قۇرمەتتى نۇرسۇلتان ءابىش ۇلى!
ءسىزدى سايلاۋداعى جەڭىسىڭىزبەن شىن جۇرەكتەن قۇتتىقتاي وتىرىپ، جۇمىسىڭىزعا تولاعاي تابىس، جەكە ءوز باسىڭىزعازور دەنساۋلىق، مول قايرات تىلەيمىز!
وسىناۋ ءۇشبۋ حاتتا وزىڭىزگە ايتار اقجولتاي تىلەگىمىز بار ەدى.
ەلىمىزدەگى ەڭ جوعارى دارەجەلى مەملەكەتتىك ناگرادالاردىڭ ءبىرى – «حالىق قاھارمانى» اتاعى. وسى اتاققا ەلىمىزدە ءبىراز تۇلعا لايىق دەپ تانىلدى. «حالىق قاھارمانى» اتاعىمەن ەڭ العاشقى بولىپ ارميا گەنەرالى، قازاقستان رەسپۋبليكاسىنىڭ تۇڭعىش قورعانىس ميءنيسترى ساعادات نۇرماعامبەتوۆتىڭ ماراپاتتالعانى بەلگىلى (1994 جىلى). بۇل اتاق ۇلى وتان سوعىسىندا اسقان ەرلىك كورسەتكەن ارداگەرلەردىڭ ءبىر قاتارى: داڭقتى قولباسشى باۋىرجان مومىشۇلىنا (قايتىس بولعاننان كەيىن)؛ پارتيزان قاسىم قايسەنوۆكە، رەيحستاگقا تۇڭعىش تۋ تىككەن باتىر راحىمجان قوشقاربايەۆقا (قايتىس بولعاننان كەيىن)؛ رف باتىرى باقتىوراز بەيسەكبايەۆقا (قايتىس بولعاننان كەيىن)؛ اتاقتى ۇشقىز قىزىمىز حيۋاز دوسپانوۆاعا، ماۋلەن قالمىرزاعا، الەكسەي كۋلاكوۆقا، مۋردين تايپوۆقا، الەكساندر كاپورينگە تابىس ەتىلدى. سونداي-اق «حالىق قاھارمانى» اتاعى قوعام قايراتكەرى، مەتاللۋرگ، مەملەكەتتىك سىيلىقتىڭ يەگەرى احات كۇلەنوۆكە؛ قازاقستاننىڭ تۇڭعىش عارىشكەرى، گەنەرال-مايور توقتار اۋباكىروۆكە (1995 جىلى)؛ قازاقستاننىڭ ەكىنشى عارىشكەرى، گەنەرال-مايور تالعات مۇسابايەۆقا (1995 جىلى)؛ رف ۇشقىش-عارىشكەرى يۋريي مالەنچەنكوعا؛ قاراعاندى عىلىمي-زەرتتەۋ سوۆحوزى – اۋىل شارۋاشىلىعى ينستيتۋتىنىڭ ديرەكتورى الەكساندر حريستەنكوعا؛ اكادەميك مۇحتار الييەۆكە؛ قازاقستانعا ەڭبەك سىڭىرگەن قۇرىلىسشى اكيم اتماچيديگە؛ اكادەميك، قازاقستان ۇعا پرەزيدەنتى شافيك چوكينگە؛ كسرو حالىق ءارتىسى روزا باعلانوۆاعا (1996 جىلى)؛ 1986 جىلعى جەلتوقسان وقيعاسىنا قاتىسۋشى قايرات رىسقۇلبەكوۆكە (قايتىس بولعاننان كەيىن)؛ اتاقتى كومپوزيتور نۇرعيسا تىلەندييەۆكە (1998 جىل)؛ كسرو حالىق ءارتىسى، تەاتر رەجيسسەرى ءازىربايجان مامبەتوۆكە (2000 جىلى)؛ ارميا گەنەرالى، مۇحتار التىنبايەۆقا؛ ق ر قارۋلى كۇشتەرىنىڭ اعا لەيتەنانتى ازامات جۇمادىلوۆكە؛ گەنەرال-لەيتەنانت باقىتجان ەرتايەۆقا بەرىلدى.
جوعاردا اتالاعان تۇلعالاردىڭ ىشىندە سپورت سالاسى بويىنشا ءالى ءبىر ادام «حالىق قاھارمانى» اتاعىن العان جوق. بىلە بىلگەنگە قازاق حالقىنىڭ، قازاقستاننىڭ داڭقىن الەمگە ايگىلەپ جۇرگەن وسى سپورتشىلارمىز ەمەس پە؟!
