ادامزات ومىرىنە ەلەۋلى اسەر ەتكەن جاڭالىقتار ۇلى دالا كەڭىستىگىندە كوپتەپ كەزدەسەدى. ەلباسىنىڭ «ۇلى دالانىڭ جەتى قىرى» اتتى ماقالاسىنا وراي پارلامەنت ءماجىلىسىنىڭ دەپۋتاتى ازات پەرۋاشيەۆ وسىلاي پىكىر ءبىلدىردى.
«بۇل ماقالا ۇلتتىق ۇستانىمعا ءارى ساناعا قاتىستى تىڭ سەرپىن بەرەتىن مىندەتتەردى قامتىپ وتىر. وكىنىشكە قاراي، ءبىراز بۋىندار بويى ءبىز ءوزىمىزدىڭ تاريحىمىزدى، وتكەن عاسىرلاردى تەك قايعىلى جاعىنان عانا ەستە ساقتاپ، وسىنداي كوزقاراستى قالىپتاستىردىق. بۇعان قاتىستى تاريحي سەبەپتەر دە از ەمەس. وسى ورايدا حالقىمىز اشارشىلىق، ساياسي قۋعىن-سۇرگىن، سوعىس اۋىرتپالىعى سەكىلدى ناۋبەتتى كەزەڭدەردى باسىنان وتكەردى. ەلباسى ماقالاسىندا بىزگە تاريحي پوزيتيۆيزمگە جول كورسەتىپ وتىر، ياعني اتا-بابالارىمىز ادامزاتتىڭ دامۋىنا ەلەۋلى ىقپال ەتكەندىگىنە نازار اۋداردى»، - دەپ توقتالدى دەپۋتات.
بۇل تۇرعىدا ا. پەرۋاشيەۆ اتقا ءمىنۋ مادەنيەتى مەن جىلقى شارۋاشىلىعىنىڭ دامۋىنا قاتىستى ءبىزدىڭ ءوڭىردىڭ جەتىستىگى وراسان زور ەكەنىن اتاپ ءوتتى.
«پرەزيدەنت ماقالاسىندا بۇل تاقىرىپقا ەگجەي-تەگجەيلى توقتالىپ ءوتتى. نەگىزى، جىلقى شارۋاشىلىعىنا قاتىستى ءبىزدىڭ بابالارىمىز تاريحي ماڭىزدىلىعى بار جاڭالىقتى اشتى»، - دەدى ول.
دەپۋتاتتىڭ پايىمىنشا، بۇگىندە جاس بۋىننىڭ باتىس وركەنيەتىنە ەلىكتەۋى ءجيى كەزدەسەدى. سايكەسىنشە، وسى دامىعان ەلدەردە قالىپتاسقان ادىستەمەلەرگە ۇيرەتۋ ءۇردىسى قالىپتاستى.
«بۇل دا دۇرىس شىعار، ءبىراق ادامزات ومىرىنە ەلەۋلى اسەر ەتكەن جاڭالىقتار ۇلى دالا كەڭىستىگىندە دە كوپتەپ كەزدەسەدى. سوندىقتان مەملەكەت باسشىسى تەرەڭدە جاتقان تاريحىمىزدا ەلدىڭ ەڭسەسىن كوتەرەتىن فاكتىلەر از ەمەس ەكەنىنە ەكپىن قويىپ وتىر. سەبەبى ءبىزدىڭ ءوڭىر جاڭا تەحنولوگيالاردى شىعارۋعا ۇلەس قوسقان. سوندىقتان ءبىزدىڭ جاس بۋىننىڭ قانىندا يننوۆاسياعا، جاڭالىقتارعا قابىلەتى بار ەكەنىن كەڭىنەن ايتۋىمىز كەرەك. بۇگىندە ءبىزدىڭ جاس عالىمداردىڭ اشقان جاڭالىقتارى دامىعان ەلدەردەگى ۇردىستەن ەش كەم ەمەس»، - دەدى ازات پەرۋاشيەۆ.
پىكىر قالدىرۋ