قازاقستاندىق كاسىبي بوكسشى امەريكاندىق كىشى ۆيللي مونرونى التىنشى راۋندتا نوكاۋتقا جىبەرىپ، ورتا سالماقتا سۋپەرچەمپيوندىق اتاعىن قورعاپ قالدى. باستاپقىدان قارسىلاسىن سوققىنىڭ استىنا العان گولوۆكين مونرونى ەكىنشى راۋندتا ەكى مارتە سۇلاتىپ ءتۇسىرىپ، نوكداۋنعا جىبەردى. ءۇشىنشى، ءتورتىنشى راۋندتا امەريكالىق بوكسشى ەسىن جيعانداي بولىپ قارسىلاسا باستادى. الايدا التىنشى راۋندتا گولوۆكيننىڭ اۋىر سوققىسىنان كەيىن الاڭداعى تورەشى ايقاستى توقتاتتى. بۇل – 33 جاستاعى قازاقستاندىق بوكسشىنىڭ كاسىبي رينگتەگى 33 كەزدەسۋىندەگى كەزەكتى جەڭىسى. گەنناديي سونىڭ 30-ىن، قاتارىنان 20 شايقاسىن نوكاۋتپەن اياقتاپ، ايگىلى تايسوننىڭ رەكوردىن جاڭارتتى. اقش-تىڭ ينگلۆۋد قالاسىنداعى گولوۆكين مەن كىشى مونرونىڭ جەكپە-جەگىن كورۋگە 12600 ادام جينالعان.