ءوز-وزىن سۋرەتكە تۇسىرۋگە دەگەن قۇشتارلىق سالدارىنان تۋىنداعان قايعىلى وقيعا رۋمىنيانىڭ ياسسى قالاسىندا ورىن الدى. جەرگىلىكتى باق-تا تاراعان اقپاراتتارعا سايكەس، سەلفيگە قىزىققان 18 جاستاعى اننا ۋرسۋ اسەرلى سۋرەتكە تۇسەمىن دەپ تىرىدەي ورتەنىپ كەتتى. «روسسييسكايا گازەتا» باسىلىمىنىڭ حابارلاۋىنشا، بويجەتكەن قۇربىسىمەن بىرگە پويىزدىڭ ۇستىندە تۇرعان بىرەگەي سۋرەت ءتۇسىرۋ ءۇشىن تەمىرجول ستانساسىنا بارادى. پويىزدىڭ شاتىرىنا شىعا بەرەردە قىزداردىڭ ءبىرىنىڭ اياعى جوعارى كەرنەۋلى توق سىمىنا ءتيىپ كەتەدى. سالدارىنان، 27 000 ۆولتتىق توق سوققان قىز تۇرعان جەرىندە ورتەنىپ كەتكەن. توقتىڭ كەرنەۋى ونىڭ قۇربىسىنا دا ءتيىپ، ونى پويىزدىڭ ۇستىنەن جەرگە لاقتىرىپ جىبەرەدى. وسى ساتتە پويىزدىڭ ماڭىنان ەر ازامات ءوتىپ بارا جاتقان. وقيعا كۋاگەرى پويىزدىڭ ۇستىنە قارعىپ ءمىنىپ، زارداپ شەككەن قىزدىڭ ورتەنگەن كيىمىن سوندىرمەك بولادى. الايدا ول قىزدى قۇتقارا المادى. دەنەسىنىڭ 50 پايىزىن كۇيىك شالعان بويجەتكەن اۋرۋحانادا كوز جۇمدى. ونىڭ قۇربىسى دا اۋرۋحاناعا تۇسكەن، ابىروي بولعاندا ونىڭ ومىرىنە ەش ءقاۋىپ ءتونىپ تۇرعان جوق. وكىنىشكە قاراي، الەمدى جايلاعان سەلفيمانيا سالدارىنان تۋىنداعان جان تۇرشىگەرلىك قايعىلى وقيعالار جيىلەپ بارادى. تاياۋدا اۆستريادا ءالپى تاۋىنا كوتەرىلگەن بريتاندىق وقۋشى سەلفي جاسايمىن دەپ، 500 مەتر بيىكتىكتەن قۇلاپ كەتكەن.