بۇگىن ماجىلىستە «حالىقتىڭ كوشى-قونى تۋرالى» زاڭ جوباسىنا وزگەرتۋلەر مەن تولىقتىرۋلار ەنگىزۋگە ارنالعان التىنشى وتىرىس ءوتتى. وسىعان دەيىن جالپى جوبادا تۇراقتى تىركەۋگە تۇرۋ مەن ازاماتتىق الۋعا، جەڭىلدىكتەردەن يگىلىكتەنۋگە ارنالعان تاماشا باپتار بار. ولار ءبىر اۋىزدان قابىلدانىپ تا قويدى.
ەندىگى ماسەلە – ەكى انىقتاما!
وتىرىستىڭ كۇنتارتىبىنە ساي، ءبىز ۇسىنعان مىنا ۇسىنىستار تالقىعا ءتۇستى.
ءبىرىنشى: 23-باپ. ورالماندارعا، ەتنيكالىق قازاقتارعا جانە ولاردىڭ وتباسى مۇشەلەرiنە بەرiلەتiن جەڭiلدiكتەرگە بايلانىستى، «ەتنيكالىق قازاقتار جەكە مۇلكى بولىپ تابىلاتىن اۋىل شارۋاشىلىق تەحنيكالارىن كەدەن سالىعىنسىز الىپ كەلۋگە قۇقىلى»؛
ەكىنشى: 32-باپ. ءبىلىم الۋ ماقساتىندا كەلەتىن كوشىپ كەلۋشىلەرگە كەلۋگە ۆيزا بەرۋدىڭ شارتتارىنا بايلانىستى، «قازاقستان رەسپۋبليكاسى سىرتقى ىستەر مينيسترلىگى جانە قازاقستان رەسپۋبليكاسىنىڭ شەتەلدەگى مەكەمەلەرى ءبىلىم الۋ ماقساتىندا كوشىپ كەلەتىن ەتنيكالىق قازاقتارعا كەزەكسىز نەمەسە جەڭىلدەتىلگەن تارتىپپەن ۆيزا بەرەدى»؛
ءۇشىنشى: 33-باپ، ءبىلىم الۋ ماقساتىندا كەلەتىن كوشىپ كەلۋشىلەرگە بايلانىستى، «قازاقستان رەسپۋبليكاسىنا ءبىلىم الۋ ماقساتىندا كەلگەن ەتنيكالىق قازاقتار وقۋعا تۇسكەننەن كەيىن وقۋ ورىندارىنىڭ جاتاقحاناسىن قوسا العاندا تۇراقتى تىركەۋگە تۇرۋعا جانە قازاقستان رەسپۋبليكاسىنىڭ ازاماتتىعىن قابىلداۋ تۋرالى ءوتىنىش بەرۋگە قۇقىلى»؛
ءتورتىنشى: جوبانىڭ 49-بابىنىڭ 2) تارماعىنا بايلانىستى، «ەتنيكالىق قازاقتاردى قوسپاعاندا سوتتالعانعا دەيiن تۇراقتى تۇرعىلىقتى جەرi قازاقستان رەسپۋبليكاسىنان تىس بولعان، باس بوستاندىعىنان ايىرۋ ورىندارىنان بوساتىلعان»؛
بەسىنشى: جانە دە جوبانىڭ 49-بابىنىڭ 9) تارماعىنا بايلانىستى، «ەتنيكالىق قازاقتاردى قوسپاعاندا اۋىر نەمەسە اسا اۋىر قىلمىس جاساعانى ءۇشىن سوتتالعاندىعى بولعان».
وبالى نە، جۇمىس توبىنىڭ جەتەكشىسى گۇلنار سۇلەيمەن قىزى سەيىتماعامبەتوۆا اپايىمىزدان باستاپ، قۇتتىقوجا ىدىرىسوۆ، گۇلميرا يسىمبايەۆا، باقىتبەك سماعۇل، الماس تۇرتايەۆ، مەرۋەرت كازبەكوۆا، ايقىن قوڭىروۆ قاتارلى حالىق قالاۋلىلارى اتالعان ۇسىنىستاردىڭ قاجەت ەكەنىن تولىق ءتۇسىندى جانە قاتىستى مەكەمەلەردىڭ باسشىلارى مەن ماماندارىنىڭ ۋاجدەرىن تولىق تىڭدادى.
