اقش-تا جاعداي قيىن بولايىن دەپ تۇر. باستى ماسەلە­­ - مەكسيكامەن اراداعى قابىرعا. ءبىراق دەموكراتتار بۇل قابىرعانىڭ تۇرعىزىلۋىنا قارسى. ءقازىر اقش-تىڭ اۋىل شارۋاشىلىعى، ادىلەت مينيسترلىگى، ءتىپتى مەملەكەتتىك دەپارتامەنتتىڭ ءوزى 22 جەلتوقساننان بەرى جۇمىسىن توقتاتتى. ويتكەنى قازىنادان اقشا بولىنگەن جوق. ءقازىر كونگرەسس مەكسيكامەن ارادا قابىرعا سالۋعا قارسىلىعىن ءبىلدىرىپ جاتىر. ال ترامپ ايتقانىنان قايتاتىن ەمەس. ءتىپتى سايلاۋالدى كامپانياسىندا دونالد ترامپ «مەكسيكا شەكاراسىندا قابىرعا سالۋعا ۋادە ەتكەن». مىنە، سول ايتقانىن ورىنداتۋعا كۇش سالۋدا. ءبىراق وعان قارسى كۇشتەر ءالى دە جەتكىلىكتى. اسىرەسە، دەموكراتتار نارازىلىعىن بىلدىرۋدە. الايدا، كەشە اقش پرەزيدەنتى دونالد ترامپ امەريكالىقتارعا تەلەۇندەۋ جاسادى.

­-ەلدىڭ قاۋىپسىزدىگىن ساقتاۋ ءۇشىن مەكسيكا قابىرعاسىن تۇرعىزۋ كەرەك. ونسىز بولمايدى. ەلدە قىلمىس كوبەيدى. مۇنىڭ بارلىعىن مەكسيكا ارقىلى كەلەتىن ميگرانتتار جاساپ وتىر. سوندىقتان قانداي جاعدايعا قاراماستان دەموكراتتار بۇل جاعدايدى ءتۇسىنۋى كەرەك. ءبىز شەكارامىزدى وسىلاي قورعاۋىمىز كەرەك، -دەدى ول حالىققا ارناعان ۇندەۋىندە.

ەل قاۋىپسىزدىگى ءۇشىن ترامپ دەموكراتتارعا جەڭىلدىك جاساۋعا دايىن ەكەنىن ايتتى. سوندا پرەزيدەنتتىڭ ايتىپ وتىرعانى نە؟ راس، ترامپ بۇرىن قابىرعانى بەتوننان تۇرعىزۋعا ۋادە بەرگەن. ەندى ونى ارزانىراق بولۋى ءۇشىن مەتالدان جاساماقشى. بۇل ەندى بىر-ەكى كۇندە شەشىلىپ قالۋى مۇمكىن.   

دونالد ترامپتىڭ ويىنشا، «مەكسيكا قابىرعاسى» ءوزىن-وزى اقتايدى. پرەزيدەنتتىڭ ويىنشا، سودان كەيىن بارىپ مەكسيكامەن ساۋدا كەلىسىمىن ءتيىمدى باعىتتا جۇرگىزۋگە بولادى. ارينە، دونالد ترامپتىڭ جوباسى ءدال ءقازىر اقش بيۋدجەتىنە اۋىر سالماق ءتۇسىرۋى مۇمكىن. ءبىراق كەيىن ءوزى ايتقانداي،  مۇنىڭ پايداسى زور بولادى. اقيقاتى، ءوز-وزىن اقتايدى. ويتكەنى...

بۇگىنگى تاڭدا مەكسيكا ارقىلى اقش-قا زاڭسىز كەلەتىن ەسىرتكىلەردىڭ قۇنى شامامەن جىلىنا 500 ميلليارد دوللاردى قۇراپ وتىر. سوندىقتان دا پرەزيدەنت كونگرەستەن قابىرعا ءۇشىن 5،7 ميلليارد دوللار سۇراپ وتىر. ال دەپۋتاتتار بار-جوعى 1،3 ميلليارد دوللار بەرۋدى عانا ماقۇلداعان سىقىلدى.

-قابىرعانى تۇرعىزعاننان كەيىن ءبىز كەتكەن شىعىننىڭ بارلىعىن مەكسيكامەن اراداعى ءتيىمدى ساۋدا كەلىسىمشارتى ارقىلى اقتاپ الامىز، - دەيدى اق ءۇي قوجايىنى.

ەگەر بۇل جوباعا دەموكراتتار كونبەسە، وندا ەل بيۋدجەتىنە قول قويۋدان باس تارتاتىنىن ءمالىم ەتتى دونالد ترامپ.

قالاي ايتقاندا دا، دونالد ترامپ بيزنەستەگى ادام عوي. مۇنىڭ ءبارىن الدىن-الا كەسىپ، ءپىشىپ وتىرعان بولار. وسىدان ءبىراز ۋاقىت بۇرىن G20 ءسامميتى اياسىندا اقش، كانادا جانە مەكسيكا اراسىندا USMCA ساۋدا كەلىسىمىنە قول قويىلعانى بەلگىلى. ترامپ وسىنى مەڭزەپ وتىرعان بولار...