جاپونيادا 36276 كىسى ءجۇز جاستان اسقان. جىل سايىن جۇزگە تولاتىنداردىڭ سانى 4000 ادامعا ارتىپ وتىرادى. كۇنشىعىس ەلىندە 20 مىڭ قاريا جۇزگە كەلۋىنە بايلانىستى پرەمەر مينيستردەن قۇتتىقتاۋ حات پەن كۇمىس كۋبوك سىيلىعىن الادى. دۇنيەجۇزى بويىنشا ءومىر ءسۇرۋ ۇزاقتىعى جونىنەن ءبىرىنشى ورىندا تۇرعان جاپونيادا قارتتاردىڭ كوپتىگى كەيبىر ساياساتكەرلەرىنە ۇنامايتىن كورىنەدى. عاسىردان دا ۇزاق جاساۋشىلار سانىنىڭ ارتۋى ەل ەكونوميكاسىنا ارتىق جۇك دەپ ەسەپتەيتىندەر از ەمەس. جاپونيا بالا تۋۋ كورسەتكىشىنىڭ تومەندىگى تۇرعىسىنان سوڭعى قاتاردا تۇرعان ەلدەردىڭ ءبىرى. 1979 جىلعا دەيىن بالا سانى ءبىرقالىپتى بولىپ كەلگەن كۇنشىعىس ەلىندە بالا تۋۋ كورسەتكىشى بارعان سايىن كەمىپ بارادى. ستاتيستيكالىق مالىمەتتەرگە سۇيەنسەك، ءار ايەلگە 1،3 بالادان كەلەدى ەكەن. ياعني، جاپون وتباسىندا بالا سانى ەكەۋدەن اسپايدى دەگەن ءسوز.  ۇيلەنگەندەردىڭ اراسىندا بالالى بولۋدان قاشاتىندارى وتە كوپ. جاپون الەۋمەتتانۋشىلارى 2020 جىلعا قاراي حالىقتىڭ 60 پايىزىن قارتتار قۇراۋى مۇمكىن دەپ قاۋىپتەنۋدە.