الەمدەگى ەڭ مىقتى قىلمىستىق توپتىڭ باسشىسى، ەسىركى بارونى ەكتور بەلتران لەيۆا قايتىس بولدى. بۇل تۋرالى مەكسيكا ىشكى ىستەر مينيسترلىگىنىڭ باسپا ءسوز حاتشىسى ءمالىم ەتتى.

جەكسەنبى كۇنى اقش-تاعى «التيپلانو» تۇرمەسىنەن  جەدەل-جاردەم ارقىلى جەرگىلىكتى اۋرۋحانا جەتكىزىلگەن ول جۇرەك تالماسىنان قايتىس بولدى. ءسويتىپ، ۇزاق ۋاقىت بويى لاتىن امەريكاسى اۋماعىنداعى ەلدەر مەن امەريكا قۇرلىعىن شۋلاتقان ەسىرتكى مافياسىنىڭ سەركەسى ومىردەن ءوتتى.  

اتاقتى ەسىرتكى بارونى بەلتران لەيۆا 2014 جىلى ۇستالعانىمەن، ونى مەكسيكانىڭ سىرتقى ىستەر مينيسترلىگى اقش-تىڭ قۇقىق قورعاۋ ورگاندارىنا تاپسىرعانى  بەلگىلى. «ەسىرتكى ساۋداسىنا قاتىسى بار» دەلىنىپ،  امەريكا اباقتاسىندا جازاسىن وتەپ جاتقان 56 جاستاعى ازاماتتى دارىگەرلەر الايدا قۇتقارىپ قالا المادى.

كەزىندە «قورتىق» دەگەن لاقاپ ەسىممەن  مۇقىم دۇنيەگە اتى ءمالىم بولعان حواكين گۋسمان لوەرانىڭ بانداسىندا جۇمىس ىستەگەن بەس اعايىندى جىگىتتەر الفرەدو، ەكتور، ارتۋرو، ماريو جانە  كارلوس ارتىنان جاسىرىن بولەك ۇيىم قۇرادى. 2009 جىلى قىلمىس الەمىندە اتى شىققان اعايىندىلارعا مەكسيكا اۋماعىندا ەشكىم بەتپە - بەت كەلە المايتىن. 2009 جىلدىڭ اياعىندا مەكسيكانىڭ كۋەرناۆاكا قالاسىنداعى تەڭىز پورتىنداعى اتىس كەزىندە  بانديتتىك توپتىڭ باسشىسى ارتۋرو بەلتران لەيۆا قايتىس بولادى.  اعايىندى جىگىتتىڭ تاعى بىرەۋى ۇستالىپ، اباقتىعا قامالادى.

قۇقىق قورعاۋ ورگاندارىنا بانديتتىك توپتىڭ باسشىسىن ۇستاۋ وتە قيىنعا سوقتى. مەكسيكا اۋماعىندا جاسىرىن جاعدايدا ارتۋرو لەيۆانىڭ 49 مىڭ جالدامالى جەندەتى جاسىرىن جاعدايدا جۇمىس ىستەدى. ارتۋرو لەيۆا الەمدەگى  ەڭ ءقاۋىپتى 24 قىلمىستىق  توپتىڭ باسىندا تۇردى. مەكسيكا بيلىگى ونىڭ باسىنا  2،1 ميلليون دوللار اقشا تىكتى. ارتۋرو لەيۆانىڭ ءۇيىن 200 سولدات قورشاپ، اتىس كەزىندە ول وققا ۇشتى.

مۇنان كەيىن قىلمىستىق توپتىڭ باسىنا جەكسەنبى كۇنى جۇرەك تالماسىنان قايتىس بولعان ەكتور بەلتران لەيۆا كەلدى.  ول اسقان قاتىگەزدىگىمەن كوزگە ءتۇستى. كەدەرگى جاساعان ادامداردىڭ بارلىعىن ونىڭ جەندەتتەرى اتىپ كەتەتىن. سوندىقتان ونىڭ توبىمەن ىلىنىسۋگە ەشكىمنىڭ جۇرەگى داۋالامادى.  

ەكتور بەلتران لەيۆا وڭتۇستىك جانە ورتالىق امەريكادان اقش-قا گەروين،  كوكاين، ماريحۋانا جانە مەتامفەتامين جانە تاعى باسقا ەسىرتكى زاتتارىن تاسىدى، ونى قايتادان ەۋروپا قۇرلىعىنا جەتكىزۋمەن اينالىستى. ۇزاق ۋاقىت بويى ونىڭ قايدا ەكەنىن ەشكىم بىلمەدى. ءبىراق ەۋروپا مەن امەريكا قۇرلىعىندا بەلتران لەيۆانىڭ «كولەڭكەلى بيزنەسى» بۇرىن-سوڭدى بولماعان دەڭگەيدە وركەن جايدى. امەريكانىڭ باس پروكۋرورى تاراپىنان وعان   29 ايىپ تاعىلدى جانە قاماۋعا الۋ تۋرالى ءۇش رەت وردەر بەرىلدى. اقش مەملەكەتتىك دەپارتامەنتى ونى ۇستاپ بەرگەن ادامعا 5 ميلليون دوللار بەرۋگە ۋادە ەتتى.

اقىرى ول مەكسيكاداعى مەيمانحانالاردىڭ بىرىندە تاماق ءىشىپ وتىرعان جەرىنەن ۇستالىپ، اقش-تىڭ قۇىق قورعاۋ ورگاندارىنا بەرىلدى. ەندى مىنە ەسىرتكى بارونى اۋرۋحاناعا جەتپەي ومىردەن ءوتتى. الايدا ونىڭ بانداسى الەمدە ءالى جۇمىس ىستەپ جاتىر.