اتىراۋدا قازا تاپقان پوليسەيدى مىڭداعان ادام سوڭعى ساپارعا شىعارىپ سالدى. ماحامبەت اۋدانىنىڭ بەرەكە اۋىلىندا سۋعا باتىپ بارا جاتقان ايەلدى قۇتقارامىن دەپ، قازا بولعان 24 جاستاعى پوليسيا سەرجانتى شالقار اكىمعالييەۆتى جەرلەۋ ءراسىمى وتكەن بولاتىن دەپ، حابارلايدى Qamshy.kz اقپارات اگەنتتىگى.
مارقۇمدى سوڭعى ساپارعا شىعارىپ سالۋ شەرۋىندە اعايىن-تۋىستارى، دوس-جاراندارى مەن قالانىڭ مىڭداعان تۇرعىندارى قاتىسقان ەدى. باتىر جەرلەستەرىن اقتىق ساپارعا شىعارىپ سالۋعا ءىىم ، اتىراۋ وبلىستىق جانە قالالىق اكىمدىگىنىڭ قىزمەتكەرلەرى، ق ر سەنات دەپۋتاتى، ىشكى ىستەر ورگاندارىنىڭ ارداگەرلەرى، ايماقتاعى بارلىق كۇشتىك قۇرىلىمداردىڭ جانە قوعامدىق ۇيىمداردىڭ مۇشەلەرى، قازاقستاننىڭ مۇسىلماندار ءدىني باسقارماسىنىڭ رەسمي وكىلى باستاعان اتىراۋداعى بارلىق يمامدار، جەرگىلىكتى دەپۋتاتتار، پروكۋراتۋرا ورگاندارىنىڭ وكىلدەرى قاتىستى. سەنات سپيكەرى داريعا نازاربايەۆانىڭ، «نۇر وتان» پارتياسى ءتوراعاسىنىڭ ءبىرىنشى ورىنباسارىنىڭ، ىشكى ىستەر ءمينيسترىنىڭ كوڭىل ايتۋ جەدەل حاتتارى وقىلدى.
ايماق باسشىسى نۇرلان نوعايەۆ مارقۇمنىڭ وتباسىنا كوڭىل ايتىپ، بۇل ءبىر اۋلەتتىڭ عانا ەمەس، بۇكىل ەلدىڭ قايعىسى ەكەندىگىن اتاپ ءوتتى.
- بۇگىن اۋىر كۇن. بۇل اعايىن- تۋىستاردىڭ عانا ەمەس، بۇكىل قازاقستاندىقتاردىڭ ورتاق قايعىسى، سوندىقتان، ءبىز سىزدەرمەن بىرگە قايعىرىپ وتىرمىز. مارقۇمنىڭ ەسىمى جۇرەگىمىزدە ماڭگى ساقتالادى. وسىنداي ماقتاۋلى ۇلدى تاربيەلەگەندەرىڭ ءۇشىن سىزدەردىڭ الدارىڭىزدا باس يەمىز،- دەدى نۇرلان نوعايەۆ.
پوليسەيدىڭ زيراتى باسىندا ءۇش رەت مىلتىق اتىلدى.
ىشكى ىستەر ورگاندارىندا شالقار اكىمعالييەۆ بەس جىلدان استام ۋاقىت قىزمەت ەتىپ كەلگەن. 1 ساۋىردە 25 جاسقا تولار ەدى.
ۇسىنعان: فاريزا جومارت قىزى
