادى.

«6،6 مىڭنان استام مەكتەپ تۇلەكتەرى بيىل قازۇۋ تاڭداپ، مەملەكەتتىك ءبىلىم گرانتىنا يە بولعان. بۇل قازاقستاندىق جوعارعى ءبىلىم تاريحىنداعى رەكوردتىق كورسەتكىش. تالاپكەردەردىڭ ساپالى ءبىلىم الۋ ماقساتىندا سانالى تۇردەگى تاڭداۋى. ەلدىڭ ەڭ ۇزدىك وقۋ ورنىنا ارتقان سەنىمى»،-دەدى ول.

سونداي-اق قازۇۋ رەكتورى گرانتقا تۇسە الماي قالعان «التىن بەلگى» يەگەرلەرىنە ۋنيۆەرسيتەت ىشىنەن دە گرانت بولىنەتىنىن ايتتى.

«جىل سايىن بىزگە مەكتەپتى ۇزدىك اتتەستاتپەن بىتىرگەن 1500-دەي «التىن بەلگى» يەگەرى كەلەدى. بيىل ولاردىڭ قاتارىنان 800 تالاپكەر ءبىلىم گرانتىن يەلەندى. بۇرىن گرانتقا تۇسپەي قالعان ۇزدىكتەر اقىلى بولىمگە تاپسىراتىن. بۇل جولى ءبىز ۋنيۆەرسيتەت اتىنان گرانت ۇسىندىق. ياعني ولار اقىسىز وقيدى، ءبىراق شاكىرتاقى المايدى. سوعان قاراماستان ولار ەمتيحان مەن سەسيانى «وتە جاقسى» تاپسىرۋعا مىندەتتى»،-دەدى رەكتور.

عالىمقايىر مۇتانوۆ سونىمەن قاتار از قامتىلعان وتباسىنان شىققان تالانتتى ستۋدەنتتەر ءۇشىن ۋنيۆەرسيتەتكە مەسەناتتار اتىنان 180 ملن تەڭگە تارتىلعانىن ايتتى.

وسىنىڭ ەسەبىنەن وتباسىلىق جاعدايى تومەن 300-500 شاقتى ستۋدەنتكە شاكىرتاقى مەن الەۋمەتتىك كومەك رەتىندە قولداۋ كورسەتىلمەك.