ايدا كولپاكوۆا ەسىمدى فەيسبۋك قولدانۋشىسىنىڭ ءوزىنىڭ جەكە پاراقشاسىندا جاريالاعان جازباسى وقىعان ادامدى بەيجاي قالدىرماسى انىق. سەبەبى فوتوسىنان كوزدەرى كۇلىمدەپ تۇرعان، ءتۇرلى-تۇستى كويلەك كيىپ الىپ، باقىتتان بال-بۇل جايناعان مۇمكىندىگى شەكتەۋلى ءۇش كىشكەنتاي قىزدى كورە الاسىز. ولار فوتوكامەرا وبەكتيۆىنە كۇلىمدەپ تۇرعانىمەن، اناسىنىڭ جۇرەگى قان جىلاپ تۇرعان ءسات. ماسەلەنىڭ ءمان-جايىن تارقاتىپ ايتساق، 29 تامىزدا استانا قالاسىندا اقتوبە وبلىسىنىڭ كۇنى وتكىزىلىپتى. ەلباسى مەن استانالىق اكىميات تاماشالايتىن اتالمىش مەرەكەلىك ءىس-شارادا ايدانىڭ بالاسى دا بي بيلەۋى كەرەك ەدى. الايدا ارباعا تاڭىلعان ءبيشى قىزداردى كونسەرت ۇيىمداستىرۋشىلارى ساحناعا شاقىرماعان. كەيىننەن بەلگىلى بولعانداي، ءتىپتى رەپەتيسيا كەزىندە دە مۇمكىندىگى شەكتەۋلى بالالاردى الدىڭعى شەپتەن الىپ، كوزگە تۇسپەيتىن جەرلەرگە وتىرعىزعان. «ءبىز ءبارىمىز ءارتۇرلىمىز، ءبىراق تەڭبىز» دەگەن ۇرانمەن وتكەن ءىس-شارانى بۇل قىزدار اسىعا كۇتتى دەپ جازادى ايدا كولپاكوۆا. «تاڭەرتەڭ تۇرىپ، بويانىپ-سىلانىپ، ادەمى كويلەكتەرىن كيىپ، ۋايىمداپ، تولقىپ، كونسەرتكە كەتكەن بولاتىن، مىنا جاعداي ولاردىڭ كوڭىلدەرىنە كىربىڭ ۇيالاتتى. مەن ءوزىمدى پاتريوت دەپ سانايتىنمىن. شەتەلدە 13 جىل تۇرعاندا دا ەلىم، جەرىم تۋرالى ءبىر اۋىز جامان ءسوز ايتپايتىنمىن. سويتسەم، مەن ماقتان تۇتقان قازاقستان پارا بي چەمپيوناتىنان العاشقى التىن جەڭىپ العان كىشكەنتاي قىزداردى ساحنادان كورسەتۋگە ۇيالىپ، شابىت ۋنيۆەرسيتەتىندە تىعىپ ۇستادى. بۇل نەتكەن سوراقىلىق؟ نەتكەن ماسقارا؟» دەيدى اشۋلانا ايدا. «قازاقستاننىڭ باستى قازىناسى، بايلىعى – ادام» دەپ تايعا تاڭبا باسقانداي اتا زاڭدا جازىلىپ تۇرسا دا، بيلىك، اشىعىن ايتقاندا، بيلىك جاعىمپازدارى «جاقسى كورىنەمىن، جاعامىن» دەگەن وي-ماقساتپەن وسىنداي سوراقى تىرلىككە باردى. ەڭ قىزىعى، اقتوبە اقپارات ورتالىعى بىلاي دەپ جاۋاپ قاتىپتى: مۇمكىندىگى شەكتەۋلى بالالار 29 تامىزدا وتەتىن كونسەرتكە شاقىرىلعان بولاتىن. كونسەرت باستالماس بۇرىن اۋا رايىنىڭ ناشارلاۋىنا بايلانىستى بالالاردى اتا-انالارىمەن قوسا كورشى عيماراتقا كوشىرگەن بولاتىنبىز. سول جەردە ولار ساحناعا شىعار ۋاقىتتى كۇتىپ وتىرۋى ءتيىس ەدى. الايدا كونسەرتتىك باعدارلامانىڭ قىسقارتىلۋىنا بايلانىستى بالالالار قورىتىندى نومىرگە كەشىگىپ شىقتى. بالالار مەن اتا-انالارعا بەلسەندىلىك تانىتقاندارى ءۇشىن العىس ايتا وتىرىپ، ورىن العان جايت ءۇشىن كەشىرىم سۇرايمىز». ءبىر نارسە اقىلعا سىيمايدى، اقتوبە اقپارات ورتالىعىنىڭ ايتۋى بويىنشا، بالالار ساحناعا شىعىپتى، ال اناسى تەرىسكە شىعارىپ وتىر.

ايدا اقتوبەلىك بيلىكتىڭ كەشىرىم سۇراۋىنان كەيىن تاعى ءبىر جازبا جاريالادى. «ماعان ەشكىمنىڭ كەشىرىم سۇراعانى قاجەت ەمەس. مەنىڭ بالالارىمدى دا اياعاندارىڭىزدى قالامايمىن. اۋا رايى بۇزىلدى دەيدى... ەشكىم شىندىقتى ايتقىسى كەلمەيدى. اركىم ءوزىنىڭ كرەسلوسى ءۇشىن قورقىپ وتىر. وسىمەن بۇل اڭگىمە ءتامام بولسىنشى. تەك ءبىر-اق نارسە ءوتىنىپ سۇرايمىن: ديسكريميناسياعا ءىس جۇزىندە جول بەرمەسەڭىزدەر! مەنەن اقتالعانداي بولىپ كەشىرىم سۇراعانشا مۇمكىندىگى شەكتەۋلى جانداردىڭ ءجۇرىپ-تۇرۋىنا، ءومىر سۇرۋىنە قولايلى جاعداي جاساساڭىزدار، ليفت ورناتساڭىزدار، باسپالداقتارمەن قوسا «پاندۋستار» ورناتساڭىزدار، مەن قۋانامىن. اقتوبەدە ىشىندە ءليفتىسى بار مەكتەپ بولسا، قانداي عانيبەت بولار ەدى. قانشاما ارباعا تاڭىلعان بالا مەكتەپكە بارۋدى، ءبىلىم الۋدى، ەڭ باستىسى بارلىق بالامەن تەڭ بولۋدى ارماندايدى. نەگىزى، شىن جۇرەكتەرىڭىزبەن قالاساڭىزدار، اتقارار شارۋا كوپ، اكىميات! ءبىزدىڭ بالالارعا قولداۋ بىلدىرگەن، جازبانى وقىپ، بەيجاي قالماعان بارشاڭىزعا العىس بىلدىرەمىن» دەپ جازادى ءسوز سوڭىندا ايدا.

ايدا ءارى قاراي اكىمياتپەن بولسىن، ۇيىمداستىرۋشىلارمەن بولسىن كۇرەسۋدى دوعارۋدى دۇرىس دەپ ساناعان سياقتى. ءبىز دە ءوز كەزەگىمىزدە ۇيىمداستىرۋشىلارعا قوڭىراۋ شالىپ، قايتادان كەشىرىم ەستىگەنشە، ۋاقىتتى زايا كەتىرمەي وسىنداي ەرەكشە بالالاردىڭ باتىل انالارىن، اكەلەرىن سۇحباتقا تارتىپ، وقىرمان نازارىنا ۇسىنۋدى پايدالىراق دەپ شەشتىك. مەيىرىمدى بولايىق، زامانداستار! ادامدىق قالپىمىزدان اينىمايىق!