الەۋمەتتىك جەلىدە جاپپاي تارالعان مىنا ءبىر جايت كوپشىلىكتىڭ كوڭىلىن اۋداردى دەپ حابارلايدى Qamshy.kz اقپارات اگەنتتىگى. 

مالىمەتتەرگە سۇيەنسەك، جەتىسايداعى اپكەلى-سىڭلى ءۇش قىزدىڭ وگەي اناسى ولاردى اياۋسىز سوققىعا جىعىپ، ۇزاق ۋاقىت قورلاپ كەلگەن ەكەن.

"ءاپالى-سىڭلىلى: 2003 جىلعى ساليما، 2005 جىلعى مانشۇك، 2007 جىلعى ميلانا. بۇل قاراكوزدەرىمىزدىڭ كورمەگەن قورلىعى قالماپتى. وگەي انالارى، 1991 جىلعى كوبەيەۆا جۇلدىز فاشيستەردەن دە اسىپ تۇسكەن سياقتى. كامەلەت جاسىنا تولماعان قىزداردىڭ تىرناقتارىنىڭ استىنا قايتا-قايتا ينە تىعىپ، جىلايىن دەسە، ۇرىپ-سوعىپ "كۇلىپ تۇر" دەپ، جاندارىنا باتىپ تۇرسا دا، ەزۋلەرىن تارتقىزىپ، توڭازىتقىشقا ءبىرتالاي ۋاقىت وتىرعىزىپ قيناپ، قايشىمەن دەنەلەرىنە جاراقات سالىپ، شايلارىنا گەل قوسىپ بەرىپ ىشكىزىپ، ءتىپتى جىنىستىق مۇشەلەرىن كەمپىراۋىزبەن قىسىپ، جاراقات سالىپ جۇرگەن ەكەن. بۇل قىزداردىڭ كورگەن ازاپتارى ادام ايتقىسىز. ايدىڭ-كۇننىڭ امانىندا وسىنداي جاعدايدى "جابۋلى قازان جابۋلى" ەتىپ قالدىرۋعا ۇمتىلعان جەتىساي اۋدانى باسشىلارىنىڭ، قۇزىرلى مەكەمەلەرىنىڭ نە بالا-شاعالارى، نە جۇرەكتەرى جوق دەپ قالاسىڭ وسىندايدا! بەس كۇننەن بەرى اۋرۋحانادا جاتقان قىزداردىڭ جاعدايىن جەرگىلىكتى جەردىڭ اتقامىنەرلەرى ءتىپتى سۇراماعان دا! ال، كومەك بەرۋ تۋرالى مۇلدەم اڭگىمە جوق! ءيا، ءبىر ادامنىڭ جاۋىزدىعىنا مىڭ ادام جاۋاپسىزدىعىمەن جاۋاپ بەرىپ جۇرگەنىنە ەرىكسىز قايران قالاسىڭ!

جەتىسايدان تابىلماعان اراشانى تۇركىستان وبلىسىنىڭ باسشىلارى، زاڭ ورىندارىنان، دەنساۋلىق ساقتاۋ باسقارماسىنان سۇرايمىز! قاراكوزدەرىمىزدى جىلاتۋعا جول بەرمەيىك! جانە الگى وگەي شەشەلەرىن قاتاڭ جازاعا تارتايىق!.." دەپ جازدى اسەت ءاسساندي ەسىمدى ازامات ءوزىنىڭ فەيسبۋك الەۋمەتتىك جەلىدەگى پاراقشاسىندا. 

بۇل جازبا الەۋمەتتىك جەلىلەردىڭ بارىندە كەڭىنەن تارالىپ، كوپشىلىكتىڭ سىنىنا قالدى. وگەي شەشەنىڭ قاتىگەزدىگىنە جانى اۋىرىپ، جاعاسىن ۇستاعان حالىق سان ءتۇرلى پىكىر قالدىرىپ، تەز ارادا وگەي شەشەنى تاۋىپ، ءتيىستى جازاسىن بەرۋ كەرەكتىگىن جارىسا جازۋدا. سۋرەتتى كورگەن كەز كەلگەن ادامنىڭ ءىشى الاي-دۇلەي بولىپ، بەيبىت كۇندە بۇل نە سۇمدىق دەپ توبە شاشىڭ تىك تۇرادى.  سۋرەتتەرگە بەي-جاي قاراۋ مۇمكىن ەمەس.

وسى جايتقا بايلانىستى تۇركىستان وبلىسى اكىمىنىڭ باسپا ءسوز قىزمەتىنەن حابارلاما تاراتىلدى. حابارلامادا "2019 جىلعى 11 ءساۋىر كۇنى ورتا مەكتەپ ديرەكتورى اۋداندىق ءبىلىم بولىمىنە اتالعان مەكتەپتە وقيتىن كامەلەت جاسقا تولماعان ءاپالى-سىڭلى ءۇش قىزدا دەنە جاراقاتى بار ەكەنىن حابارلاعان. 

ەرتەڭىنە، ياعني 12 ءساۋىر كۇنى اۋداندىق پوليسيا ءبولىمىنىڭ تاراپىنان ق ر قىلمىستىق كودەكسىنىڭ 140 بابى، 2 تارماعى بويىنشا (كامەلەتكە تولماعان ادامدى تاربيەلەۋ ءجونiندەگi مiندەتتەردi ورىنداماۋ) سوتقا دەيىنگى تەرگەۋ جۇمىستارى باستالدى.

قازىرگى تاڭدا بالالار جەتىساي اۋداندىق ورتالىق اۋرۋحاناسىندا دارىگەرلەر قاراۋىندا. ولاردىڭ دەنساۋلىعى مەن ومىرىنە ەش ءقاۋىپ جوق. 
اتالعان ءىستى وبلىس پروكۋرورى ءوز باقىلاۋىنا الدى. بۇگىن كۇدىكتى ازاماتشاعا قاتىستى شەكتەۋ شارالارى قولدانىلادى" دەلىنگەن.

ۇسىنعان: ماقپال سەمباي