اقپارات جانە كوممۋنيكاسيالار ءمينيسترى داۋرەن ابايەۆ ورتالىق كوممۋنيكاسيالار قىزمەتىندە "QAZAQ EPOS" رەسپۋبليكالىق اعارتۋ جوباسى بويىنشا باستالعان بريفينگتە بۇگىن تۇندە قايتىس بولعان 5 بالانىڭ اتا-اناسىنا كوڭىل ايتتى دەپ جازادى Qamshy.kz اقپارات اگەنتتىگى. 

"بۇگىن تۇندە استاناداعى جەكەمەنشىك ۇيلەردىڭ بىرىندە ورىن العان ورتتەن قازا تاپقان 5 بالانىڭ اتا-اناسى مەن تۋعان-تۋىستارىنا كوڭىل ايتامىن. ءورت كەزىندە كىشكەنتاي بالالاردىڭ اتا-اناسى جۇمىستا بولىپتى. ءورتتىڭ شىعۋ سەبەپتەرىن تەكسەرىپ جاتقان قۇزىرلى ورگاندار ناقتى اقپارات بەرەدى دەپ سەنەمىز. وتە قايعىلى جاعداي. بالالارىمىزعا جانە ولاردىڭ ومىرىنە ساق بولايىق. ءقازىر اتا-انالارعا پسيحولوگتار كومەك كورسەتىپ جاتىر. اكىمدىك تە بارلىق قاجەتتى جۇمىستى جۇرگىزۋدە"، دەدى مينيستر. 

سونداي اق استانا اكىمدىگى جەرلەۋ ءراسىمىن ۇيىمداستىرۋ شارالارىن ءوز موينىنا الدى. الەۋمەتتىك جەلىدە جۋرناليستەر مەن قوعام بەلسەندىلەرى قايعىلى وقيعاعا بايلانىستى قارالى كۇن جاريالاۋدى ۇسىنعان بولاتىن. مينيستر بۇل تۋرالى دا پىكىر ءبىلدىردى. 

"قارالى كۇن جاريالاۋدىڭ ءوز كريتەرييلەرى بار. ەگەر سول كريتەرييلەر بولسا، ونى ارنايى كوميسسيا شەشەدى. بۇل ءبىزدىڭ قولىمىزداعى دۇنيە ەمەس"، دەپ قىسقا جاۋاپ بەردى داۋرەن ابايەۆ. 

ۇسىنعان: اسەل بولات قىزى