كەشە ەلىمىزدىڭ عاشىقتارى قوزى كورپەش-بايان سۇلۋ كۇنىن اتاپ ءوتتى. 2011 جىلى الماتى قالاسى اكىمدىگىنىڭ جاستار ساياساتى باسقارماسى 15 ءساۋىردى وسىنداي اتاۋلى كۇن دەپ بەلگىلەگەن بولاتىن.
سودان بەرى قازاق جاستارى بىرتىندەپ اۋليە ۆالەنتين كۇنىنەن باس تارتىپ، ۇلتتىق مەرەكەنى ۇلىقتاي باستادى دەپ حابارلايدى جەتىنشى ارنا.
الەۋمەتتىك جەلىدەگى جۇرت ادەتتەگىدەي ەمەس، مەرەكەلىك كۇيمەن ويانعان. سەبەبى عالامتور بەتىن قوزى مەن باياننىڭ، قىز جىبەك پەن تولەگەننىڭ، بۇگىنگى عاشىقتاردىڭ سۋرەتتەرى مەن قۇتتىقتاۋلار تورلادى.
اعا بۋىن، جاستاردىڭ اۋليە ۆالەنتيننەن اۋلاق كەتكەنىنە قۋاندى. ال الماتىدا عاشىقتارعا ارنالعان سۋ بۇرقاق اشىلدى. ءدال وسى ساتتە ۇلتتىق دەگەن مەرەكەگە قۋانعان جاستاردىڭ كوڭىلىنە كىربىڭ ءتۇستى.
ويتكەنى سۋبۇرقاقتىڭ ورتاسىنداعى ساۋكەلە كيگەن قازاقتىڭ قىزى بايان دا ەمەس، جىبەك تە ەمەس، قاي ەرتەگىدەن شىققانى بەلگىسىز سۋ پەرىسى بولىپ شىقتى.
بايان ەسەنتايەۆا Instagram-داعى پاراقشاسىنا سۋ بۇرقاقتىڭ اشىلۋ سالتاناتىنان ارنايى ۆيدەو سالعان بولاتىن. ءوز كەزەگىندە بۇل بەينەگە قاتىستى ۇلتجاندى جاستار رەنىشكە تولى پىكىرلەر جازدى.
“كوزىمە سەنە الار ەمەسپىن، ساۋكەلە قايدا، رۋسالكا قايدا؟ قوزى مەن باياننىڭ وعان قاتىسى قانشا؟”، “قازاقتىڭ ەرتەگىلەرىندە سۋ پەرىلەرى بار دەلىك. ءبىراق ولار ماحاببات سيمۆولى ەمەس، كەرىسىنشە، ادامداردى ازعىراتىن جاعىمسىز كەيىپكەر ەدى عوي”، – دەگەن پىكىرلەر كوبەيە باستاعان.
ودان بولەك، تانىمال ءانشى ساكەن مايعازييەۆ تە اتالعان ەسكەرتكىشى كوڭىلى تولمايتىنىن جەتكىزدى.
“بوياۋشى، بوياۋشى دەگەن سايىن ساقالىنا دەيىن بوياپ تاستاپتى…”- كەرى كەلىپتى. مىناۋ نە “فانتازياسى”، تاعى؟! الماتىنىڭ كورنەكتى ورىندارىنىڭ بىرىنە ورناتقان بايان-سۇلۋ ەسكەرتكىشى-مىس. ساۋكەلە كيىپ، كىندىگىن اشقان سۋ پەرىسى. سۇمدىق-اي!”، – دەپ جازادى ءانشى ءوز پاراقشاسىندا.
