چيچيبۋدىڭ تاكاحاشينو تاۋىنىڭ باۋرايىندا داۋلەتى جۇرتتان اسقان باي بولىپتى. سارايىنىڭ اينالاسىنداعى مىڭ ءۇي وعان قىزمەت ەتىپتى. باي كوكتەمدە پاپوروتنيك كەستىرمەك بوپ، بىلاي دەپ بۇيىرادى: مىڭ ءۇيدىڭ بۇكىل ادامى ءبىر كۇن ىشىندە تاكاشينو تاۋىنداعى پاپوروتنيكتىڭ ءبىرىن قالدىرماي وتاپ، مەنىڭ سارايىمنىڭ ماڭىنداعى قورالارعا جيناسىن.
مىڭ ءۇيدىڭ بالا-شاعاسىنان باستاپ قارياسىنا دەيىن تاكاحاشينو تاۋىنا قاپتايدى. باي تاۋدىڭ توبەسىندە تۇرىپ، جۇرتقا ءامىر بەرىپ تۇر:
— تۇگىن قالدىرماي كەسىڭدەر، بىردە-بىر پاپوروتنيك قالماسىن.
كۇن باتقانشا بايدىڭ بۇيرىعىن ورىنداۋ مۇمكىن ەمەس ەدى. تاۋدىڭ ءبىر بەتكەيىنىڭ عانا پاپوروتنيگى كەسىلگەندە كۇن باتىسقا قاراي اۋدى. باي باتىپ بارا جاتقان كۇنگە پاڭدانا قارادى. «ءاي، كۇن! شارۋا بىتپەي جاتىپ، نەگە باتاسىڭ؟ مەنىڭ باتقان كۇندى قايتا شىعارار قۇدىرەتىم بار».
باي جەلپۋىشىن جەلپىپ «ەي، كۇن قايت كەيىن!» دەپ ايعايلادى. بايدىڭ داۋسى بۇكىل تاۋدى جاڭعىرىقتىردى. وسى ساتتە باتىپ بارا جاتقان كۇن اسپانعا قايتا كوتەرىلدى دە، اينالا جاپ-جارىق بولدى. جۇرتتىڭ تاڭدانىسىندا شەك جوق.
— مەنىڭ قۇدىرەتىمە ەشكىم تەڭ كەلمەيدى. قانە، پاپوروتنيكتى تۇگەل وتاپ بىتىرىڭدەر.
جۇرت جاپا-تارماعاي وتالعان پاپوروتنيكتى جيناۋعا كىرىستى. كۇن ساۋلەسى تۇسكەندە تاۋدى جالىن شارپىپ وتكەندەي بولدى.
— پاپوروتنيكتى قوراعا تاسىڭدار، قانە جىلدام!
اعاش ارقالاعان جۇرت بايدىڭ سارايىنا بارا جاتتى. قورا پاپوروتنيككە تولعاندا كۇن دە باتتى. تاۋ توبەسىندەگى باي اسقاقتانا بيلەپ ءجۇر. اسپان قىپ-قىزىل. جۇرت دەمىن ىشىنە تارتى. كوكتەمدە كورىنبەيتىن قىزىل شەگىرتكە تاكاشينو تاۋىنا جوسىپ بارادى. مىڭداعان قىزىل شەگىرتكە...
كەنەت قوراداعى پاپوروتنيكتەر اسپانعا ۇشا باستادى. كۇن ۇياسىنا كىرگەندە تاۋ باسىندا قۇتىرا بيلەگەن باي دا عايىپ بولدى. قورالاردان ۇشقان پاپوروتنيكتەر تاۋعا قايتا تىگىلدى. تاكاشينو تاۋى پاپورتنيك تاۋى رەتىندە بەلگىلى بوپ، چيچيبۋدىڭ حالقىن بۇگىندە اسىراۋدا.
كوكتەمدە تاكاشينو تاۋى قىزىل ارايعا بويالعاندا تاۋدىڭ توبەسىنەن وكىرگەن بايدىڭ داۋسى ەستىلەدى دەسەدى.
جاپون تىلىنەن اۋدارعان شارافات جىلقىبايەۆا
