بۇگىن الماتىدا، رىسقۇلوۆ پەن ساين كوشەلەرىنىڭ قيىلىسىندا وپىرىلىپ تۇسكەن، قۇرىلىسى ءالى اياقتالماعان كوپىر وسىعان دەيىن بىرنەشە مارتە تراگەديالىق وقيعالاردىڭ ورتاسىندا بولعان.

2014 جىلدىڭ قاڭتارىندا الدە ءبىر قۇرىلىس قىزمەتكەرى «قازپرومترانسپروەكت» كومپانياسى ازىرلەگەن كوپىردىڭ نەگىزگى ينجينەرلىك پلان-سحەماسىن تاكسيدە جوعالتىپ العان ەدى.

ال وتكەن جىلدىڭ ءساۋىر ايىندا ءدال وسى قۇرىلىس الاڭىندا 26 جاسار جىگىت توپىراق استىندا قالىپ، كوز جۇمعان بولاتىن. كەيىن انىقتالعانداي، قازا تاپقان جىگىت «الماتىتەحنوسەرۆيس LTD» مەردىگەر كومپانيانىڭ جۇمىسشىسى بولعان.

ەندى، مىنە ايقاي-شۋى كوپ كوپىر قاڭقاسىنىڭ ءوزى بەل ورتاسىنان وپىرىلىپ ءتۇستى.

بەلگىلى بولعانداي وقيعا كەزىندە قۇرىلىس نىسانىندا 55 ادامدىق بريگادا جۇمىس جاساپ جاتقان. باستاپقىدا 8 ادام جارالانىپ، تاعى 2 ادام ءۇيىندى استىندا قالدى دەگەن اقپارات ايتىلعان. كەيىن، كوپىر قيراعان ۋاقىتتا جاراقات العانداردىڭ سانى 20-عا ارتقان. ازىرگە، زارداپ شەككەندەر مەن قيراندى استىندا قالعاندار تۋرالى ناقتى دەرەكتەر كەلتىرىلمەگەن. ال قۇتقارۋشىلار قيراندى استىندا قالعانداردى ارنايى ىزكەسۋشى يتتەر ارقىلى ىزدەستىرۋدە.

سونداي-اق، بەلگىلى بولعانى قۇرىسقا تاپسىرىس بەرۋشى جانە جاۋاپتى - الماتى قالالىق اكىمشىلى مەن بۇرىنعى  ترانسپورت جانە كوممۋنيكاسيا، قازىرگى ق ر ينۆەستيسيا جانە دامۋ مينيسترلىگى بولعان. قۇرىلىس نىسانى رەسپۋبليكالىق بيۋدجەتتەن ترانسفەرلىك جولمەن قارجىلاندىرىپ وتىرعان جانە ونى ق ر قارجى مينيسترلىگى باقىلاۋدا ۇستاعان. اتالمىش اينالما كوپىردىڭ قۇرىلىسىنا بولىنگەن قارجى باستاپقىدا 10،5 ملرد. تەڭگەنى قۇراعان. جوسپار بويىنشا كوپىر 2018 جىلى پايدالانۋعا بەرىلۋى ءتيىس بولعان. ال قۇرىلىسقا جاۋاپتى قازىرگى مەردىگەر كومپانيا - «بازيس ا».

كەيبىر ساراپشىلاردىڭ پىكىرىنشە، كوپىر قۇرىلىسىنداعى اپات - ۇيىمداستىرۋشىلاردىڭ قاتەلىگىنەن بولىپ وتىر. قۇرىلىستىڭ جوعارعى بولىگىندە اۋىر تەحنيكالار مەن مولشەرلەنگەن سالماقتان بىرنەشە ەسە اۋىر ماتەريالدار توسەلگەن. سونداي-اق، جوعارعى بولىككە شىعارىلاتىن بەتوندى قالىپتى جاعدايدا كەزەڭ-كەزەڭگە ءبولىپ قۇيۋى كەرەك. ياعني، الدىمەن ءبىر بولىگىن، سوسىن ەكىنشى بولىگىن قۇيىپ، ورتاسىنداعى شەلدى (بوس جەردى) ارنايى بىرىكتىرۋشى ماتەريال ارقىلى جالعانۋى ءتيىس بولعان. ال الەۋمەتتىك جەلىلەرگە تارالعان بەينە-روليكتەر مەن سۋرەتتەردە قۇرىلىس الاڭىندا ارماتۋرالار مەن كوتەرۋشى تەمىرلەر بوس جاتقان. قۇرىلىستىڭ جوعارعى بولىگىندەگى سالماقتىڭ تىم اۋىرلىعىنان تومەنگى بولىك (تىرەۋشى تەمىرلەر) وپىرىلعان.

سونىمەن قاتار، الەۋمەتتىك جەلىلەردە كوپىردىڭ قۇلاۋىنا قاتىستى تاعى ءبىر بەيرەسمي بولجام ايتىلۋدا. وندا، بەتون ارالاستىرۋشى جۇك كولىگى كەلىپ، قۇرىلىستىڭ قاڭقاسىنا سوعىلعان. سالدارىنان كوپىر ورتاسىنا تۇسكەن. الايدا، اينالما كوپىردىڭ قيراۋىنا قاتىستى رەسمي ورىندار ءالى ناقتى دەرەكتەر ايتپاعان.

ءقازىر وقيعا ورنىندا ارنايى قۇتقارۋ قىزمەتى مەن بىرنەشە جەدەل-جاردەم قىزمەتكەرلەرى ۇزدىكسىز جۇمىس ىستەۋدە.

نۇرزات توعجان