ەلىمىز كسرو يمپەرياسىنان بوساپ، ءوز الدىنا جەكە ەل بولىپ، تاۋەلسىزدىك العان كۇننەن بەرى، وشكەنىمىز جانىپ، ولگەنىمىز  ءتىرىلىپ، وسىلايشا قايتا تۇلەپ، ءوز قولىمىز  ءوز اۋزىمىزعا جەتىپ،  ءوز تاريحىمىز بەن  تاريحتى جاساۋشى،  تاريحي  تۇلعالارىمىزدى  ەسكە  الىپ،  ولار  تۋرالى  ايتۋعا  تىڭ تاريحي مۇمكىندىك تۋدى. تاۋەلسىزدىك العان العاشقى جىلدارى 1995 جىل يۋنەسكو كولەمىندە اباي بابامىزدىڭ 150 جىلدىعى، 1996 جىل ەل ىشىندە جامبىل اتامىزدىڭ 150 جىلدىعى، 1997 ج  مۇحتار اۋەزوۆتىڭ  100 جىلدىعى اتالىپ ءوتىلدى. وسىلايشا تاۋەلسىز قازاق حالقىنىڭ ءار جىلى، ءار ءتۇرلى تاريحي تۇلعالار  مەرەيتويلارىنا  ارنالعان  تورقالى جىلدار بولىپ كەلەدى.                                

بيىلعى 2018 جىلدا  وسىنداي  مەرەيتويلارعا  تولى جىل. سەمەي قالاسىنىڭ  300  جىلدىعى. شەكەرىم  قۇدايبەردى ۇلىنىڭ  تۋعانىنا 160 جىل، احمەت بايتۇرسىنوۆتىڭ 145 جىلدىعى، امىرە قاشاۋبايەۆتىڭ 130 جىلدىعى  جانە ت.ب مەرەيتويلارمەن  قاتار  رەسپۋبليكا  بويىنشا  بارلىق اۋدانداردىڭ  قۇرىلعانىنا  90 جىل. سونىمەن بىرگە  بيىل  قازاقستاننىڭ   حالىق قاھارمانى، حالىقارالىق فادەيەۆ اتىنداعى سىيلىقتىڭ  لاۋرەاتى، ايگىلى پارتيزان، كورنەكتى جازۋشى  II – دجس تىڭ ەرجۇرەك باتىرى، كوزى تىرىسىندە اتى اڭىزعا اينالعان حالقىمىزدىڭ قايتالانباس ءبىرتۋار پەرزەنتى قاسىم قايسەنوۆتىڭ تۋعانىنا 100 جىل.

وسى ماقالانى  جازۋداعى ماقساتىم قاسىم اتامىزدىڭ، ءبىزدىڭ  اقجار اۋىلىندا  بىرنەشە  رەت  بولعاندىعى تۋرالى.  قاسىم اتامىز العاش رەت، 1968 جىلى  اۋىلىمىزدىڭ  ارداگەرى،  ايگىلى  پارتيزان شاپاتوۆ ماناپ اتانىڭ شاڭىراعىندا بولدى. ماناپ اتا  II – دجس تىڭ باتىس مايدانىندا، بەلارۋسسيا جەرىندەگى گومەل  وبلىسىن ازات ەتۋگە قاتىسقان  پارتيزان وتريادىنىڭ  بەلدى  مۇشەسى بولعان . ماناپ اتانىڭ جولداسى دارابايەۆا قانيپا اپامىز قاسىم  اتامىزدىڭ  جەرلەسى  بىرگە وقىعان سىنىپتاسى بولعان ەكەن. قاھارمان  اتامىزدىڭ  ماناپ اتانىڭ ۇيىندە بولعاندىعىن بۇگىندە اۋىل اقساقالدارى اڭىز ەتىپ ايتادى.

ەكىنشى رەت قاسىم اتا 1991 جىل، حالقىمىزدىڭ باتىرلار ويانعان جىلى اۋىلىمىزدا  وتكەن ۇلكەن مەرەيتوي، قاراكەرەي قابانباي باتىردىڭ  300 جىلدىعىنا كەلدى. ال ءۇشىنشى رەت باتىر اتامىز 1999 جىلى پارلامەنت ءماجىلىسىنىڭ سايلاۋى ناۋقانىندا، ءماجىلىس دەپۋتاتتىعىنا ۇمىتكەر، بەلگىلى  اقىن  بۇگىندە قازاقستان  جازۋشىلار  وداعىنىڭ  ءتوراعاسى  ۇلىقبەك  ەسداۋلەت اعامىزعا وبلىستىق  سەنىمدى وكىل رەتىندە كەلگەن. اۋىلىمىزداعى كيەلى قارا شاڭىراق  اباي اتىنداعى ورتا مەكتەپتە، مەكتەپ ۇجىمى مەن كەزدەسۋ وتكىزگەن.

