بۇگىن الماتى قالالىق ءماسليحاتىنىڭ V-شاقىرىلىمىنىڭ 39-سەسسياسى ءوتتى. سەسسيا بارىسىندا ءماسليحات دەپۋتاتتارى الماتى قالاسى اكىمىنىڭ ورىنتاعىنا پرەزيدەنت نۇرسۇلتان نازاربايەۆ ۇسىنعان ەسكى اكىم احمەتجان ەسىموۆتىڭ كانديداتۋراسىن ماقۇلدادى.
احمەتجان سماعۇل ۇلى ەسىموۆ 1950 جىلى 15 جەلتوقسان كۇنى بۇرىنعى قاسكەلەڭ اۋدانىندا دۇنيەگە كەلگەن. قازاق اۋىلشارۋاشىلىق ينستيتۋتىن ءتامامداعان (1974 ج)، ينجينەر-مەحانيك.
اتاق - دارەجەلەرى، قىزمەتتەرى:
- ەكونوميكا عىلىمدارىنىڭ دوكتورى (1999 ج)
- الماتى وبلىستىق پارتيا كوميتەتىنىڭ حاتشىسى (1988-1990 جج)
-الماتى وبلىستىق اكىمشىلىگى باسشىسى (02،1992-10،1994 جج)
- ق ر پرەمەر-مينيسترى ورىنباسارى (10،1994-03،1996 جج)
-قر مەملەكەتتىك حاتشىسى (03،1996-10،1996 جج)
- ق ر پرەزيدەنت اكىمشىلىگى جەتەكشىسى (07،1996-10،1996 جج)
- ق ر پرەمەر-مينيسترى ءبىرىنشى ورىنباسارى (10،1996-02،1998 جج)
- بەلگيا، نيدەرلاندى، ليۋكسەنبۋرگ، ەلدەرىندە ق ر توتەنشە جانە وكىلەتتى ەلشىسى قىزمەتتەرىن اتقاردى.
-قر اۋىلشارۋاشىلىعى ءمينيسترى (2001-2004 جج)
-الماتى قالاسى اكىمى (2008 جىلدان بەرى قاراي)
سونىمەن، "جاڭا-ەسكى" دەگەن جاڭا تىركەسكە دە بۇگىندە قۇلاعىمىز ۇيرەنە باستاعانداي. جەتى جىلدان بەرى الماتىنىڭ اكىمى قىزمەتىنەن تۇسپەي كەلە جاتقان احمەتجان ەسىموۆ ەلدىڭ ەسىندە نەسىمەن قالدى؟ ەسىموۆتىڭ ەل اۋزىندا ايتىلىپ جۇرگەن كەمشىلىكتەرىن تىزبەلەپ كورەيىك...
- سول باياعى ورتەنگەن بازارلاردان باستايمىز. "باراحولكا" بازارى بىرىنەن سوڭ ءبىر ورتەنىپ جاتتى. جۇزدەگەن ساۋداگەردىڭ ميلليارد تەڭگە جۋىق تاۋارلارى ءبىر-اق ساتتە ورتەنىپ كەتتى. ءتىلسىز جاۋ تاۋاردىڭ تۇگىن قالدىرماي جالماپ كەتكەندە، قالالىق اكىمشىلىك نە ءبىتىردى؟ ءيا، دامىعان ەلدەردەگى ۇردىستەر بويىنشا، جيناقى ساۋدا-ورتالىقتارىنا كوشۋ جاقسى باستاما ەكەنى راس. الايدا، قارا حالىقتى ماسا قۋعانداي، ءتۇتىن سالىپ، كوشىرۋ قانشالىقتى دۇرىس؟ بۇگىندە سول "باراحولكا" اتىمەن جوق بولعان.
- الماتىدا ءسان جانە ديزاين كوللەدجىندە، ساباق ۇستىندە بومبا جارىلدى. وقۋشى قازا بولدى. 12 ستۋدەنت ءتۇرلى دەنە جاراقاتىن الدى. شۋ ءبىرازعا دەيىن باردى. ءمۇعالىم ەكى ايعا قامالدى. كەيىن بوساپ شىقتى. جاقىندا، ونەر اكادەمياسىندا دا ءورت شىقتى. قۇدايعا شۇكىر، زارداپ شەككەندەر جوق ەدى.
- تاۋەلسىزدىك كۇنى قارساڭىندا، اكىم مىرزا، تۋعان كۇنىن تويلاۋعا، قالادان شىعىپ كەتتى. ويتكەنى، ول تۋعان كۇنىندە قالادا "بولعىسى كەلمەيدى" ەكەن. 15 جەلتوقسان احمەتجان مىرزانىڭ تۋعان كۇنى. ال ەرتەسى "ءجاي ءبىر" تاۋەلسىزدىك كۇنى ەدى عوي.
- تۇرعىن ءۇي ماسەلەسى. "ۆەتحوە جيلە" باعدارلاماسى بويىنشا، ەسكى شارشى مەتر جەرگە، جاڭا شارشى مەتردى ايىرباستاۋ. بۇل باعدارلاما بويىنشا، 400-دەن استام پاتەر يەسى جاڭا پاتەرلەرگە كوشۋى ءتيىس بولاتىن. الايدا، مۇنىڭ دا ارتى داۋعا ۇلاستى. ءتىپتى، اكىم مىرزا، وزىنە سىن ايتقان ازاماتتىق بەلسەندىلەردىڭ وزدەرىن سىنعا الدى.
