اقتوبە قالاسى زاۆودسكوي پوليسيا بولىمشەسىنىڭ 25 جاستاعى پوليسەيى دوسىنىڭ تۋعان كۇنىندە بەيتانىس ادامعا قارۋ كەزەپ، دوسىنا سىيلىق بەرۋىن تالاپ ەتكەن. ۋچاسكەلىك پوليسەيگە قارۋلى ۇرلىق جاسادى دەگەن ايىپ تاعىلدى. 30 ساۋىردە زاۆودسكوي پوليسيا بولىمشەسىنىڭ ۋچاسكەلىك پوليسەيى قايرات كەزەكشىلىكتەن كەيىن دوسىنىڭ ۇيىنە تۋعان كۇنگە بارعان. ەر كىسىلەر كەشتەتىپ ءىشىپ وتىرعان. تاڭعى تورتتەر شاماسىندا ەكەۋى دالاعا شىعىپ ءىشۋىن جالعاستىرعان. پوليسەي ۇستىندەگى فورماسىن شەشپەي جۇرە بەرگەن. سونىمەن قاتار، تەرگەۋشىلەر ونىڭ قولىندا تابەلدىك قارۋ بولعانىن ايتۋدا. ءىشىپ وتىرعان ازاماتتاردىڭ قاسىنان ءوتىپ بارا جاتقان بەيتانىس ەر كىسى پوليسەيدەن اتىراۋعا 30 000 تەڭگەگە اپاراتىن تاكسيدى قايدان تابۋعا بولاتىنىن سۇراعان. ازاماتتىڭ قولىندا پورتفەلى مەن پاكەتكە ورالعان دۇنيەسى بارىن بايقاعان پوليسەي ونى وزدەرىمەن بىرگە ىشۋگە شاقىرعان. پوليسەي پورتفەلىندەگى ىشىمدىكتى الىپ، تويلاتۋعا قوسىلا كەتكەن ەر كىسىدەن دوسىنا سىيلىق بەرۋدى سۇراعانىن العا تارتتى. الايدا تەرگەۋشىلەر ۋچاسكەلىك پوليسەي “ەر كىسىگە قارۋ كەزەپ، ۇرلىق جاساماقشى بولعان” دەپ ەسەپتەيدى. پورتفەل يەسى بولسا، پوليسيا قارۋ كەزەگەن ساتتە قورىققاننان پورتفەلىن تاستاي سالىپ، قاشقانىن ايتۋدا. زارداپ شەگۋشى ونىڭ ىشىندە 50 000 تەڭگە مەن پاكەت بولعان دەپ سەندىردى. ۋچاسكەلىك پوليسەي پورتفەل مەن پاكەتكە ورالعان مەتالل ىزدەگىش قۇرالدى كوتەرىپ، ءوز كولىگىنە سالعان. ءقاۋىپسىز جەرگە قاشىپ ۇلگەرگەن زارداپ شەگۋشى پوليسياعا حابار بەرىپ، 5 مينۋت ىشىندە بىردەن 4 پاترۋلدىق ماشينا كەلىپ جەتكەن. ازامات 132 800 تەڭگە ماتەريالدىق زالال كەلتىرىلگەنىن ايتقان. ۋچاسكەلىك پوليسەيگە قاتىستى قىلمىستىق ءىس قوزعالىپ، 2 ايعا تەرگەۋ يزولياتورىنا قامالدى. ايىپتى دەپ تانىلعان جاعدايدا پوليسەي 5-10 جىلعا باس بوستاندىعىنان ايىرىلادى.