الماتى قالاسىنداعى ەسكاتو-نىڭ سولتۇستىك جانە ورتالىق ازيا مەملەكەتتەرىنە ارنالعان سۋبرەگيونالدى بولىمشەسىنىڭ ۇيىمداستىرۋمەن ازيا-تىنىق مۇحيت ايماعىنىڭ ەكونوميكالىق، الەۋمەتتىك جاعدايىنا ارنالعان قورىتىندى جيىن ءوتتى. باسقوسۋدىڭ اشىلۋىندا ەسكاتو بولىمشەسىنىڭ باسشىسى ن.ن.پوموششنيكوۆ، قر-نىڭ تۇڭعىش پرەزيدەنتىنىڭ قورى جانىنداعى الەمدىك ەكونوميكا جانە ساياسات ينستيتۋتىنىڭ ديرەكتورى س.م.اكيمبەكوۆ، قازاقستان قارجىگەرلەر قاۋىمداستىعى كەڭەسىنىڭ ءتوراعاسى ا.ر.ەلەمەسوۆ، ۇلتتىق بانكتىڭ ستراتەگيالىق زەرتتەۋ جانە ساراپتاما دەپارتامەنتىنىڭ ديرەكتورى م.س.بۋبەيەۆ بايانداما جاسادى. باسقوسۋعا كەلگەن بۇۇ-نىڭ وكىلدەرى، قازاقستاننىڭ ديپلوماتيالىق كورپۋسىنىڭ جەتەكشى ماماندارى، قارجىگەرلەر، ەكونوميستەر قاتىسقان جيىندا بۇۇ-نىڭ باس حاتشىسىنىڭ ورىنباسارى شامشاد احتاردىڭ جولداۋى بەينەتاسپادان كورسەتىلدى. شامشاد احتار ءوز بايانداماسىندا ايماقتاعى مەملەكەتتەر دامۋىنىڭ نەگىزگى كورسەتكىشتەرىنە توقتالدى. ەسكاتو جۇرگىزگەن زەرتتەۋ بويىنشا قازاقستاننىڭ 2012 جىلعى ەكونوميكالىق دامۋى 5 پايىز بولسا، 2013 جىلى 6 پايىزعا جەتكەن. مامانداردىڭ ايتۋىنشا ەلدەگى تۇتىنۋشىلىق دەڭگەيىنىڭ تۇراقتىلىعىنا ءتيىمدى نەسيەلەۋدىڭ سەپتىگى تيگەن. كوممەرسيالىق بانكتەردىڭ تۇتىنۋشىلىق كرەديت مولشەرى شاعىن بيزنەستى نەسيەلەندىرۋ ەسەبىنەن وسكەن. رەسپۋبليكاداعى بىرنەشە كەن ورىندارىنىڭ جابىلۋى سەبەپتى ەلدەگى مۇناي ءوندىرۋ ءىسىنىڭ قارقىنى ءبىراز باسەڭدەگەن. وعان قوسا مەتالعا سۇرانىس ازايعاندىقتان ەكسپورتتان تۇسەتىن تابىس تا كەمىگەن. قازاقستانداعى تۇراقتى ەكونوميكالىق دامۋدىڭ ارقاسىندا جاڭا جۇمىس ورىندارى كوپتەپ اشىلسا دا، جاستار اراسىنداعى جۇمىسسىزدىق دەڭگەيى بۇرىنعىداي جوعارى دەڭگەيدە قالىپ وتىر. قازاقستانداعى ەكونوميكالىق دامۋ كورسەتكىشى 5،4 پايىزعا دەيىن تومەندەۋى مۇمكىن. جاڭادان ەنگىزىلگەن تۇتىنۋشىلىق نەسيەلەردى شەكتەۋ تۇتىنۋشىلىق شىعىنداردى ازايتۋعا اكەلەدى دەپ بولجانۋدا. اقپان ايىنداعى ۇلتتىق ۆاليۋتانىڭ ديەۆالۆاسياسى ەكسپورتتان تۇسەتىن تابىستى كوبەيتەدى دەپ كۇتىلگەن ەدى. ەسكاتو رەسپۋبليكاعا سالىقتىق بازانى كەڭەيتۋدى، سالىق تولەمدەرىن رەتكە كەلتىرۋدى، سالىق تولەۋ جۇيەسىندەگى الاياقتىقپەن كۇرەسۋدى، سالىقتاردى باسقارۋ پروسەسىنىڭ تيىمدىلىگىن ارتتىرۋدى ۇسىنىپ وتىر. سونداي-اق ەسكاتو ماماندارى رەسپۋبليكادا سالىقتىق رەفورمالاردى تياناقتى جوسپارلاۋ جانە ايماقتىق ىنتىماقتاستىقتى دامىتۋدى دۇرىس دەپ ەسەپتەيدى. باسقوسۋعا جينالعان حالىقارالىق ماماندار ورتا ازيا رەسپۋبليكالارى مەن ازيا-تىنىق مۇحيت ەلدەرىنىڭ ەكونوميكالىق دامۋىنا قاتىستى پىكىرلەرىن ءبىلدىرىپ، ۇسىنىستارىن ورتاعا سالدى.

شارافات جىلقىبايەۆا