قاسىم اتامىزدىڭ وسى اباي مەكتەبىنە كەلۋى ۇلكەن تاريحي وقيعا رەتىندە قالدى .  پارتيزان ارداگەر اتامىز، ۇجىم مەن كەزدەسۋدە بولعاندا : « مەن سوعىستىڭ   الدىندا  1938 ج  وسى مەكتەپتە ديرەكتور بولعانمىن» ، - دەپ ايتقان ەكەن.

وسى جايتقا وراي ءبىزدىڭ  ماقساتىمىز،  اتامىز ايتقان دەرەكتى ارحيفتەن ىزدەستىرىپ تابۋ  جانە  دەمەۋشىلەر ۇيىمداستىرىپ،  مەكتەبىمىزدە  قاسىم اتا اتىندا ءپان بولمەسىن جابدىقتاۋ .

الاپات قان مايداننىڭ قاھارمانى، قايسار تۇلعا قاسىم اتامىزدى ەسكە الىپ، ول كىسىنىڭ اۋىلىمىزدا بىرنەشە رەت بولعاندىعى تۋرالى ايتقاندا،  اتامىزدى مەن ءوز كوزىممەن كورگەن كەز ەسىمە تۇسەدى. بۇل ءمۇعالىم قىزمەتىن ەندى عانا باستاعان العاشقى جىلىم بولاتىن. 2001 جىلى شىلدە ايىندا اقسۋات اۋىلىندا قاراكەرەي  قابانباي باتىردىڭ  310 جىلدىق مەرەيتويىنا ارنالعان  اۋداندىق  كونفەرەنسيانىڭ   ەرەجە تالابىنان  ءوتىپ، وسى جيىنعا قاتىستىم. مادەنيەت ءۇيىنىڭ  كورەرمەن زالى  سالتاناتتى  تۇردە بەزەندىرىلىپ، كوتەرىڭكى مۋزىكا ويناپ، كونفەرەنسيا باستالعان ساتتە، اۋدان اكىمى بۇگىنگى ءبىزدىڭ قۇرمەتتى قوناعىمىز  قاسىم اتامىزعا ءسوز بەرەيىك دەگەندە، اق سامايلى، ۇلكەن كوزدى، سوم دەنەلى  كىسىنىڭ، مىنبەگە كەلىپ، كوپشىلىكپەن امانداسا كەلە، قابانباي  باتىر جايىندا   داۋىستاپ ايتقان قاتتى داۋىسى  مەن جالىندى سوزدەرى  بۇكىل زالدى  جاڭعىرتىپ  جىبەردى. زالدا وتىرعان جۇزدەن اسا كورەرمەن تىم تىرىس بولىپ، بارلىعى باتىر اتانىڭ  ەرەكشە كەلبەتى  مەن  ءبىتىم  بولمىسىنا  تامساندى.  مىنە بۇل   قاھارمان  قاسىم قايسەنوۆ  اتامىز بولاتىن. بيىل ەلىمىزدىڭ ءار جەرىندە قاسىم اتامىزدىڭ 100 جىلدىعى اتالىپ  ول كىسىنىڭ ەرەن ەرلىكتەرى تۋرالى  ايتىلعاندا، ەسىمە وسى جايتتار تۇسەدى.

بۇل سۋرەت  1968 جىلى مامىردا  اقجار اۋىلى  شاپاتوۆ ماناپ اتا ۇيىنە قاسىم   اتامىزدىڭ  كەلۋى. وڭنان سولعا قاراي :    شاپاتوۆ  ماناپ اتا،  دارابايەۆا قانيپا  اپا،  قاسىم اتا.

1999 جىل   اقجار اۋىلى   قاسىم  اتامىزدىڭ  پارلامەنت ءماجىلىسى دەپۋتتاتىعىنا سايلاۋعا ءتۇسۋشى   ۇلىقبەك  ەسداۋلەت  اعامىزعا  وبلىستىق  سەنىمدى  وكىل  بولىپ  كەلۋى  . ارىمبەك ماسالوۆتىڭ    شاڭىراعىندا.  

سۋرەتتە :    ورتادا وتىرعان قاسىم اتامىز .  وڭنان  سولعا  قاراي  تۇرعاندار :  ەكىنشى   اقىن  ۇلىقبەك ەسداۋلەتوۆ ،   ءۇشىنشى  ءشارىپحان حالىقوۆ  -  اقجار اۋىلى اكىمى،  بەسىنشى  سەرىك تىنىبايەۆ  - اۋداندىق  تارباعاتاي  نۇرى  گازەتىنىڭ رەداكتورى، التىنشى  اقىن ، اۋداندىق سەنىمدى  وكىل  ارىمبەك ماسالوۆ.

شقو تارباعاتاي اۋدانى  
اقجار اۋىلى   اباي اتىنداعى  
ورتا  مەكتەپتەگى تاريح ءپانىنىڭ ءمۇعالىمى 
قابيدولدين   قۋانىش  تىلەۋحان ۇلى