الماتىدا لينگۆيست عالىمدار لاتىن الىپبيىنە نەگىزدەلگەن قازاق ءتىلىنىڭ جاڭا ەملە ەرەجەسىنىڭ پيلوتتىق جوباسىن تالقىلادى.
ش.شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعى ۇيىمداستىرعان جيىندا لينگۆيست-عالىمدار لاتىن ءقارپىن ەنگىزۋگە قاتىستى ۇسىنىس، پىكىرلەرىن ورتاعا سالدى.
«ۇكىمەت بەكىتكەن جوسپارعا سايكەس ورفوگرافيالىق سوزدىك پەن ورفوگرافيالىق ەملە جيناعى كەلەر جىلدىڭ سوڭىندا شاعادى. بيىل نەگىزگى ەرەجەلەر، كونسەپسيا تالقىلانادى. پروسەسس كەزىندە تۋىنداپ جاتقان سۇراقتار وتە كوپ، تيىسىنشە تاپسىرمالار دا جەتەرلىك. تالقىلاۋ بارىسى ءتۇرلى جاعدايدا جالعاسادى. وڭىرلەرگە بارىپ كونفەرەنسيا، دوڭگەلەك ۇستەل، سەمينارلار وتكىزەمىز»،-دەدى ە.قاجىبەك.
ونىڭ ايتۋىنشا، ءقازىر عالىمدار گرامماتيكا، فونەتيكا، فونولوگيانى قازاق ءتىلىنىڭ زاڭدىلىعىنا لايىقتاۋدا.
«بۇل ءبارىنىڭ كوكەيىندە جۇرگەن سۇراق. ءقازىر ءبىز بايىرعى ەرەجەمىزگە باستار جولدامىز. بۇل جىلدام بولا قوياتىن نارسە ەمەس»،-دەدى عالىم.
جوعارىدا اتالعان ورتالىقتىڭ باس ديرەكتورى عاريفوللا ەسىم لاتىن قارپىنە كەزەڭ-كەزەڭمەن كوشۋدىڭ جولدارى تۋرالى ايتتى.
«ءبىز بەس-التى اي كۇنى-تۇن جۇمىس ىستەدىك. كوپ ماسەلەلەردى تالقىلاپ، شەشىمدەر قابىلداپ ۇلگەردىك. ءالى دا اتقارىلماعان جۇمىستار كوپ. العاشقىدا قيىن بولادى. جوبانى دايىنداۋدى ءوز ءىسىنىڭ ماماندارى قولعا العان. ءوز ءتىلىمىزدى بيىك دەڭگەيگە كوتەرۋ ۇلكەن ءىس ءارى ەل تاريحىنداعى ماڭىزدى ءسات.»،-دەدى عاريفوللا ەسىم.
