وسى ۋاقىتقا دەيىن الەمدە ۇزاق ءومىر سۇرەتىندەر جاپوندىقتار بولىپ كەلدى. الداعى ۋاقىتتا بۇل كورسەتكىشتىڭ وزگەرۋى مۇمكىن بە؟ ابدەن مۇمكىن.

اعىلشىننىڭ The Sun باسىلىمىنىڭ زەرتتەۋىنە نازار اۋدارساق،  22 جىلدان كەيىن بۇل ناتيجە وزگەرۋى ىقتيمال. باسىلىمنىڭ جازۋىنا قاراعاندا، 2040 جىلى الەمدەگى ەڭ ۇزاق جاسايتىن حالىق يسپاندىقتار بولىپ ەسەپتەلىنەدى. دەنساۋلىق جاعدايىن باعالاۋ ينستيتۋتىنىڭ زەرتتەۋىنە سەنسەك، يسپاندىقتاردىڭ ورتاشا ءومىر ءسۇرۋ ۇزاقتىعى شامامەن العاندا، سول كەزدە 85،8 جاستى قۇرايتىن بولادى. ءقازىر ءبىرىنشى ورىندا كەلە جاتقان جاپوندار 85، 7 كورسەتكىشپەن ەكىنشى ورىنعا سىرعيدى. ال يسپاندىقتاردىڭ ۇزاق جاساۋىنىڭ سىرى نەدە؟  مامانداردىڭ دالەلىنە سەنسەك، ولار ەت پەن جۇمىرتقانى از جەپ، بولاشاقتا بالىق، جەمىستەر مەن كوكونىستەردى كوپ تۇتىناتىن بولادى.

الەمدە ۇزاق جاساۋ جونىنەن ءۇشىنشى ورىنعا سينگاپۋرلىقتار شىعىپ، ءتورتىنشى ورىن شۆەيساريادا تۇراتىن ۇلتتاردىڭ ەنشىسىنە تيەدى. ونان كەيىنگى ورىنداردى يتاليا، يزرايل، فرانسيا، ليۋكسەمبۋرگ پەن اۆستراليا تۇرعىندارى الادى.

ال قازاقستاندىقتاردىڭ كورسەتكىشى قانداي؟ ءبىزدىڭ ەلدە قازىرگى كەزدە ءومىر ءسۇرۋ ۇزاقتىعى ورتاشا ەسەپپەن العاندا، 72، 4 جاستى قۇراپ وتىر.