شەراعاڭسىز وتكەن 40 كۇن...

قازاق قاۋىمى شەراعاڭسىز 40 كۇنىن وتكىزدى. وسى ارالىقتا وزىندىك ءۇنى، مىنەزى، بولمىسى بار اسىل اعامىزدىڭ ورنى ويسىراپ تۇردى. تالاي ارحيۆتىك تەلەتاسپا ماتەريالدارى ەلدىڭ نازارىنا ۇسىنىلدى. سونىڭ بىرىندە جاپ-جاس دەرلىك، جىگەرلى، ايتارى نىق شەراعاڭ ەندى عانا تاۋەلسىزدىك العان ەلىمىزدىڭ ءبىرىنشى باسشىسىنا قاراتىپ ءسوز ايتادى. حالقىمىزعا ادال دا ابىرويلى قىزمەت ەتۋدى شەگەلەپ جەتكىزەدى. 
عاجاپ-اق! 
وكىنىشتىسى، بيلىك تىزگىنىن ۇستاعان كىسى جولىنان جاڭىلدى. شەراعامىز رەنجىدى. ىشتەگى نالاسىن جاسىرا المادى. قاتتى ايتقاندى بيلىكتەگى كىسى دە ۇناتپادى. سول ىقىلاسى ول كىسىمەن قوشتاسقان اقىرعى كۇنى دە انىق اڭعارىلىپ تۇردى... 
قارا جەردىڭ قوينىندا جاتىپ تا، جەر بەتىندەگى ەلدى بىرىكتىرەتىن، ورتاق ماقساتقا جۇمىلدىراتىن رۋحى اسقاق ادامدار بولادى. الاشتىڭ ارىستارى سولاي ەدى. شەراعا، ءسىزدىڭ كەيىپكەرىڭىز - تۇرار رىسقۇلوۆ سولاردىڭ ساناتىنان ەدى. ءسىز دە سولاي ەكەنسىز! 
شەراعا، ءسىز كوز جۇمعالى وزىڭىزگە ارنالعان قانشاما دۇنيەلەر جازىلدى. ءبىر وسالى جوق. تاعى دا جازىلىپ جاتىر. بارىندە ءسىزدىڭ ءور مىنەزىڭىز، ءورشىل كوڭىلىڭىز، ەلگە دەگەندەگى بولەكشە قاسيەتىڭىز بارىنشا اشىلادى. ءسىزدىڭ ەرلىگىڭىزدى ايتادى. ەلباسىنىڭ الدىنداعى ۇستانىمىڭىزدى ۇلگى ەتەدى، ماقتايدى. شىركىن-اي، قولىندا بيلىگى بار، قاسيەتتى قالام ۇستاعان ازاماتتاردىڭ ءبارى بولماسا دا، اراسىندا دارالانعاندار بولسا، كانە! قۋعىن-سۇرگىن جالعاسۋدا. جەر ءۇشىن كۇرەس ءجۇرىپ جاتىر. قولدان جيھادشى، تەررورشى جاسالۋدا. ءبارى ءبىزدىڭ قانداستارىمىز. قازاق جەرىن قىلمىسكەرلەر جاۋلاپ العان سەكىلدى. تۇرمە تولى – قازاقتار. سولاردىڭ 65-70 پايىزى ەل قورعايتىن، ۇرپاق وربىتەتىن قىز-جىگىتتەر، ولاردى قاماپ ۇستاۋدىڭ ءوزى - كۇنا. بار ءمىن مەملەكەت تىزگىنىن ۇستاعان بيلىكتە. ەكى قولدارىنا ءبىر كۇرەك تابىلسا، سويتەر مە ەدى، شەراعا؟.. 
ءسىز قاسيەتتى جەر قوينىندا جاتىپ تا ارتىڭىزدا قالعان قازاعىڭىزدى ويلايسىز. مەيمىلدەگەن بايلىقتىڭ ۇستىندە تەربەلىپ وتىرۋدىڭ ورنىنا، بۇل قازاعىڭىز، قازاعىڭىزدىڭ ۇل-قىزدارى تەنتىرەپ ءجۇر، شەراعا... 
قاشانعا دەيىن كۇيزەلەر ەكەنبىز؟ 
ءسىز جاراتۋشى يەمىزگە ءبىر تابان جاقىنسىز. پاتشامىزدىڭ الدىندا يمەنبەي ايتقان ءسوزىڭىزدى، وتىنىش-تىلەگىڭىزدى، مۇڭىڭىزدى جەتكىزىڭىزشى. ءسىز ۇلى قازاقتىڭ ادال ۇلى بولدىڭىز. اسىپ-تاسقان قانداستارىڭىزدى بىلمەيمىن، ەلىم، جەرىم، تۋعان ءتىلىم دەيتىن باۋىرلارىڭىزدىڭ ءبارى ءسىزدى جاقسى كورەدى، قالدىرعان رۋحاني مۇراڭىزدى وقيدى، ماقتان ەتەدى. ءوزىڭىزسىز ارادا وتكەن كۇندەر مەن تۇندەر مەنى وسىلاي تەربەپ وتىر، شەراعا! 
پەيىشتىڭ شۋاعىنا بولەنىپ، تورىنەن تابىلىڭىز، شەراعا!!!

تالعات ايتباي. فەيسبۋكتەگى پاراقشاسىنان