وسىدان 70 جىل بۇرىن، ەكىنشى دۇنيەجۇزىلىك سوعىس جىلدارى سوۆەت تانكىلەرى بەرلينگە دەيىن جەتكەن بولاتىن. ال سۋ جاڭا رەسەيلىك "ارماتا" تانكىلەرى قاراپايىم پاراد كەزىندە قىزىل الاڭنان ءجۇرىپ وتە المادى، دەپ جازادى ۇلىبريتانيانىڭ The Cuardian باسىلىمى. بۇگىن ماسكەۋدىڭ قىزىل الاڭىندا 9 مامىر جەڭىس كۇنىنە ارنالعان اسكەري پارادقا دايىندىق بارىسىندا سۋ جاڭا قۇراستىرىلعان ت-14 "ارماتا" تانكىسى بۇزىلىپ قالعان بولاتىن. العاشقىدا  ۇيىمداستىرۋ كوميتەتى مۇنى جوسپار بويىنشا توقتاتىلدى دەپ اقتالعانىمەن، كەيىن بەلگىلى بولعانداي اسكەريلەر بۇزىلعان تانكىلەردى  ورنىنان قوزعالتا الماعان. وسىلايشا، تانكىلەر ءبىر كۇن بويى، رەپيتيسيا الاڭىندا تۇرعان.  دايىندىق جۇمىستارى اياقتالعاننان سوڭ، تانكىلەردى قۇراستىرۋشى "ۋرالۆاگونزاۆود" قىزمەتكەرلەرى كەلىپ، ارنايى كولىكتىڭ كومەگىمەن الىپ كەتكەن. ەستەرىڭىزگە سالا كەتەيىك، ەرتەڭ رف پرەزيدەنتى ۆلاديمير پۋتين ماسكەۋدەگى قىزىل الاڭدا قازاقستان، بەلورۋسيا، جۇڭگو جانە ت.ب. مەملەكەت باسشىلارىمەن بىرگە جەڭىستىڭ 70 جىلدىعىنا ارنالعان اسكەري پارادتى قابىلداپ الادى. ال رف سىرتقى ىستەر مينيسترلىگى باتىس جۋرناليستەرىن اتالمىش كەلەڭسىزدىكتەن ساياسي استار ىزدەدى دەپ سىنعا العان.