"سامۇرىق-قازىنا" ۇلتتىق ءال-اۋقات قورى" اق ءتوراعاسى احمەتجان ەسىموۆ بۇگىن ءبىر تۇيتكىلدىڭ شەتىن شىعاردى.

ونىڭ ايتۋىنشا، "سامۇرىق-قازىنا" اكتيۆتەرىنىڭ ءجيى بۇعاتتالۋى ينۆەستيسيالىق جاعدايدىڭ تەپە-تەڭدىگىن بۇزۋى ابدەن مۇمكىن.

2017 جىلى جالپى قۇنى 5 ميلليارد دوللار تۇراتىن قاشاعان اكسيالارىنا شەكتەۋ قويىلسا، بىلتىر تۇركياداعى "شەكەربانكتىڭ" دە 38 ميلليون دوللارلىق اكسياسى بۇعاتتالعان.

"وكىنىشكە قاراي، اكتيۆتەردىڭ بۇعاتتالۋىنا بايلانىستى قوردى شەتەلدىك يۋريسديكسيالارداعى سوت پروسەستەرىنە ۇدايى تارتۋ پراكتيكاسى بەلەڭ الىپ بارادى"، - دەدى ەسىموۆ ۇكىمەت وتىرىسىندا.

ءوزىنىڭ كوپ ايتىلا بەرمەيتىن اڭگىمەسىنەن كەيىن قايتا ءسوز العان ول:

"قور اكتيۆتەرىنىڭ بۇعاتتالۋى ءبىزدىڭ اكتيۆتەرىمىزدىڭ ينۆەستيسيالىق تارتىمدىلىعىنا ايتارلىقتاي جاعىمسىز اسەر ەتۋدە. مەن مۇنى تەك رومان ۆاسيليەۆيچكە (يندۋستريا جانە ينفراقۇرىلىمدىق دامۋ ءمينيسترى سكليار – رەد.) ايتىپ وتىرعانىم جوق. ءبىزدىڭ ەل ءۇشىن مۇنىڭ قانشالىقتى ماڭىزدى ەكەنىن باسقا دا جىگىتتەر جاقسىلاپ ءتۇسىنسىن دەگەنىم عوي"، - دەدى.

وسىعان بايلانىستى "سامۇرىق-قازىنا" قورى ادىلەت جانە قارجى مينيسترلىكتەرىنە رەسپۋبليكاعا قارسى شىعارىلعان حالىقارالىق اربيتراجدىق پروسەستەر بويىنشا شەشىمدەردى ورىنداۋ تەتىگىن ازىرلەۋدى ۇسىنعان.

"ونداي مەحانيزم بولسا، ۇلتتىق قوردىڭ، كۆازيمەملەكەتتىك سەكتوردىڭ اكتيۆتەرىنىڭ بۇعاتتالۋىنان قورعانۋعا بولادى"، - دەيدى ول.