قازاق سپورتىندا باتىرلار كوپ. بالۋان شولاق، قاجىمۇقان مۇڭايتپاس ۇلى سەكىلدى اياۋلى ازاماتتارعا حالىق سول كەزدە-اق باتىر، قاھارمەن دەگەن ات بەرىپ، ەركەلەتىپ توبەسىنە كوتەردى. كۇرزى جۇدىرىقتى ءابدىسالان نۇرماحانوۆ تا، الىپ بالۋان ابىلسەيىت ايحانوۆ تا قازاقتىڭ مارقاسقا بارىل ۇلدارى.
ال بۇگىندە سپورتتا حالىقتىڭ باتىر ۇلى اتانىپ جۇرگەن ازاماتتار از ەمەس. سولاردىڭ ءبىرى دە بىرەگەيى،ءوزى ايتقانداي، «ءبىرجاپىراق» بولسا داەلىنىڭ تاڭداۋىنا ىلىگىپ، الىپتاردىڭ كوشىن باستاپ جۇرگەن ايتۋلى تۇلعالاردىڭ ءبىرى – جاقسىلىق ۇشكەمپىروۆ. ياعني قازاقتان قاجۇمىقاننان كەيىن شىققان جارىق جۇلدىز. سوناۋ سۇراپىل سوعىستا ر.قوشقاربايەۆ بەرليندەگى رەيحستاگقا جەڭىستىڭ تۋىن قاداسا، ال العاش بولىپ سپورت الەمىندە قازاقتىڭ اتىن التىن ارىپپەن جازىپقالدىرعان گرەك-ريم كۇرەسىنەن وليمپيادا جانە الەم چەمپيونى جاقىسىلىق ۇشكەمپىروۆ بولاتىن.
جاقسىلىق ۇشكەمپىروۆ كسرو حالىقتارىنىڭ جازعى سپارتاكياداسىندا چەمپيون اتانىپ (1975 جىلى)، 1975-80 جىلدار ارالىعىندا كسرو چەمپيوناتىنىڭ التى دۇركىن جۇلدەگەرى(ەكى مارتە چەمپيون – 1975، 1980)، قازاقستان چەمپيوناتىن تالاي مارتە جەڭىپ العان. 1980 جىلعى ەۋروپا چەمپيوناتىندا كۇمىس جۇلدەگە يە بولسا، سول جىلى ماسكەۋ وليمپياداسىندا جاسىنداي جارقىلداپ، التىننان القا تاققان تۇڭعىش قازاق.وليمپيادادان كەيىن داڭقتى بالۋان (1981 جىلى) الەم چەمپيونى اتانىپ، الەم كۋبوگىنىڭ كۇمىس جۇلدەگەرى اتانعان (1982 جىلى).
وسى جەڭىستىڭ ءبارى وڭايلىقپەن كەلگەن جوق. مۇنداعى توگىلگەن تەر، ەرەن ەڭبەك، جەڭىس ءۇشىن بوز كىلەم ۇستىندە جان بەرىپ، جان الىسقان تايتالاستار. ءبارى دە ەڭبەك. قاي سالادا بولسىن ەڭبەكتىڭ، توگىلگەن تەردىڭ ايرماشىلىعى جوق سەكىلدى، ەكەۋى دە ەل مەرەيى، قازاق حالقىنىڭ داڭقىنا توگىلگەن تەڭىزدەي تەر.
بۇگىندە جاقسىلىق ءامىرالى ۇلى قوس قولىن قۋسىرىپ قويىپ، بوس وتىرعان جوق. ءومىرىن ەڭبەكپەن كەستەلەگەن داڭقتى بالۋان – قازاق حالقىنىڭ ماقتانىشىنا اينالىپ، جەكە شارۋا قوجالىعىنىڭ باسشىسى رەتىندە كوپتەگەن ادامدى جۇمىسپەن قامتىپ وتىرعان ءىرى كاسىپكەرلەردىڭ ءبىرى.
ەندەشە «حالىق قاھارمانى» اتاعىنا جاقسىلىق ۇشكەمپىروۆتى لايىق دەپ ايتار ەدىك. سپورت سۇيەر قاۋىمنىڭ، جالپى حالىقتىڭ اتىنان جولدانعان ىزگى تىلەگىمىز دەپ بىلگەيسىز!
قۇرمەتپەن،
قايربەك ماساليميەۆ،
گرەك-ريم كۇرەسىنەن سپورت شەبەرى،
مال دارىگەرلىك عىلىمدارىنىڭ كانديداتى،
زەينەتكەر
شىعىس قازاقستان وبلىسى، وسكەمەن قالاسى.
