قۇردىمعا كەتكەن كوممۋنيزمنىڭ بەل بالاسى كومسومولدىڭ 100 جىلدىعى تاۋەلسىزدىگىن العان قازاقستاندا اتالىپ ءوتتى. الماتىنىڭ اباي اتىنداعى وپەرا جانە بالەت تەاترىندا ءبىر جىلدارى كومسومولدا قىزمەت ىستەگەن، اتالعان ۇيىمدى باسقارعان، كومسومولدىڭ وبلىستىق، اۋداندىق ۇيىمدارىنا جەتەكشىلىك ەتكەن وكىلدەر كەلىپ قاتىستى. ولاردىڭ ىشىندە ەلگە بەلگىلى تۇلعالار، ءتىپتى قازىرگى ءماجىلىس پەن سەناتتا دەپۋتات بولىپ وتىرعان «نۇروتان» پارتياسىنىڭ مۇشەلەرى مەن تانىمال قوعام قايراتكەرلەرى بار.
كەزىندە كومسومولعا ەڭبەك سىڭىرگەندەردىڭ بارلىعى دا ايتۋلى مەرەكەدە «ۆلكسم-نىڭ 100 جىلدىعى» مەدالىمەن ماراپاتتالدى. كەشە كومسومولعا مۇشە بولعان بۇل ازاماتتاردىڭ كەيىنگى ۇرپاققا تۇك كەرەگى جوق ۇيىمنىڭ 100 جىلدىعىن دۇركىرەتىپ وتكىزۋى تۇسىنىكسىز. بۇل وتكەندى ساعىنۋ ما؟ كەشە قازاقستاندى كومسومولدىڭ ەلەسى كەزدى. «قازاققا قان قۇستىرعان جۇيەنىڭ 100 جىلدىعىن تويلاعانى نەسى؟» جۋرناليست دينا ەلگەزەك ءوزىنىڭ فەيسبۋكتەگى الەۋمەتتىك پاراقشاسىندا وسىلاي دەپ جازدى. مۇنىڭ قانشالىقتى قاجەتى بار ەدى؟
الاش وردانىڭ 100 جىلدىعىن اتاپ وتپەگەن ۇكىمەتتىڭ بەلسەندىلەرى كوممۋنيستەردىڭ قۇيىرشىعى بولعان جاندايشاپ كومسومولداردىڭ 100 جىلدىق مەرەيتويىن اتاپ ءوتتى. اناۋ-مىناۋ ەمەس، الماتىنىڭ اباي اتىنداعى وپەرا جانە بالەت تەاترىندا! وعان ەلىمىزدەگى جەتەكشى پارتيانىڭ ءماجىلىس پەن سەناتتاعى فراكسياسىنىڭ وكىلدەرى، سونىمەن قاتار ەسىمى ەلگە بەلگىلى قازاقتىڭ قايراتكەرلەرى قاتىستى. وكىنىشتى، وتە وكىنىشتى. ۇلتقا ۇپاي بەرمەيتىن شارانى سۋرەتتەن، الەۋمەتتىك جەلىدەن كورىپ، انشەيىندە ۇلتتىڭ ءسوزىن سويلەيتىن ازاماتتاردىڭ وعان بارعانىنا قاپا بولدىق. ولاردى ەندى قايراتكەر دەۋگە بولا ما؟! مۇمكىن مىنا تۇرلەرىمەن الداعى ۋاقىتتا قازاقتى قان قاقساتقان كەڭەس وداعىنىڭ دا «پالەنباي جىلدىعىن» اتاپ وتەر. ەرىكسىز بارعان شىعار، ءبىراق «ەل نە دەيدى؟» دەپ ويلاسا نەتتى؟!
♦تاعى دا كومسومول، تاعى دا لەنين!
100 جىلدىق مەرەيتويدا قازاقستان كوممۋنيستىك حالىقتىق پارتياسى ورتالىق كوميتەتىنىڭ حاتشىسى جامبىل احمەتبەكيەۆ پەن اتالعان پارتيانىڭ الماتى كوميتەتىنىڭ ءبىرىنشى حاتشىسى، قوعامدىق كەڭەستىك مۇشەسى الىبەك شاپەنوۆ كومسومولدىڭ بۇرىنعى بەلسەندىلەرىنە، قازىرگى ارداگەرلەرىنە مەدال تاپسىردى. ولاردىڭ ىشىندە ءماجىلىس، سەنات دەپۋتاتتارى دا بار. سونىمەن، ولار كىمدەر؟
- باقىتجان جۇماعۇلوۆ، سەنات دەپۋتاتى؛
- ءبىرعانىم ءايتىموۆا، سەنات دەپۋتاتى؛
- ءالي بەكتايەۆ، ءماجىلىس دەپۋتاتى؛
- قۋانىش سۇلتانوۆ، ءماجىلىس دەپۋتاتى، قازاقستان كومسومولىنىڭ ءبىرىنشى حاتشىسى (1978-81 جىلدار).
- نۇرلان وماروۆ، قازاقستان كومسومولىنىڭ ءبىرىنشى حاتشىسى (1991 ج)، قازاقستان جاستار وداعى رتالىق كوميتەتىنىڭ ءبىرىنشى حاتشاسى (1991-94 جىلدار).
- سابيليا مۇستافينا، قازاقستان كومسومولىنىڭ حاتشىسى، قازاقستان جاستار وداعىنىڭ حاتشىسى (1991-1995 جىلدار).
- راحمان الشانوۆ، تۇران ۋنيۆەرسيتەتىنىڭ رەكتورى، قوعامدىق كەڭەستىك مۇشەسى.
...كومسومولدىڭ مەرەيتويىندا مەدال العان «قايراتكەرلەر»، ماراپاتتارىڭىز قۇتتى بولسىن!
