جاقىندا تۇركيا رەسپۋبليكاسى سىرتقى ىستەر ءمينيسترى ماۆليۋت چاۆۋشوگلۋ انتاليادا ۋكراينانىڭ شىعىسىنداعى جانجالدار مەن رەسەي جانە باتىس ەلدەرى اراسىنداعى ماسەلەلەرگە قاتىستى مالىمدەمە جاساعان. بۇل تۋرالى AFP اقپاراتتىق اگەنتتىگى حابارلايدى.

تۇركيا ءسىم-نىڭ ايتۋىنشا، رەسەي فەدەراسياسىنىڭ ۋكرايناعا جانە وزگە دە پوست-كەڭەستىك مەملەكەتتەرگە جاساعان باسقىنشىلىق ارەكەتتەرى ەشقانداي اقتاۋعا جاتپايدى. ۋكراينانىڭ تەرريتورياسىنىڭ بۇزىلۋىنا بىردەن-بىر كىنالى رەسەي فەدەراسياسى.

"انكارا رەسمي تۇردە ماسكەۋ مەن باتىس ەلدەرى اراسىنداعى قاراما-قايشىلىقتاردى رەتتەۋدە كونسترۋكتيۆتى ءرول ويناۋعا ءار قاشان دايىن. ءبىراق، رەسەيدىڭ ۋكرايناعا، ونىڭ ىشىندە قىرىمعا، گرۋزياعا جانە وزگە دە كورشى مەملەكەتتەرگە جاساعان، جاساپ جاتقان زۇلىمدىعىن، حالىقارالىق كەلىسىمدەردى اياققا تاپتاعانىن كەشىرۋگە بولمايدى"،-دەيدى مينيستر چاۆۋشوگلۋ.

سونداي-اق تۇركيا ءسىم باسشىسى قىرىم تاتارلارىنىڭ رەسەي بيلىگى تاراپىنان رەپرەسسياعا ۇشىراي باستاعانىنا الاڭداۋشىلىق ءبىلدىرىپ، ءتيىستى شارالاردى قابىلدايتىنىن ايتقان. چاۆۋشوگلۋنىڭ ايتۋىنشا، تۇرىك دەپۋتاتتارى گرۋپپاسى قىرىمعا ارنايى بارىپ، قىرىم تاتارلارىنىڭ جاعدايىن كوزبەن باقىلاپ كەلگەن. تۇركيا دەپۋتاتتارى دەلەگاسياسى بۇل جولعى ساپاردىڭ قورىتىندىسىن شىعارعان كەزدە، راسىندا قىرىم تاتارلارىنىڭ قۇقىعى رەسمي رەسەي بيلىگى تاراپىنان اياققا تاپتالىپ جاتقاندىعىن جەتكىزگەن.

سونىمەن قاتار، تۇركيا ديپلوماتتارى جەتەكشىسى ۋكراينا جانجالدارىنا قاتىستى باتىس ەلدەرى دە ءبىرقاتار كەمشىلىكتەر جىبەرگەنىن اتاپ وتكەن.

"باتىس ءوز كەزەگىندە ۋكرايناعا ەۋروپا مەن رەسەي اراسىندا تاڭداۋ جاساۋ مۇمكىندىگىن بەرگەندىگى ەڭ ۇلكەن كەمشىلىك بولدى"،-دەيدى ميەۆليۋت چاۆۋشوگلۋ.

ال تۇركيا پرەزيدەنتى رەجەپ تايىپ ەردوعان تۇركيا رەسپۋبليكاسى ۋكراينانى ستراتەگيالىق سەرىكتەس رەتىندە ەسەپتەپ، ونىڭ تەرريتوريالىق تۇتاستىعىن (قىرىممەن بىرگە) قولدايتىنىن ايتقان بولاتىن. ول ءتىپتى ۋكراينا حالقىنا قولداۋ رەتىندە 50 ميلليون دوللار ءبولۋ تۋرالى مالىمدەمە جاساعان.

تۇركيا پرەزيدەنتى، قىرىم اننەكسياسىنان كەيىنگى قىرىم تارارلارىنىڭ جاعدايىنا قاتىستى رەسەي بيلىگىن اۋىر سىنعا العان بولاتىن.

"ءبىز ءقازىر قىرىمداعى تاتار باۋىرلارىمىزدىڭ جاعدايىن باقىلاپ وتىرمىز. مىنە، ءبىر جىلدان استى. قىرىم زاڭسىز تۇردە رەسەي قۇرامىنا ەندى. جاعداي وزگەردى. قىرىم تاتارلارى رەسەي بيلىگى تاراپىنان قىسىم كورە باستادى. ءبىز مۇنى كۇن تارتىبىنەن تۇسىرمەيتىنىمىزدى ايتقىم كەلەدى. مەيلى، ەكى جاقتى كەلىسسوزدەر ارقىلى نەمەسە كەز كەلگەن حالىقارالىق پلاتفورمادا ءبىز قىرىم تاتارلارىنىڭ ماسەلەسىن الدىعا تارتا بەرەمىز"،-دەگەن تايىپ ەردوعان مىرزا.

نۇرگەلدى ءابدىعاني ۇلى