كيە تۇنعان جەرلەردى قاستەرلەۋ - بۇگىنگى ۇرپاقتىڭ پارىزى. ەلباسى نۇرسۇلتان نازاربايەۆ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا جالپىۇلتتىق قاسيەتتى ورىندار ۇعىمىنىڭ ەرەكشە ماڭىزدىلىعىن اتاپ وتكەن بولاتىن. «قازاقستاننىڭ قاسيەتتى جەرلەرىنىڭ مادەني-گەوگرافيالىق بەلدەۋى – نەشە عاسىر وتسە دە، ءبىزدى كەز-كەلگەن رۋحاني جۇتاڭدىقتان ساقتاپ، امان الىپ شىعاتىن سيمۆولدىق قالقانىمىز، ءارى ۇلتتىق ماقتانىشىمىزدىڭ قاينار بۇلاعى. ول – ۇلتتىق بىرەگەيلىك نەگىزدەرىنىڭ باستى ەلەمەنتتەرىنىڭ ءبىرى» – دەپ اتاپ ءوتتى مەملەكەت باسشىسى.

ەلباسىنىڭ وسى باعدارلامالىق ماقالاسى اياسىندا ۇلى كۇيشى قۇرمانعازى ساعىرباي ۇلىنىڭ 195 جىلدىعى جانە قۇرمانعازى اۋدانىمىزدىڭ 90 جىلدىق مەرەيتويىنا وراي اعىمداعى جىلدىڭ 20 شىلدە كۇنى اتىراۋ وبلىسى قازاقستان حالقى اسسامبلەياسى، اتىراۋ وبلىسى اكىمى اپپاراتىنىڭ "قوعامدىق كەلىسىم" كمم-سى مەن قۇرمانعازى اۋداندىق انالار كەڭەسىنىڭ ۇيىمداستىرۋىمەن رەسەي فەدەراسياسىنىڭ استراحان وبلىسى، ۆولودار اۋدانى، التىنجار سەلوسىنداعى كۇي اتاسى قۇرمانعازى بابامىزدىڭ ماڭگى تىنىستاپ جاتىرعان مەكەنىنە قۇرمانعازى اۋدانىنان ءبىر توپ دەلەگات ساياحات جاسادى.

ساپاردىڭ ماقساتى: ەلباسىنىڭ «رۋحاني جاڭعىرۋ» باعدارلاماسى اياسىندا قازاقستان تاريحىن بىلۋگە جانە قۇرمەتتەۋگە شاقىرۋ، تاريحي-مادەني قۇندىلىقتارىمىزدى ساقتاپ قالۋ، ولاردى ۇرپاقتان-ۇرپاققا جەتكىزۋ.

دەلەگات قۇرامىنا قۇرمانعازى اۋدانىنىڭ «التىن شاڭىراق» انالار كەڭەسىنىڭ مۇشەلەرى، ەڭبەك ارداگەرلەرى مەن ولاردىڭ لايىقتى ءىزىن جالعاستىرعان بۇگىنگى جاس بۋىن وكىلدەرى قاتىستى.

قازاق ەلىنەن بارعان ءبىر توپ جەرلەستەرىمىز ساياحات بارىسىندا قۇرمانعازى اتىنداعى كەسەنەسىنىڭ تۇرعىزىلۋ تاريحىمەن تانىستى. سونىمەن قاتار، دەلەگات مۇشەلەرى قۇرمانعازى اتىنداعى مادەني ورتالىعىندا بولىپ قايتىپ، مۇراجاي جادىگەرلەرىمەن تانىسىپ، كۇي اتاسى قۇرمانعازىنىڭ ومىردەرەكتەرىنىڭ بەيمالىم تۇستارىنان دا حاباردار بولدى. ساياحات كۇيشىنىڭ اتىنداعى مادەني ورتالىعىنداعى كونسەرتپەن جالعاستى.

قۇرمانعازى اتىنداعى مادەني ورتالىق - رەسەي-قازاقستان دوستىعىنىڭ ايرىقشا بەلگىسى. وسىدان ون جىلدان استام ۋاقىت بۇرىن قازاقستاننىڭ اتىراۋ، باتىس قازاقستان، ماڭعىستاۋ وبلىستارى مەن رەسەيدىڭ استراحان وبلىسى بىرلەسىپ سالعان بۇل كەشەندى ورىن، قازاق مادەنيەتىنىڭ وشاعىنا جانە ەدىل بويى مەن كاسپيي ءوڭىرىنىڭ مادەني مۇراسىن زەرتتەپ، ناسيحاتتاۋ ورتالىعىنا اينالدى. بۇل ورتالىقتىڭ بازاسىندا بولىپ جۇرگەن بارلىق مادەني وتىلىمدەر ءداستۇرلى قازاق ۇلتىنىڭ قۇندىلىقتارىن، ونەرلەرىن ناسيحاتتاۋعا جانە دامىتۋعا باعىتتالعان.

مادەني ورتالىقتىڭ قىزمەتكەرلەرى التىن مۋسايەۆا مەن زالينا يسكالييەۆا ەكى ەل اراسىنداعى ىنتىماقتاستىقتىڭ، ارىپتەستىكتىڭ ءالى دە نىعايا بەرەتىنىنە، بۇدان دا جوعارى بيىكتەرگە كوتەرىلەتىنىنە زور سەنىمدەرىن ءبىلدىرىپ، قازاقستاننىڭ جەتىستىكتەرىنە قۋانىپ، ماقتاناتىنىن ۇلكەن تەبىرەنىسپەن جەتكىزىپ جاتتى. ءوز كەزەگىندە قۇرمانعازى اۋداندىق انالار كەڭەسىنىڭ ءتورايىمى بالعانىم حاسەنوۆا رۋحاني ازىق سىيلاعان مادەني قىزمەتكەرلەرگە شىعارماشىلىق تابىس تىلەپ، ەستەلىك رەتىندە ۇلتتىق ەنسيكلوپەديا كىتاپتارىن سىيعا تارتتى.