كەشكىسىن جۇمىستان كەلىپ تىزە بۇككەنىم سول ەدى، باستاۋىش مەكتەپتىڭ ەكىنشى سىنىبىندا وقيتىن بالام: - اكە، الەمدە نەشە قازاقستان بار ؟ - دەپ سۇراماسى بار ما. اۋەلدە بالا سوزىنە تولىق ءمان بەرمەگەن مەن، سامارقاۋ ۇنمەن: - جالعىز عانا قازاقستان بار - دەدىم. - سوندا قالاي، - دەدى بالام كوزىن ماعان قاداپ، - مىنا تەلەديداردىڭ ءبىر ارناسىنا قوسىلساڭ جاقسى، ادەمى قازاقستاندى كورسەتەدى دە، باسقا ارناسىندا مۇلدە باسقا قازاقستاندى كورەسىڭ. وندا نەشە ءتۇرلى اپاتتاردى، جىلاعان ادامداردى، توزعان جولداردى، قىلمىسكەرلەردى كورەسىڭ، مەن ول قازاقستاندا تۇرعىم كەلمەيدى، قورقام، - دەدى كىنالى جانداي جانارىن تومەن سالىپ. مەن سوندا بارىپ ونىڭ نەنى مەڭزەپ تۇرعانىن ءتۇسىندىم دە، بالامدى قۇشاعىما الىپ: - قورىقپا بالام، اكەڭ بار دا ەشتەڭەدەن الاڭداما. ءوزىڭ ايتقان جاقسى، جامان قازاقستاندا ءبىز تۇرامىز. ول جاقسى بولسىن، جامان بولسىن ءبارىبىر ءبىزدىڭ ۇلى وتانىمىز. ودان باسقا مەملەكەتىمىز جوق، - دەدىم بالامنىڭ مايدا شاشتارىن ايالاي سىلاپ. بالام نازىك تە جىلى قولدارىمەن موينىمنان قۇشاقتاپ، مەنىڭ ءسوزىم مەن دەمىمنەن ءبىر سەنىم مەن تىنىشتىق تاپقانداي تۇرا بەردى. مەن بالامدى جۇباتىپ تۇرعانىممەن سانام سامعاپ بايتاق قازاق دالاسىن ارالاپ كەتتى. ... "راس-اۋ، مەن قايسى قازاقستاندا تۇرامىن؟" دەگەن سۇراققا جاۋاپ ىزدەپ شارق ۇردى. بالالار مۇڭايسا اكەلەرىنە ارقا سۇيەيدى، ال اكەلەر قايعىرسا ارقا سۇيەر ەلى بولعانعا نە جەتسىن. "قايسى قازاقستاندا تۇرسام دا، ايتەۋ قازاقستاننىم بولعانى ءۇشىن شۇكىر، باقىتتىمىن" دەدىم ىشىمنەن. قاستەر سارقىتقان