تانىمال ءانشى مادينا ءسادۋاقاسوۆا "7 ارناداعى" “مويا يستوريا” باعدارلاماسىنىڭ ءجۋرناليسى ماييا بەكبايەۆاعا بەرگەن سۇحباتىندا كۇيەۋىمەن قارىم-قاتىناستارى جايلى اڭگىمەلەپ بەردى. “ولجاس (كۇيەۋى) راسىمەن دە مەنى سۇيەتىن ادام. ول ماعان وتە قىمبات. ول ءوز ماحابباتىن بارىنشا دالەلدەپ بەردى. ءوزى تەليەۆيزيادا قىزمەت اتقارادى. ەكەۋىمىز 2009 جىلى تۇسىرىلىمدە العاش تانىسقاندا مەن ونى ەلەمەيتىنمىن. ءبىر كۇنى ول ماعان حابارلاما جازىپ، ءبىر شوق گۇلدەر ۇسىندى. سودان بەرى جۇبىمىز جازىلعان ەمەس”، – دەپ اعىنان جارىلدى ءانشى. ءمادينانىڭ ويىنشا، قازىرگى كەزدە نازىك جاندىلاردىڭ ەر كىسىنىڭ الدىندا ءوزىنىڭ مىقتىلىعىن كورسەتۋى – وتباسىنا كەدەرگى بولار باستى ماسەلە. “مەن ايەلدەر نازىك، سۇلۋ ءارى ەر كىسىنىڭ قورعاۋىندا بولۋى ءۇشىن جاراتىلعان دەپ ويلايمىن. ءوز ەرلەرىنەن مىقتىراق كەلەتىن ايەلدەر ولاردىڭ ارتىقشىلىقتارىن سەزىنۋىنە مۇمكىندىك بەرمەيدى جانە بۇل قازىرگى كەزدە باستى ماسەلە بولىپ وتىر”، – دەيدى ءانشى. ءسادۋاقاسوۆا سۇحبات بارىسىندا بالا كەزدەن ءانشى بولۋعا تالپىنعانىن جاسىرمادى. “11 جاسىمدا مەن سول كەزدە تانىمال بولعان “ءانشى بالاپان” مۋزىكالىق بايقاۋىنا قاتىستىم. كەيىن قىزىلورداداعى “تاڭ شولپان” بايقاۋىن جەڭۋدەن ءۇمىتتى بولدىم. الايدا، ءوزىمدى قانشا جۇلدىز سەزىنسەم دە، ءتىپتى كەلەسى تۋرىنا وتپەي قالدىم. دەگەنمەن، جەڭىلىسكە بولا سالىم سۋعا كەتكەن جوق. 3 جىل بويى اتىم شىعا قويماسا دا، كىشكەنتايىمنان ءانشى بولۋ ارمانىمنان ءبىر ساتكە الىستاعان ەمەسپىن. اقىرى 1996 جىلى قىزىلوردادا “مۋزىكالنىي ۆوياج” بايقاۋىن ۇتىپ الدىم”، – دەيدى ءسادۋاقاسوۆا. “ماحاببات جالىنى” انىمەن جۇرتشىلىقتى باۋراعان ءمادينا ءانىنىڭ تانىمال اندەر ىشىندە العاشقى ۇشتىككە ەنگەنىن اۆتوبۋستا وتىرعاندا راديودان ەستىگەن ەكەن. “سول كەزدە مەن ونەرىم ەلدىڭ جۇرەگىن جىبىتكەنىن ۇعىپ، پرەزيدەنتتىك وركەسترمەن شارتىمدى بۇزدىم. الماتىعا كەلىپ، ونەردە جاڭا بەلەستى باستادىم”، – دەيدى ءانشى. الماتىعا ارمان قۋالاپ كەلگەن ءمادينا بارلىق مەرەكەلىك ءىس-شارالاردان قالىسپاي، ونەرگە تولىقتاي بەت بۇرىپتى. ءانشى ونەردەن بولەك جەكە ءومىرى مەن وتباسى جايلى دا بايانداپ بەردى. “جارتى جىل بۇرىن مەنىڭ تۋعان كۇنىمدە ولجاس (كۇيەۋى) ۇسىنىس جاسادى. كەيىن ۇزاتۋ، توي بولىپ، اقىرى ەكەۋىمىز ەرلى-زايىپتى اتاندىق. بىرگە اتىرعان العاشقى تاڭىمىزدا كۇيەۋىم ماعان قاراپ، “مادينا، ءبىز ەندى ەرلى-زايىپتىلارمىز” دەدى. سول كەزدەن مەن جولداسىما ءوز وتكەنىم جايلى ءتىل قاتپاۋعا ۋادە بەردىم (ءانشىنىڭ العاشقى نەكەسى ءساتسىز بولعان)”، – دەيدى ءانشى. ءسادۋقاسوۆا بۇگىنگى كۇندە 9 ايلىق ۇلىن تاربيەلەپ وتىر. انا اتانۋى ونەرىن قاتار الىپ جۇرۋگە قيىندىقتار تۋعىزعانىمەن ءانشى ءوزىنىڭ باقىتتى ەكەندىگىن ايتۋدا.