نۇرسۇلتان ءابىش ۇلى!

سايلاۋ ءبىتتى. تاققا تاعى دا وتىردىڭىز.

ەندىگى جەردە ءوزىڭىز ايتقان رەفورمالاردى دەرەۋ قولعا الىڭىز! اسىرەسە، ساياسي رەفورما، زاڭدار مەن اتا زاڭعا وزگەرتۋ سەكىلدى ماڭىزدى شارۋالارعا باسا كوڭىل ءبولىڭىز. قوعامدا قالىپتاسقان پىكىر-ويدى الۋاندىعىن ەسكەرىپ، مەيلىنشە كەڭ قامتىڭىز، ويتكەنى وسى جىلدار ىشىندە ءوزىن نە بيلىكتە، نە وپپوزيسيادا كورگىسى كەلمەيتىن جاڭا كۇشتەر مەن تۇلعالار قالىپتاسىپ قالدى.

ساياسي ولىمدەردىڭ شىندىعىن اشۋ، تاۋەلسىز ب ا ق قۋدالاۋدى دوعارۋ سەكىلدى شارۋالار كەزەك كۇتتىرمەيتىنى انىق.

وسى جىلدارى ماڭايىڭىز وركەنيەتتى دە زاڭ اياسىندا قىزمەت جاساي الاتىن ساياسي وپپوزيسيانىڭ بىت-شىتىن شىعاردى: ءبىرىن قۋدالادى، ءبىرىن - وزىنە بەيىم قىلىپ الدى. ول پارتيالارعا ەل سەنبەيدى. ال رەسمي وپپوزيسيا بولماعان سوڭ، بيلىككە سىن ايتۋشىلار بەيرەسمي، زاڭنان تىس الاڭعا شىعىپ كەتىپ جاتىر. ول بولسا، ەكسترەميزم مەن تەرروريزم، راديكاليزم مەن بىتىسپەۋشىلىككە ۇلاسۋدا! سوندىقتان دا بىزگە جاساندى ەمەس، شىنايى، وكىمەتكە بالاما ۇسىنىس ايتا الاتىن، ەڭ باستىسى، ەل تاۋەلسىزدىگىن تۋ ەتىپ ۇستاي الاتىن، سول ءۇشىن جانىن بەرە الاتىن ساياسي كۇش كەرەك! سول جاعىن دا ويلاڭىز. ياعني قوعامدا قالىپتاسىپ كەلە جاتقان سول كۇشتەرگە قىسىم جاسالماۋى ءتيىس!

بەرگەن ۋادەڭىز سول باياعى شەنەۋنىكتەردىڭ قولى مەن قۇزىرىندا قالىپ، بايانسىز بوپ كەتپەسىن!

جاڭا مەرزىمىڭىز الدا تۇر. وسى كەزەڭدە ماڭايىڭىز كەزىندە ەلگە سىيدىرماي، سىرتقا كەتىپ قالعان مىقتى قازاقتاردى ەلگە قايتارساڭىز. ءوز باۋىرلارىڭىز عوي، كەيبىرى ءتىپتى بالالارىڭىزبەن جاستى ەمەس پە؟ ول ءبىر ساۋاپتى ءىس بولار ەدى. قوعام ول باستاماڭىزدى ءسوزسىز قولدار ەدى.

الدا پارلامەنتتىك سايلاۋ. قوعامدا بار بارلىق ساياسي كۇشتەردى سونىڭ ءقۇرامىنا نەگە ەنگىزبەسكە؟ ءالۋان-تۇردى پىكىر قازانى بوپ، قايناپ جاتسىن! بارشامىز ءزارۋ بوپ جۇرگەن اقيقات سول قازاندا پىسپەي مە؟

ايتپاقشى، كونستيتۋسيا بويىنشا وتستاۆكاعا كەتەتىن ۇكىمەتىڭىزدى دە ءبىر سىلكىلەپ الساڭىز! ايتپەسە، ءسىز تاپسىرما بەرمەسەڭىز، جۇمىس ىستەي المايتىندار تولىپ ءجۇر ىشىندە. بىزگە جاڭاشا، زامان تالاپتارىنا ساي، ەلمەن جۇمىس ىستەي الاتىن، جاۋاپكەرشىلىكتى موينىنا الاتىن ۇكىمەت كەرەك! بەلگىلى ءبىر كەزەڭگە باعدارلاما جاساپ، سونى ۋاقىتىندا ورىنداي الماسا، ءوز ەركىمەن وتستاۆكاعا كەتەتىن ۇكىمەت كەرەك!

بيلىك ينستيتۋتتارى جاڭارسا، قوعام دا جاڭارارى ءسوزسىز!

ازىرشە وسى.

PS. بۇل مەنىڭ عانا تىلەگىم. وپپوزيسياداعى باسقالار وزگەشە ويلاۋى مۇمكىن. بىزدە قالىپتاسقان جاعدايدا بۇل پىكىرىم پرەزيدەنتكە جەتەدى جانە ول وعان قۇلاق اسادى دەگەنگە سەنە قويمايمىن. ءبىراق مەنىڭ پوزيسيامدى قوعام ءبىلسىن دەگەن ويمەن جازىپ وتىرمىن.

ءامىرجان قوسانوۆ