وتە-موتە وقۋ ماقساتىندا كەلەتىن ەتنيكالىق قازاق ستۋدەنتتەرىنە قاتىستى جەڭىلدىك قاراستىرۋ جاعىنا كەلگەندە ءبىلىم مينيسترلىگىنەن كەلگەن مامان اقەركە ابىلايحان قىزى ءار جىلى مەمەلەكەت جاعىنان شەتتەن كەلەتىن قانداستارىمىزعا دەپ 1400 بالاعا جوو-دا وقۋعا كۆوتا بولىنەتىنىن، ءبىراق سول تالاپكەرلەردىڭ تەست تاپسىراتىن مەزگىلگە ۇلگىرە الماي قالاتىنىن ايتىپ، بۇل تارماقتىڭ قاجەت ەكەنىن ايقىنداپ بەردى.
جاسىراتىنى جوق، 33-باپقا باپقا كەلگەندە، ءىىم كوشى-قون پوليسياسى كوميتەتى ءتوراعاسىنىڭ ورىنباسارى عاليا سارسەنوۆا قارسى شىقتى.
وعان قارسى دەپۋتات مەرۋەرت كازبەكوۆا جاۋاپ بەردى. قارىنداسىمىز بۇل تارماقتىڭ دا كەرەك ەكەنىن جاقسىلاپ دالەلدەدى.
ال، 2011 جىلعى 22 شىلدەدەن بەرى قانداستارىمىزدىڭ تۇراقتى تىركەۋگە تۇرۋىنا كەدەرگى بوپ كەلە جاتقان قازاقستان رەسپۋبليكاسىنىڭ №477-IV «حالىقتىڭ كوشى-قونى تۋرالى» زاڭىنىڭ 49-بابىنداعى 2) جانە 9) تارماقتارىنا قاتىستى ەكى ۇسىنىس تۋرالى دا كوپ تالقى بولدى. ءبىز قايرات بوداۋحان ەكەۋمىز ءوز تاراپىمىزدان ەگەر بۇل جولى دا اتىشۋلى ەكى انىقتاما الىنىپ تاستالماسا، مىنا زاڭنىڭ دا قۇنى كوك تيىن بولاتىنىن، جۇڭگو جاعىنىڭ سوتتى ادامدى شەتەلگە شىعارمايتىنىن قاداپ ايتتىق.
بۇگىن وتىرىسقا زاڭگەر ماقسات نۇرىپباي ءىنىمدى ەرتە بارعانمىن. ماقسات ءىلياس ۇلى ەڭ دامىعان التى ەلدىڭ رەپوتريانتتاردى قابىلدايتىن زاڭىن تانىستىرا كەلىپ، بۇل ەلدەردىڭ بىردە بىرەۋى كەلۋشىلەردىڭ بۇرىن سوتتىلىعىنىڭ بار-جوعىنا قارامايتىنىن اتاپ ءوتتى...
جۇمىس توبى مۇشەلەرىنىڭ اتالعان بەس ۇسىنىستىڭ دا وتە ماڭىزدى ەكەنىنە، ونى تولىعىمەن قالايدا قابىلداۋ كەرەكتىگىنە كوزدەرى تولىق جەتتى. كەلەسى اپتادا وتەتىن وتىرىسقا دەيىن قاجەتتى اتاۋ-تەرميندەردى دۇرىستاپ جازۋعا، قاتىسى مەكەمەلەر مەن مامانداردىڭ ودان ارى پىسىقتاپ جەتىلدىرە تۇسۋىنە قالدىردى.
بۇل زاڭ جوباسىنا ۇكىمەت ەلباسى نۇرسۇلتان ءابىش ۇلى نازاربايەۆتىڭ تىكەلەي تاپسىرماسى بويىنشا وزگەرتۋلەر مەن تولىقتىرۋلار ەنگىزىپ، پارلامەتكە تالقىلاۋعا ۇسىنعانىن بىلەسىزدەر.
سوندىقتان، ءۇمىت اقتالادى، ءمىنسىز زاڭ قابىلدانادى دەپ سەنەمىز!
اۋىت مۇقيبەك
14.05.2015
استانا
