الداعى 7 جىلدا سامات سماقوۆ «اقتوبە» فۋتبول كلۋبىنىڭ قوجايىنى اتاناتىن بولدى.  

«قازاقستان ۇكىمەتىنىڭ 2015 جىلعى 30 جەلتوقسانداعى №1141 قاۋلىسىنا سايكەس، 2016-2020 جىلدارعا ارنالعان جەكەشەلەندىرۋدىڭ كەشەندى جوسپارى بەكىتىلدى. اقتوبە وبلىسى بويىنشا جەكەشەلەندىرۋ نىساندارىنىڭ تىزىمىنە توعىز كوممۋنالدىق-جەكەمەنشىك نىسانى كىردى. ونىڭ ىشىندە «اقتوبە» فۋتبول كلۋبى دا بار. «اقتوبە» فۋتبول كلۋبىنىڭ ەلەكتروندى ساۋداسى ءۇش رەت وتكىزىلدى. 2018 جىلى 20 قاراشادا وتكەن ساۋدا-ساتتىقتىڭ ناتيجەسى بويىنشا سامات كابير ۇلى سماقوۆ جەڭىمپاز اتاندى. ول ءۇشىنشى ساۋدا- ساتتىقتىڭ جالعىز قاتىسۋشىسى بولدى». بۇل تۋرالى وبلىس اكىمىنىڭ باسپا ءسوز قىزمەتى ءمالىم ەتتى

كلۋب 108 ميلليون تەڭگەگە سەنىمگەرلىك باسقارۋعا بەرىلدى. باستاپقى قۇنى 100 ميلليون تەڭگە بولاتىن. كەلىسىم بويىنشا پرەمەر-ليگانىڭ كلۋبتارىنا قويىلاتىن رەگلامەنتتەرگە سايكەس، كلۋبتىڭ بارلىق قاجەتتى جارىستار مەن سايىستارعا قاتىسۋىن قامتاماسىز ەتۋ (ق ر چەمپيوناتى، ق ر كۋبوگىنىڭ ويىندارى، پرەمەر-ليگا كلۋبتارى قوسالقى قۇرامدارىنىڭ ءتۋرنيرى، پفل كۋبوگى، پرەمەر-ليگا كلۋبتارىنىڭ جاسوسپىرىمدەر مەن جاستار كوماندالارى، ءبىرىنشى ليگا جانە ميني فۋتبول كومانداسى اراسىنداعى ق ر بىرىنشىلىگى)، سونىمەن قاتار، ۋەفا سايىسىنا قاتىسۋ تۋرالى قۇقىعىن العان جاعدايدا جارىسقا بارۋ مىندەتتەلەدى.

ەرەجەگە سايكەس، قازىرگى كادردىڭ 75 پايىزىن ساقتاپ، عيماراتقا جوندەۋ جۇمىستارىن جۇرگىزۋ قاجەت. كرەديتورلىق بەرەشەكتەردى وتەۋ، كرەديتورلىق جانە دەبيتورلىق بەرەشەكتىڭ نەگىزسىز قالىپتاسۋىنا جول بەرمەۋ، نىساندى كرەديتورلىق جانە دەبيتورلىق بەرەشەكتەرىمەن قابىلداۋ، بالالار، ونىڭ ىشىندە اقتوبە وبلىسىنىڭ اۋداندارىندا بالالار فۋتبولىن دامىتۋ تالابى قويىلدى.