نۇرسۇلتان نازاربايەۆ پارلامەنت ءماجىلىسىنىڭ دەپۋتاتى، «اق جول» دەموكراتيالىق پارتياسى فراكسياسىنىڭ جەتەكشىسى ازات پەرۋاشيەۆتى قابىلدادى.

پارتيا ءتوراعاسى كەزدەسۋ بارىسىندا مەملەكەت باسشىسىنا «اق جول» قدپ مەن ونىڭ پارلامەنت ماجىلىسىندەگى فراكسياسىنىڭ جۇمىسى جونىندە مالىمەت بەردى.

پرەزيدەنت «اق جول» دەموكراتيالىق پارتياسىنىڭ مەملەكەتتىك ساياساتتى جۇزەگە اسىرىپ، ونىڭ نەگىزگى باسىمدىقتارىن حالىققا ءتۇسىندىرۋ ىسىندەگى ءرولىن ايرىقشا اتاپ ءوتتى.

- ءسىز ەلىمىزدەگى تاجىريبەلى پارلامەنت دەپۋتاتتارىنىڭ ءبىرى رەتىندە ۇزاق جىلداردان بەرى «اق جول» پارتياسىنا باسشىلىق ەتىپ كەلەسىز. پارتيالارىڭىز ناقتى جۇمىستار اتقارۋدا. مەملەكەتتىڭ جۇرگىزىپ جاتقان ساياساتىنا قولداۋ ءبىلدىرىپ، حالىق بىرلىگىن نىعايتۋ جولىندا زور ۇلەس قوسىپ كەلەسىزدەر، - دەدى ەلباسى.

ا.پەرۋاشيەۆ پارتيا فراكسياسىنىڭ بيىلعى جولداۋدىڭ نەگىزگى باعىتتارىن ورىنداۋ، سونىڭ ىشىندە «بيزنەستىڭ جول كارتاسى-2020»، «يندۋستريالىق-يننوۆاسيالىق دامۋ» باعدارلامالارىن ودان ءارى جۇزەگە اسىرۋعا جانە وتاندىق بيزنەستى قولداۋ ماقساتىمەن قابىلداناتىن شارالارعا قاتىستى ۇسىنىستار ەنگىزۋ جونىندەگى جۇمىستارىن ايتىپ ءوتتى.