الماتىدا «نۇر وتان» پارتيا فيليالىنىڭ باسپا ءسوز ورتالىعىندا ماماندار الماتىدا قالاي پاتەر الۋعا بولاتىنى جونىندە ايتتى.

«الدىڭعى جىلدارمەن سالىستىرعاندا بۇگىن قازاقستاندىقتارعا  باسپانالى بولۋعا  بىرنەشە مۇمكىندىك بار. «نۇرلى جەر» جانە «الماتى جاستارى» سەكىلدى اۋقىمدى باعدارلامالار جۇزەگە اسىرىلۋدا. 7-20-25 باعدارلاماسىنىڭ ىسكە اسىرىلۋى بۇل تۇرعىدا ۇلكەن سەرپىن بەرەدى»،- دەدى «نۇر وتان»  پارتياسى الماتى قالالىق فيليالى ءتوراعاسىنىڭ ورىنباسارى ستانيسلاۆ كانكۋروۆ. 

ماماندار باسپانالى بولۋدىڭ ءتيىمدى جولدارىنا توقتالا كەتتى.

شاراعا قاتىسقان «تۇرعىن ءۇي قۇرىلىس جيناق بانكى» اق ءتورايىمى ءلاززات يبراگيموۆانىڭ ايتۋىنشا، قازىرگى تاڭدا جيناقتاۋ جۇيەسى بويىنشا «الماتى جاستارى» باعدارلاماسى، «نۇرلى جەر»، «ءوز ءۇيىم» باعدارلاماسى بويىنشا باسپانا الۋعا بولادى. الايدا، بانكتىڭ قوياتىن ءبىرقاتار شارتى بار.

«الماتى جاستارى» بويىنشا كليەنتتىڭ (وتباسى بولسا، ەكەۋىنىڭ دە) جاسى 35-كە تولماۋى كەرەك. ءارى الماتىدا تۇرعىلىقتى مەكەنجايعا 1 جىل تىركەۋدە بولۋى ءتيىس. ال «نۇرلى جەر» باعدارلاماسى بويىنشا كليەنتتىڭ 3 جىلدىق تۇرعىلىقتى مەكەنجايى بولۋى شارت. سونىمەن قاتار، ادامنىڭ اتىندا سوڭعى 5 جىلدا باسپانا تىركەلمەگەن بولۋى ءتيىس. «ءوز ءۇيىم» باعدارلاماسى بويىنشا تۇرعىلىقتى مەكەنجاي بولۋى شارت ەمەس. پايىزدىق مولشەرلەمە 8،5%-دان 7%-عا ءتۇستى»، - دەدى ءلاززات يبراگيموۆا.