- قالانىڭ قۇرامىندا بولسا دا، ءالى كۇنگە دەيىن كوگىلدىر وتىننىڭ قىزىعىن كورە الماي جۇرگەن الماتىلىقتاردىڭ جانايقايى دا ەسىموۆتىڭ قۇلاعىنا جەتتى. حالىق شىرىلدادى. ەسىموۆ ۋادە ەتتى. "قازترانسگاز" باسشىلارىمەن كەلىسىپ وتىرىپ، 20 پايىزدان 50 پايىزعا دەيىن جەڭىلدىكتەر جاساۋعا ۋادە بەردى. دەسە دە كۇنى بۇگىندە ءار ۇيگە كوگىلدىر وتىن تارتۋ قۇنى 300 مىڭ تەڭگەنىڭ توڭىرەگىنەن تۇسپەي كەلەدى.
- "كوك جايلاۋ" تۋريستىك كەشەنى. 1،5 ميلليارد دوللار ينۆەستييا تارتىلعان كەشەننىڭ كەمسىن تۇستارى جەتەرلىك. وسى جولعى ەسەپ بەرۋ جينالىسىندا ەسىموۆ مىرزا، ادەتتەگىدەي، "كوك جايلاۋ" ءۇشىن كۇرەسەتىنىن ايتقان. ايتپاقشى، ەسىموۆ مىرزانىڭ سول ەسەپ بەرۋ جيىنىنا كەلگەن، وپپازيسيونەر (قارسىلاستارى) دوستارىن پوليسيا قاماپ قويعان بولاتىن.
- سونداي-اق، ەسىموۆ مىرزانىڭ ەنشىسىندە شەشۋىن تاپپاعان - ەكولوگيا، كولىك پروبلەماسى، قوقىس قالدىقتارىن كادەگە جاراتۋ، كوكجايلاۋ شاتقالىندا قۇرىلىس جۇرگىزۋگە قاتىستى ماسەلەلەر تاعى بار.
- سوڭىندا، تاعى دا ءورت. "ادەم" ساۋدا ورتالىعى تۇگەلدەي ورتەنىپ كەتكەندە قالا اكىمى نەگە ساۋداگەرلەرگە بارىپ، جاعدايلارىن بىلۋگە اسىقپادى؟
- كوپىر قۇلادى. كىسى قازا بولدى. كوپىر قۇرىلىسىنا جاۋاپتى كومپانيا شەتەلدىڭ ەنشىسىنە، رەسەيگە تيەسەلى بولىپ شىقتى. وندا دا اكىم ءلام-ميم دەپ ءتىس جارعان جوق.
- قالا تەرريتورياسىنا جاڭادان كىرگەن اۋداندار مەن قالاماڭى اۋىلداردىڭ جول ماسەلەسى ءالى شەشىمىن تاپقان جوق. جىل سايىن كوكتەم مەن كۇزدە حالىق قارا باتپاق كەشىپ، لاي سۋدىڭ استىندا قالادى...
ءتۇيىن: پرەزيدەنت جارلىعىمەن قايتا سايلانعان اكىمگە سىنشى كوپ-اق. ەلباسىنىڭ ءتىل جونىندە ۇستانعان ساياساتى مەن تولەرانتتىلىقتى شاتاستىرىپ الاتىن اكىمدەردىڭ قاتارىندا ءدال، وسى ەسىموۆ مىرزا دا بار ەدى. ول رەسمي جيىنداردا ۇنەمى رەسمي تىلگە جۇگىنەدى. ورىسشا سويلەيدى، ودان قالسا اعىلشىنشا سايرايدى. ءتىپتى، بلوگەرلەرمەن كەزدەسكەندە قازاق ءتىلدى باق-تى قارامايتىنىن اشىق ايتتى. ەش قىمسىنباستان. قازاقشاعا شورقاق ەمەس-اۋ، نيەت بىلدىرگىسى كەلمەيدى. ايتپەسە، قازاقى اۋىلدىڭ تۋماسى عوي. كوڭىلجىقپاستىق، جىگەرسىزدىك، نامىسسىزدىق... ايتا-ايتا جاۋىر بولعان تاقىرىپ.
بۇگىن الماتى قالاسىن جەتى جىلدان بەرى باسقارىپ كەلە جاتقان احمەتجان سماعۇل ۇلى ەسىموۆ مىرزا قايتا اكىم بولىپ سايلاندى. ءبىز جوعارىدا تىزبەلەپ وتكەن، كۇرمەۋى شەشىلمەي كەلە جاتقان ماسەلەلەر اكىم مىرزانىڭ الداعى وكىلەتتى مەرزىمىندە نازارىنان تىس قالمايدى جانە ماسەلە شەشىمىن تابادى دەپ سەنەمىز.
نۇرگەلدى ءابدىعاني ۇلى
سۋرەت: "ازاتتىقتان"
