كۇللى الەمگە قازاق اتىن تانىتقان ديماش قۇدايبەرگەننىڭ رەسەيدەگى ەڭ العاشقى كونسەرتى كۇنى كەشە ماسكەۋدىڭ كرەملىندە كەرەمەت دەڭگەيدە ءوتتى.
Vladimir K ەسىمدى ازاماتتىڭ youtube.com-داعى جەكە كانالىندا ديماشتىڭ كرەملدە وتكەن كونسەرتىنىڭ تولىق نۇسقاسى شىقتى دەپ حابارلايدى Qamshy.kz اقپارات اگەنتتىگى.
وتكەن جىلدىڭ جەلتوقسان ايىندا ءانشى كرەمل سارايىنىڭ ساحناسىندا ونەر كورسەتەتىنىن حابارلاعان ەدى. اۋەلى ديماش ءبىر كونسەرت بەرۋى ءتيىس ەدى، ءبىراق بيلەتتەر جىلدام ساتىلىپ كەتىپ، رەسەيلىك تاراپتىڭ وتىنىشىمەن قازاقستاندىق ءانشى كەلەسى كۇنى دە ساحناعا شىعۋعا كەلىسىم بەرگەن ەدى.
جاندى داۋىستا وتكەن ءان كەشى ءۇزىلىسسىز تۋرا 3 ساعاتقا جالعاستى. وسى ۋاقىت ارالىعىندا قۇدايبەرگەنوۆ رەپەرتۋارىنداعى قازاق، ورىس، فرانسۋز، اعىلشىن تىلدەرىندەگى اندەردى، سونداي-اق، جاڭا تۋىندىلارىن ورىندادى.
داۋىس مۇمكىندىگى 6 وكتاۆاعا دەيىن باراتىن ديماشتىڭ ونەرىن 6 مىڭ ادام تاماشالادى. كونسەرت "د-ديناستيا" دەپ اتالدى. ونى ۇيىمداستىرۋعا تانىمال رەسەيلىك كومپوزيتور يگور كرۋتوي اتسالىسقان.
زالدا وتىرعان كورەرمەندەر ديماش ءان سالعاندا دەنەلەرى تۇرشىككەنىن، ۇيلەرىنە قايتقان كەزدە دە ەستەرىن جيا الماعاندارىن ايتتى.
ۇسىنعان: ماقپال سەمباي
