استانادا ءبىر وتباسىنىڭ بەس بالاسى كوز جۇمعان قايعىلى جاعداي تۋرالى كۋاگەرلەر ايتىپ بەردى. ايتۋلارىنشا، بالالاردى قۇتقارۋدىڭ مۇمكىندىگى بولماپتى.

استانا اكىمى قايعىلى جاعدايعا قاتىستى قارا جامىلعان وتباسىعا كوڭىل ايتىپ، شۇعىل جينالىس وتكىزدى، دەپ حابارلايدى Qamshy.kz اقپارات اگەنتتىگى 24 حابار ارناسىنا سىلتەمە جاساپ.

جيىندا اكىم قارا جامىلعان وتباسىعا بارلىق كومەك كورسەتۋدى تاپسىردى. اۋدان اكىمدەرىنەن توتەنشە جاعدايلار دەپارتامەنتىمەن بىرلەسىپ، تەكسەرۋ جۇمىسىن جۇرگىزۋىن سۇرادى. "بۇل جايت تجد تاراپىنان كەتكەن قاتەلىك سالدارىنان بولدى" دەگەن پىكىر ايتتى.

ال، كۋاگەرلەردىڭ ايتۋىنشا، بالالاردى قۇتقارۋ مۇمكىن بولماپتى. ءورت سوندىرۋشىلەر كەلگەنگە دەيىن ورتەنگەن ۇيگە كىرگەندەر بالالاردى الىپ شىعا الماعان.

-وندا شۋلاپ جاتقانىن ەستىدىم. جۇگىرىپ تەرەزەگە كەلدىم. كىرىپ ەدىم، قاپ-قاراڭعى بولدى. ەشتەڭە كورىنبەدى. ول جاقتا وتە ىستىق بولدى. قولىممەن سيپاپ كورىپ ەم، ەشتەنە تاپپادىم، – دەيدى وتباسىنىڭ تۋىستارى جانات ءايتىموۆ.

ءورت سالدارىنان 5 بالا قازا بولدى. كورشىلەرىنىڭ ايتۋىنشا، ولاردىڭ ءبارى قىز بالالار. 

-ولاردىڭ اتا-اناسى جۇمىستا بولدى. اكەسى كولىك جوندەيتىن جەردە ىستەيدى. اناسىن بىلمەيمىن. اناسى جاقىندا عانا جۇمىسقا شىققان. بۇعان دەيىن ۇنەمى بالالارىنىڭ قاسىندا بولعان، – دەيدى كورشىسى راحىم اشىمبايەۆ.

ءورتتىڭ شىعۋ سەبەبى رەسمي تۇردە ايتىلعان جوق. ءۇيدىڭ پەشپەن جانە توق قۇرالىمەن جىلىتىلاتىنى انىقتالدى.