دۋبايدا قازاق ايەلى سوققىعا جىعىلدى. 37 جاستاعى نۇرگۇل نۇرعالييەۆا ول جاققا جۇمىسپەن بارعان ەكەن. وقيعا 1 اي بۇرىن سول قالاداعى قوناق ۇيلەردىڭ بىرىندە بولعانىمەن، بۇل تۋرالى ەندى عانا ايتىلىپ جاتىر. دۋبايعا قىدىرىپ بارعان قازاقستان ازاماتتارىمەن جولىعۋ ءۇشىن نۇرگۇل تاكسي شاقىرتىپ، قوناق ۇيگە بارادى. دىتتەگەن جەرىنە كەلگەن سوڭ، جۇرگىزۋشى وتانداسىمىزدىڭ ارتىنان بايقاتپاي ەرىپ كەلىپ، ءليفتىنىڭ ىشىندە تەپكىنىڭ استىنا الىپتى. كەيىن قولىنداعى اقشاسىن الىپ، ءىزىن سۋىتقان. ال اۋىر سوققىدان ايەلدىڭ باس سۇيەگى مەن جاعى سىنىپ، جانساقتاۋ بولىمىنە جەتكىزىلگەن. 16 كۇن بويى كومادا جاتقان وتانداسىمىز ءقازىر بەتى بەرى قاراپ، اۋرۋحانادان شىعارىلدى. كۇدىكتى دە ۇستالىپ، تەرگەۋ جۇمىستارى ءجۇرىپ جاتىر. نۇرگۇل ءالى دە سول دۋبايدا. ال ونىڭ الماتىداعى تۋىستارى جاسالعان ەم-دومعا قاجەتتى قارجىنى جيناۋعا حالىقتان كومەك سۇراپ وتىر. “العاشقى مەديسينالىق كومەك كورسەتكەندەرى تەگىن ەكەن. ال، قالعانى ەمدەگەنى، جاساعان وپەراسياسى بار، كوماسى بار سونىڭ بارىنە 15 مىڭ دوللارداي كەرەك. سونى  تولەمەيىنشە، ەشقايدا شىعا المايدى”، – دەيدى نۇرگۇلدىڭ ءىنىسى بەرىك نۇرعالييەۆ.