"نۇرسۇلتان ءابىش ۇلى مەنىڭ ونەرىمدى، مەنىڭ اندەرىمدى جاقسى كورەدى. وسىدان تۋرا 30 جىل بۇرىن، ول كەزدە كەڭەس كەزى بولاتىن، مەنى الماتىعا شاقىرىپ الىپ، ەكەۋمىز ونەر تۋرالى ۇزاق سويلەستىك. سول كەزدە مەن ول كىسىنىڭ انگە، ونەرگە وتە قۇشتار ەكەنىن جاقسى ءتۇسىندىم.

الماتىدا بولعان مەنىڭ جەكە كونسەرتىمە قاتىسىپ، باستان-اياق تىڭدادى. ودان كەيىن جەكە قوناققا شاقىرىپ الىپ، 4-5 ساعاتتاي ول كىسىنىڭ الدىندا دومبىرامەن ءان ايتىپ، تاماشا وتىرىس بولعان ەدى. ودان كەيىن دە بىرنەشە رەت جولىقتىق.

ول كىسىنىڭ 60 جىلدىق مەرەيتويىندا ءۇشقوڭىر جايلاۋىنا باردىق. سوندا مەنى جەكە شاقىرىپ الىپ، «التەكە، وسى ءۇشقوڭىر جايلى ءان جازساق قايتەدى» دەپ ۇسىنىس جاسادى. ءبىزدىڭ سول ءانىمىزدى حالىق وتە جاقسى قابىلدادى. حالىق ءانى دەپ تە جۇرەدى ەل اۋزىندا. سول ءۇشىن ءوزىمدى باقىتتى ازامات، باقىتتى كومپوزيتور سانايمىن. ودان سوڭ سارىارقا جايلى ولەڭ جازدىق. ونىڭ دا ءانىن نۇرسۇلتان ءابىش ۇلى جازدى.

بىلتىر تۇڭعىش رەت ورازا ۇستاپ، اۋىز بەكىتتىم. سول كەزدە ەلباسى استانادا اۋىز بەكىتكەن 350 مۇسىلمان قاۋىمىنا اۋىزاشار بەردى. سوندا ەلباسىنىڭ جانىندا وتىردىم. امان-سالەمنەن كەيىن ول كىسى «التەكە، قىزىلسايعا بارىپ تۇراسىڭ با؟» دەدى. "اعا، ءسىز قىزىلسايدى قايدان بىلەسىز؟" دەپ سۇرادىم. "سەنىڭ اندەرىڭنىڭ ىشىندە قىزىلساي تۋرالى ايتىلادى ەمەس پە؟" ەل-جۇرت قالاي دەپ سۇراعان سوڭ ەلىم، جەرىم جايلى ايتىپ بەردىم. ول كىسىنىڭ ەستە ساقتاۋ قابىلەتى تاڭعالارلىق. بىردە «التەكە، كوزىڭنەن اينالايىن» دەگەن ءانىڭدى ورىنداشى دەگەن سوڭ دومبىرامەن ايتىپ شىقتىم. سويتسەم، بىر-ەكى شۋماعىن ايتۋدى ۇمىتىپ كەتىپپىن. سودان ول كىسى مەنىڭ دومبىرامدى الىپ، ءوزى قوڭىر داۋىمەن ايتىپ شىقتى.

ءبىر اپتا بۇرىن ەلباسى ءوز ورنىن قاسىم-جومارت كەمەلۇلىنا بەردى. مۇنىڭ ءبارى شىنىندا ءبىز كۇتپەگەن جاعداي ەدى. ءبارىمىز تاڭعالدىق. كادىمگى تاۋ قۇلاپ كەتكەندەي ءوزىم ءبىر سونداي تاڭعالىستا بولدىم. ەندى نۇرەكەڭ كەمەڭگەر، اقىلدى ادام عوي. جاسى كەلگەنىن مويىنداعىسى كەلدى ما، استىنداعى تاعىن قاسىم-جومارت كەمەلۇلىنا ۇسىندى. زاڭدىلىق تا شىعار.

ەلباسىنىڭ قازاق ەلى، قازاق ءۇشىن كۇندىز كۇلمەي، تۇندەي ۇيىقتاماي ەڭبەك ەتكەنىن بىلەمىز. 100-دەن استام ۇلىس بۇگىنگە دەيىن وسىناۋ بارماقتاي عانا قازاق جەرىندە ءتاتۋ-تاتتى عۇمىر كەشتىك. استانانى سالعىزدى. سارىارقانىڭ تورىندەگى استانانىڭ ساياسي دا، اۋماقتىق دا ماڭىزى زور ەكەنىن بىلەمىز. ونىڭ ءاربىر كىرپىشىنە دەيىن ول كىسىنىڭ ەڭبەگى ءسىڭدى. ەلباسىنىڭ استانانىڭ ءاربىر كوشەسى مەن كىرپىشىنە دەيىن جوبالادىم دەگەن ءسوزى بار. 20 جىلدىڭ ىشىندە استانا گۇل جايناپ، الەمدەگى ەڭ ءبىر كوركەم قالاعا اينالدى. وعان بۇكىل حالىق كۋا.

قاسىم-جومارت كەمەل ۇلىنىڭ ەڭ ءبىرىنشى بەرگەن بۇيرىعى ەلباسىنىڭ كەۋدەسىنە التىن جۇلدىز تاقتى. ول دا جاراسىمدى. ودان كەيىن استانانىڭ اتىن نۇرسۇلتان دەپ وزگەرتۋ جايلى شەشىم شىعارىلدى. بۇل ەندى الەمدىك تاجىريبەدە بار نارسە. سوندىقتان ءبىزدىڭ دە از ۋاقىتتا ۇيرەنىپ كەتەتىنىمىزگە سەنىمدىمىن. ازامات رەتىندە ارينە مەن استانانىڭ نۇرسۇلتان دەپ وزگەرتىلۋىن قولدايمىن. قۇتتى بولسىن!"

التىنبەك قورازباي ۇلى، قازاقستاننىڭ حالىق ءارتىسى.

ۇسىنعان: اسەل داعجان.