الماتى جەر قاتىناستارى باسقارماسى باسشىسىنىڭ ورىنباسارى ارداق سامامبەتوۆ مەملەكەت قاجەتتىلىگى قايتارىلىپ الىنعان جەرلەر مەن بولاشاقتا قايتارىلاتىن جەر تەلىمدەرى تۋرالى ايتتى.

«بىزگە ناۋرىزباي اۋدانىنداعى «قالقامان» مەترو ستانساسىنىڭ قۇرىلىسى ءۇشىن جەر تەلىمدەرىن قايتارىپ الۋ جونىندە ءوتىنىم كەلدى. وعان شامامەن 150 ۋچاسكە جاتادى. ارالاپ، قاجەت قۇجاتتار مەن ماتەريالداردى جيناۋعا قاتىستى جۇمىستار جۇرگىزىلىپ جاتىر. ارينە، مۇلىكتى باعالاۋ ءۇشىن قۇقىق بەلگىلەيتىن قۇجاتتاردى الىپ، تەكسەرىس جۇرگىزۋ قاجەت. شامامەن ۇيلەردىڭ 50% ارالاپ شىقتىق، ماتەريالدار پاكەتىن جينادىق. مەنشىك يەلەرىنىڭ بارلىعى قۇجاتتارىن بەرۋگە كەلىسىم بىلدىرمەيتىندىكتەن، ولاردى ءارتۇرلى كاداسترلاردان، ادىلەت ورگاندارى مەن مۇراعاتتان الدىرتۋعا ءماجبۇر بولىپ وتىرمىز»، - دەدى ارداق سامامبەتوۆ.

بۇدان بولەك، ارداق سامامبەتوۆ كولىك جول ايىرىقتارىنىڭ قۇرىلىسى ءۇشىن الىناتىن جەر ۋچاسكەلەرىنە جەكەلەي توقتالدى. ت.رىسقۇلوۆ-قۇلجا جولىنا ارنالعان جول ايىرىعىنا جەرلەردى يەلىكتەن قايتارۋل اياقتالدى. باسقارما 3 ملرد تەڭگەگە جەر تەلىمدەرىن ساتىپ الدى.

«ەمسوۆا كوشەسىندەگى جول ايىرىق بويىنشا ءالى دە جۇمىستار جاسالۋدا. ونىڭ بويىنداعى جەر ۋچاسكەلەرىنىڭ 70% ساتىپ الۋدى اياقتادىق. جالپى 102 ۋچاسكەنىڭ الپىس بەسىن 3،3 ملرد تەڭگەگە ساتىپ الدىق. 37 ۋچاسكە بويىنشا جۇمىس جۇرگىزىلۋدە. ءى.جانسۇگىروۆ-ن.نازاربايەۆ جول ايىرىعىندا ەستاكادانىڭ قۇرىلىسى ءجۇرىپ جاتىر. تەلىمدەردى وتكەن جىلى ساتىپ الا باستادىق. جالپى 45 ۋچاسكەنىڭ 44-ىنە 1،7 ملرد تەڭگە بەرىلدى. ءبىر ۋچاسكەدە ءالى جۇمىستار اتقارىلىپ جاتىر، الايدا ول جەر بوس. وعان قاتىستى ءىس جوعارعى سوتتا قارالۋدا»، - دەدى ا. سامامبەتوۆ.

سونداي-اق، اباي داڭعىلى مەن مومىش ۇلى كوشەسىنىڭ جول ايىرىعى سىندى ءىرى جوبالارعا جەر ۋچاسكەلەرىن يەلىكتەن شىعارۋ ماسەلەسى قاراستىرىلعان. شامامەن 300 جەر تەلىمى يەلىكتەن شىعارىلادى، ولاردىڭ 104-ىنە قاۋلى قابىلداندى.

الماتىداعى BRT ءۇشىن 32 جەر ۋچاسكەسى يەلىكتەن شىعارىلعان ەدى، ولاردىڭ جەتەۋىنە قاتىستى ماسەلە ءالى دە شەشىمىن تاپپادى.